आंबा, केळी आणि खजूर खाताना रक्तातील साखरेचे प्रमाण वाढण्याचा धोका, तज्ज्ञांचा सल्ला
काही फळांमधील नैसर्गिक साखर आणि कार्बोहायड्रेट्समुळे रक्तातील साखरेची पातळी झपाट्याने वाढू शकते. ही फळे कोणती आणि ती कशी खावीत, याबद्दलची माहिती.
भारतासह जगभरात मधुमेह, उच्च रक्तदाब आणि हार्ट अटॅकसारख्या गंभीर आजारांच्या रुग्णांची संख्या झपाट्याने वाढत चालली आहे. आहारातील बदल, कमी पाणी पिणे, शारीरिक हालचालींचा अभाव आणि पोषक घटकांची कमतरता, या सगळ्याचा थेट परिणाम आरोग्यावर होताना दिसतो. रक्तातील साखरेचे प्रमाण वाढले की अंगाला खाज सुटणे, वारंवार लघवीला जावे लागणे, चक्कर येणे अशी वेगवेगळी लक्षणे दिसू लागतात. सुरुवातीच्या टप्प्यात या लक्षणांकडे अनेकदा दुर्लक्ष केले जाते, पण तसे न करता वेळीच डॉक्टरांचा सल्ला घेऊन उपचार सुरू करणे गरजेचे आहे.
रोजच्या आहारात ताजी फळे खाल्ल्याने शरीराला फायबर, जीवनसत्त्वे आणि खनिजे यांसारखे आवश्यक घटक मिळतात, त्यामुळे संतुलित आहारात फळांचा समावेश केला जातो. मात्र काही फळांमध्ये असलेले कार्बोहायड्रेट्स रक्तातील साखर झपाट्याने वाढवू शकतात आणि आरोग्याला धोका निर्माण करू शकतात. त्यामुळे फळे खाताना काही गोष्टींची काळजी घेणे आवश्यक आहे.
यातील पहिले फळ म्हणजे आंबा. वर्षातून एकदाच मोठ्या प्रमाणावर बाजारात येणारा आणि फळांचा राजा म्हणून ओळखला जाणारा आंबा भारतासह जगभरात लोकप्रिय आहे. आंब्यामध्ये नैसर्गिक साखर आणि कार्बोहायड्रेट्सचे प्रमाण खूप जास्त असते, त्यामुळे एकाच वेळी भरपूर आंबे खाल्ल्यास रक्तातील साखर झपाट्याने वाढू शकते. मधुमेह असलेल्या लोकांनी आंबा कापून खावा, तर मिल्कशेक किंवा रस बनवून प्यायल्यास रक्तातील साखर लगेच वाढते.
दुसरे फळ म्हणजे केळी. केळ्यांमध्ये पोटॅशियम, फायबर आणि इतर पोषक घटक भरपूर प्रमाणात असतात, आणि वजन वाढवण्यासाठी तसेच पचनक्रिया सुधारण्यासाठी केळी खाण्याचा सल्ला दिला जातो. मात्र केळी जितकी मोठी, तितके त्यातील कार्बोहायड्रेट्सचे प्रमाण जास्त असते. त्यामुळे मधुमेह असलेल्या रुग्णांनी लहान आकाराची केळी निवडावीत आणि ती सकाळच्या नाश्त्यात किंवा दुपारच्या वेळी खावीत.
तिसरे फळ म्हणजे खजूर. रोज एक किंवा दोन खजूर खाण्याचा सल्ला दिला जातो. सुकामेव्याच्या या प्रकारात नैसर्गिक साखर आणि कार्बोहायड्रेट्स असतात, ज्यामुळे रक्तातील साखर झपाट्याने वाढण्याची शक्यता असते. त्यामुळे एका वेळी एक किंवा दोनच खजूर खावेत.
मधुमेह असलेल्या रुग्णांनी फळे खाताना योग्य ती काळजी घेणे आवश्यक आहे, अन्यथा आरोग्यासंबंधी गंभीर समस्या उद्भवू शकतात. हा मजकूर केवळ सामान्य माहितीसाठी असून यात कोणत्याही उपचाराचा दावा करण्यात आलेला नाही. कोणताही उपाय करण्यापूर्वी डॉक्टरांचा सल्ला घ्यावा.
