गोकुळच्या मतमोजणीत सतेज पाटील यांच्या पॅनलची आघाडी, महायुतीचे तिन्ही माजी चेअरमन पराभूत

कोल्हापूर- पश्चिम महाराष्ट्राचे लक्ष लागून राहिलेल्या गोकुळ दूध संघाच्या निवडणुकीची मतमोजणी आज सुरू आहे. मतदान पार पडल्यानंतर आज ही मतमोजणी होत आहे. आमदार सतेज पाटील यांच्या नेतृत्वाखालील राजर्षी शाहू शेतकरी आघाडीने या मतमोजणीत ऐतिहासिक मुसंडी मारली आहे. हे आकडे आघाडीचे आहेत, म्हणजे मतमोजणी सुरू असतानाची स्थिती आहे.

एकूण २५ जागांपैकी सतेज पाटील यांच्या पॅनलने १४ जागांवर आघाडी घेतली असून बहुमताचा 'मॅजिक फिगर' त्यांनी गाठला आहे. दुसरीकडे सत्ताधारी महायुतीचे उमेदवार फक्त ११ जागांवर आघाडीवर आहेत, त्यामुळे त्यांना तेवढ्यावरच समाधान मानावे लागल्याचे चित्र आहे.

कोल्हापुरातील गोकुळ दूध उत्पादक संघाची ही निवडणूक राज्यात चर्चेचा विषय बनली आहे. ही निवडणूक जिंकण्यासाठी सतेज पाटील आणि मंत्री हसन मुश्रीफ यांनी पूर्ण ताकद लावली होती. काहीही झाले तरी गोकुळची सत्ता आपल्यालाच मिळाली पाहिजे, यासाठी दोन्ही आघाड्यांकडून प्रयत्न केले जात होते.

या निवडणुकीत महायुतीला मोठा धक्का बसला असून, त्यांचे तिन्ही माजी चेअरमन अरुण डोंगळे, नवीद मुश्रीफ आणि विश्वास पाटील यांना पराभव पत्करावा लागला आहे.

कोल्हापुरात सतेज पाटील यांच्या कार्यालयाबाहेर सध्या कार्यकर्त्यांनी जल्लोष सुरू केला आहे. कार्यकर्ते फटाके फोडून आणि गुलाल उधळून विजयाचा आनंद साजरा करत आहेत. गोकुळमध्ये सत्ता स्थापनेच्या दिशेने सतेज पाटील यांच्या नेतृत्वाखालील समविचारी आघाडीची वाटचाल सुरू असून, आता केवळ विजयाची औपचारिकता बाकी आहे.

ही निवडणूक सतेज पाटील आणि महायुती यांच्यात थेट झाल्याने राज्याचे लक्ष या निकालाकडे लागले होते. सतेज पाटील यांच्या पॅनलला मिळालेल्या या यशामुळे गोकुळमध्ये सत्ता स्थापनेचा त्यांचा मार्ग मोकळा झाला आहे. कार्यकर्त्यांमध्ये प्रचंड उत्साह दिसून येत असून, हा विजय सतेज पाटील यांच्या राजकीय ताकदीचे प्रतीक मानला जात आहे.