इंदूरमध्ये भारताच्या 224 धावा; अभिषेक शर्माचे 69, आता वेस्ट इंडिजसमोर आव्हान

इंदूरच्या होळकर स्टेडियमवर भारत आणि वेस्ट इंडिज यांच्यातील मालिकेतील तिसरा टी-20 सामना सुरू आहे. नाणेफेक जिंकून वेस्ट इंडिजने आधी क्षेत्ररक्षण घेतले आणि भारताचा डाव 224 धावांत संपला. आता हे आव्हान वेस्ट इंडिजच्या फलंदाजांसमोर आहे.

भारताच्या या डावात अभिषेक शर्माच्या 69 धावा वगळता कोणत्याही फलंदाजाला अर्धशतक गाठता आले नाही. त्यामुळे आधी क्षेत्ररक्षण घेण्याचा वेस्ट इंडिजचा निर्णय एका अर्थाने योग्यच ठरला.

सलामीला आलेल्या अभिषेकने संजू सॅमसन फक्त 3 धावांवर बाद झाल्यानंतरही त्याचे दडपण स्वतःच्या खेळावर येऊ दिले नाही. इशान किशनच्या साथीने त्याने दुसऱ्या विकेटसाठी 108 धावांची भागीदारी केली. त्यातील 63 धावा अभिषेकच्या होत्या. त्याने 30 चेंडूंत 6 चौकार आणि 5 षटकारांच्या मदतीने 69 धावा केल्या. शतक होईल असे वाटत असतानाच शेमर स्प्रिंगरने स्वतःच्याच गोलंदाजीवर त्याचा झेल घेतला.

याच खेळीत अभिषेकने टी-20 आंतरराष्ट्रीय क्रिकेटमध्ये इतिहास घडवला. टी-20 आंतरराष्ट्रीय सामन्यांत सर्वात जलद 2,000 धावा करणारा फलंदाज तो ठरला. आपली 33 वी धाव पूर्ण करताच त्याने हा विश्वविक्रम केला. त्याने 1,024 चेंडूंमध्ये 2,000 धावा पूर्ण केल्या. सर्वात कमी चेंडूंत 2,000 धावांचा टप्पा गाठणारा तो जगातील पहिला फलंदाज आहे. या कामगिरीने त्याने सूर्यकुमार यादवचा विश्वविक्रमही मोडला.

मधल्या फळीला मात्र पुन्हा लय सापडली नाही. इशान किशनने 37 धावा केल्या, पण इतर कोणालाही टिकून खेळता आले नाही. तिलक वर्माने 28 धावा केल्या, मात्र तोही विचित्र पद्धतीने धावचीत झाला. कर्णधार श्रेयस अय्यर 1 धावेवर, नमन धीर 10 धावांवर आणि नितीशकुमार रेड्डी 21 धावांवर स्वस्तात बाद झाले.

वेस्ट इंडिजच्या गोलंदाजांनी सुरुवातीपासूनच भारतीय फलंदाजांवर दबाव ठेवला होता. रोस्टन चेजने श्रेयस अय्यर आणि लयीत आलेला इशान किशन या दोघांना बाद केले. चेजने 38 धावांत 2 विकेट घेतल्या, तर शेमर स्प्रिंगरने 50 धावा देत 2 विकेट मिळवल्या. शेमर जोसेफ, किमो पाउल आणि गुडकेश मोती यांना प्रत्येकी 1 विकेट मिळाली.

आता भारतीय गोलंदाजांसाठी कस लागणार आहे. मागील सामन्यात वेस्ट इंडिजच्या मधल्या फळीतील फलंदाजांचा फॉर्म पाहता त्यांना टिच्चून गोलंदाजी करावी लागेल. शिवाय मैदानावर पडणारे दव क्षेत्ररक्षण करताना पुन्हा डोकेदुखी ठरण्याची शक्यता आहे. त्यामुळे चांगल्या गोलंदाजीसोबतच क्षेत्ररक्षणावरही भारताला पकड ठेवावी लागेल.