हिरो मोटोकॉर्पची नवी एक्सट्रीम १६०आर ४व्ही आणि रिफ्रेश्ड एक्सट्रीम २५०आर बाजारात

दुचाकी आणि स्कूटर्सची जगातील सर्वात मोठी उत्पादक कंपनी असलेल्या हिरो मोटोकॉर्पने ऑल-न्यू एक्सट्रीम १६०आर ४व्ही आणि रिफ्रेश्ड एक्सट्रीम २५०आर या दोन मोटरसायकली लाँच केल्या आहेत. प्रीमियम श्रेणीच्या विस्ताराला यामुळे आणखी गती मिळाली आहे. कंपनीच्या प्रीमियम पोर्टफोलिओला अधिक मजबूत करण्याच्या दिशेने हे एक महत्त्वाचे पाऊल आहे. दोन्ही गाड्यांमध्ये आक्रमक स्ट्रीटफायटर स्टाइल, दमदार कामगिरी आणि रायडरसाठी प्रगत तंत्रज्ञान एकत्र आणले आहे.

लाँचच्या वेळी हिरो मोटोकॉर्पच्या प्रीमियम सेगमेंटचे चीफ बिझनेस ऑफिसर अनुज दुआ म्हणाले, "प्रीमियम श्रेणीचा विस्तार आमच्या पुढील वाटचालीतील सर्वात मोठी विकासाची संधी आहे. उत्पादनातील वेगळेपण आणि उत्तम रायडिंग अनुभवासह आम्ही या सेगमेंटमधील आमचे स्थान सातत्याने दृढ करत आहोत. एक्सट्रीम फॅमिली हा आमच्या या धोरणाचा महत्त्वाचा आधारस्तंभ आहे." त्यांच्या म्हणण्यानुसार १३० पेक्षा जास्त हिरो प्रीमिया स्टोअर्सच्या नेटवर्कमधून ही उत्पादने ग्राहकांपर्यंत पोहोचतील.

एक्सट्रीम १६०आर ४व्ही २०२३ मध्ये पहिल्यांदा आली होती आणि तेव्हापासून ती कंपनीच्या प्रीमियम मोटरसायकल पोर्टफोलिओचा महत्त्वाचा भाग आहे. हे नवे मॉडेल आतापर्यंतचा तिचा सर्वात मोठा बदल आहे. स्पोर्टी नेकेड बाइक म्हणून तयार केलेली ही गाडी अधिक तरुण, मस्क्युलर आणि आक्रमक दिसते. मोठ्या बाइकसारखा रोड प्रेझेन्स तिला दिला आहे.

या बाइकमध्ये १६३ सीसीचे, ४-व्हॉल्व्ह, ऑइल-कूल्ड इंजिन आहे. ते ८,७५० आरपीएमला १७.१ पीएस कमाल पॉवर आणि ६,५०० आरपीएमला १४.६ एनएम पीक टॉर्क देते. कंपनीच्या म्हणण्यानुसार ही तिच्या सेगमेंटमधील सर्वात वेगवान मोटरसायकल आहे आणि ती फक्त ४.४ सेकंदांत ० ते ६० किमी/तास वेग गाठते. ६,००० किमीपर्यंत ऑइल बदलण्याची किंवा टॅपेट सेटिंगची गरज नाही.

राइड-बाय-वायर थ्रॉटलमुळे रेन, रोड आणि स्पोर्ट असे तीन राइड मोड्स मिळतात. रेन मोड घसरड्या रस्त्यांसाठी सौम्य प्रतिसाद देतो, रोड मोड रोजच्या प्रवासासाठी संतुलित पॉवर देतो आणि स्पोर्ट मोड थेट व आक्रमक प्रतिसाद देतो. क्रूझ कंट्रोल देणारी ही तिच्या सेगमेंटमधील पहिली मोटरसायकल आहे. अचानक जोरात ब्रेक लावल्यास आजूबाजूच्या वाहनांना सतर्क करणारे पॅनिक ब्रेक अलर्टही या सेगमेंटमध्ये प्रथमच दिले आहे.

ब्रेकिंगसाठी ड्युअल-चॅनेल एबीएस असून पुढे २७६ मिमी आणि मागे २२० मिमी पेटल डिस्क ब्रेक्स आहेत. सस्पेंशनमध्ये पुढे ३७ मिमीचे केवायबी अपसाइड-डाउन फोर्क्स आणि मागे ७-स्टेप प्रीलोड-अॅडजस्टेबल मोनोशॉक आहे. मागचा टायर १३०/७० आर१७ आहे.

रिफ्रेश्ड एक्सट्रीम २५०आर मध्ये राइड-बाय-वायर, चार राइड मोड्स, ट्रॅक्शन कंट्रोल, क्विकशिफ्टर, सेगमेंट-फर्स्ट क्रूझ कंट्रोल आणि टायर प्रेशर मॉनिटरिंग सिस्टीम आहे. शिवाय ऑटोमोबाइल क्षेत्रातील पहिले फ्रिक्वेन्सी सिलेक्टिव्ह डॅम्पिंग सस्पेंशन यात दिले आहे, असे कंपनीने म्हटले आहे.