GATE 2027 साठी अर्ज करण्याची शेवटची तारीख उद्या, विलंब शुल्कासह मुदत ५ ऑक्टोबरपर्यंत

अभियांत्रिकी पदवी प्रवेशासाठी महत्त्वाची असलेली परीक्षा GATE 2027 साठी सध्या ऑनलाइन अर्ज भरण्याची प्रक्रिया सुरू आहे आणि याची नियमित शेवटची तारीख उद्या, म्हणजेच २७ सप्टेंबर २०२६ आहे. ज्या पात्र उमेदवारांनी अजूनपर्यंत अर्ज केलेला नाही, त्यांनी वेळ न घालवता अधिकृत GOAPS पोर्टलवर जाऊन आपली अर्ज प्रक्रिया तातडीने पूर्ण करावी असं सांगण्यात आलं आहे.

ही परीक्षा देशपातळीवर घेतली जाते. याचं आयोजन नॅशनल कोऑर्डिनेशन बोर्ड (NCB), उच्च शिक्षण विभाग, शिक्षण मंत्रालय, भारत सरकार यांच्या मार्गदर्शनाखाली IISc आणि सर्व IIT मिळून करतात. २०२७ च्या परीक्षेची मुख्य जबाबदारी यावेळी IIT मद्रासकडे आहे.

जे विद्यार्थी उद्याच्या, म्हणजेच २७ सप्टेंबरच्या मुदतीत अर्ज करू शकणार नाहीत, त्यांच्यासाठी विलंब शुल्कासह अर्ज भरण्याची वाढीव मुदत ५ ऑक्टोबर २०२६ पर्यंत ठेवण्यात आली आहे. ऑनलाइन अर्जासाठी उमेदवारांना https://goaps.iitm.ac.in/login या अधिकृत वेबसाइटवर जाऊन डिजीलॉकरच्या मदतीने पडताळणी करत नवीन नोंदणी करावी लागेल. त्यानंतर वैयक्तिक माहिती, शैक्षणिक तपशील, पेपरची निवड आणि परीक्षा शहर भरून फोटो, स्वाक्षरी व आवश्यक कागदपत्रं अपलोड करावी लागतील. शेवटी ऑनलाइन फी भरून अर्ज सबमिट करता येईल.

या परीक्षेसाठी कोणतीही कमाल वयोमर्यादा ठेवलेली नाही. अभियांत्रिकी, तंत्रज्ञान, वास्तुकला, विज्ञान, वाणिज्य किंवा कला शाखेतून पदवी पूर्ण केलेले किंवा सध्या तिसऱ्या किंवा चौथ्या वर्षात शिकत असलेले विद्यार्थी यासाठी पात्र ठरतात. नियमांनुसार उपलब्ध असलेल्या ३० विषयांपैकी एक किंवा दोन विषय निवडून विद्यार्थी परीक्षा देऊ शकतात.

नियमित मुदतीत अर्ज करणाऱ्या महिला, एससी, एसटी आणि दिव्यांग उमेदवारांकडून प्रति पेपर १,००० रुपये शुल्क घेतलं जाणार आहे. याउलट सामान्य, ओबीसी आणि ईडब्ल्यूएस या प्रवर्गातील इतर सर्व उमेदवारांना प्रति पेपर २,००० रुपये भरावे लागतील.

परीक्षेच्या पॅटर्नबद्दल सांगायचं झालं, तर GATE 2027 साठी विद्यार्थ्यांना पेपर सोडवायला ३ तासांचा वेळ मिळेल आणि संपूर्ण पेपर १०० गुणांचा असेल. यातील १५ गुण जनरल अ‍ॅप्टिट्यूडसाठी असतील, तर उरलेले ८५ गुण विद्यार्थ्याने निवडलेल्या विषयावर आधारित असतील. प्रश्नपत्रिकेत बहुपर्यायी प्रश्न (MCQ), बहु-निवडक प्रश्न (MSQ) आणि न्यूमेरिकल आन्सर टाईप (NAT) असे तीन प्रकारचे प्रश्न विचारले जातात.

MCQ प्रकारच्या प्रश्नांमध्ये चुकीचं उत्तर दिल्यास गुण कापले जातात. १ गुणाच्या प्रश्नाचं उत्तर चुकल्यास एक तृतीयांश गुण वजा होतो, तर २ गुणांच्या प्रश्नाचं उत्तर चुकल्यास दोन तृतीयांश गुण कापले जातात. मात्र MSQ आणि NAT प्रकारच्या प्रश्नांसाठी अशी निगेटिव्ह मार्किंग पद्धत लागू नाही. ही संपूर्ण परीक्षा फक्त इंग्रजी भाषेतच घेतली जाते.