पोंभुर्ण्यात घराच्या बांधकामावरून मामा-भाच्यात हाणामारी; दोन्ही बाजूंवर गुन्हे दाखल

चंद्रपूर जिल्ह्यातील पोंभुर्णा पोलीस ठाण्याच्या हद्दीत येणाऱ्या घाटकुळ गावात घराचे बांधकाम आणि कवेलू काढण्याचा मुद्दा पेटला. त्यातून मामा आणि भाच्यामध्ये जोरदार हाणामारी झाली. दोन्ही बाजूंनी एकमेकांविरुद्ध तक्रारी दिल्या असून, पोंभुर्णा पोलिसांनी परस्परविरोधी गुन्हे दाखल केले आहेत. या हाणामारीत दोन्हीकडील मंडळी जखमी झाली आहेत. मारहाण आणि धमकावल्याचे आरोप दोन्ही बाजूंनी करण्यात आले आहेत.

प्राप्त माहितीनुसार, २४ ऑक्टोबर २०२६ रोजी सकाळी घाटकुळ येथील दयानंद उद्धव दुधे आपल्या नवीन घराचे प्लास्टर काम करत होते. त्यांच्या आईच्या जुन्या घराचे कवेलू भिंतीजवळ येत असल्याने प्लास्टरला अडचण येत होती. म्हणून ते कवेलूची एक ओळ काढत होते.

त्याच वेळी त्यांचा भाचा राजेश्वर विलास दुर्गे तिथे आला. कवेलू का काढत आहेस, असा प्रश्न विचारत त्याने वाद घालायला सुरुवात केली. या वादातून दोन्ही बाजूंनी शिवीगाळ आणि मारहाण झाल्याचा आरोप आहे.

एका बाजूच्या फिर्यादीनुसार, दयानंद दुधे, त्यांची पत्नी दर्शना दुधे आणि मुलगी सपना उंदीरवाडे यांना राजेश्वर दुर्गे याने अश्लील शिवीगाळ करत मारहाण केली. तसेच कुऱ्हाड दाखवून जीवे मारण्याची धमकी दिली, असे या फिर्यादीत म्हटले आहे.

दुसऱ्या बाजूच्या फिर्यादीनुसार, राजेश्वर दुर्गे याने विचारणा केली असता मामा दयानंद दुधे, समीर दुधे, दर्शना दुधे आणि सपना उंदीरवाडे यांनी मिळून त्याला बेदम मारहाण केली. त्यावेळी समीर दुधे याने गळा दाबून धरला. दयानंद दुधे याने लोखंडी सलाखेने पाठीवर व हातावर वार करून त्याला गंभीर जखमी केले आणि जिवे मारण्याची धमकीही दिली, असे या फिर्यादीत म्हटले आहे.

या परस्परविरोधी घटनेची गंभीर दखल घेत पोंभुर्णा पोलिसांनी दोन्ही बाजूंच्या तक्रारींवरून भारतीय न्याय संहितेच्या (BNS) संबंधित कलमांनुसार गुन्हा दाखल केला. एका बाजूने राजेश्वर दुर्गे याच्याविरुद्ध मारहाण आणि धमकावल्याप्रकरणी गुन्हे नोंदवले गेले आहेत.

दुसऱ्या बाजूने दयानंद दुधे, समीर दुधे, दर्शना दुधे आणि सपना उंदीरवाडे यांच्याविरुद्ध प्राणघातक हल्ला आणि मारहाणीचे गुन्हे नोंदवण्यात आले आहेत. या प्रकरणाचा तपास सहायक पोलीस उपनिरीक्षक नागनाथ नैताम यांच्याकडे सोपवण्यात आला आहे.

कौटुंबिक आणि मालकी हक्काच्या कारणावरून झालेल्या या टोकाच्या संघर्षामुळे घाटकुळ गावात खळबळ उडाली आहे. या प्रकरणाचा पुढील तपास पोलीस करत आहेत.