गणेशोत्सवात राज्यभर पावसाचा जोर, 30 जिल्ह्यांना हवामान खात्याचा इशारा

राज्यात मान्सून पुन्हा एकदा जोर धरू लागला आहे. हवामान खात्याने पुढच्या दोन-तीन दिवसांसाठी राज्यातल्या वेगवेगळ्या भागांत पावसाचा अंदाज दिला असून, 12 आणि 13 सप्टेंबरला अनेक ठिकाणी मुसळधार ते मध्यम पाऊस पडण्याची शक्यता वर्तवली आहे. त्यामुळे नागरिकांनी सतर्क राहावं, असं आवाहन प्रशासनाकडून करण्यात आलं आहे.

12 सप्टेंबरला उत्तर कोकण, उत्तर मध्य महाराष्ट्र आणि मराठवाड्यात बहुतांश भागांत मध्यम पाऊस आणि वादळी वारा वाहण्याची शक्यता हवामान खात्याने वर्तवली आहे. दक्षिण मध्य महाराष्ट्र आणि दक्षिण कोकण-गोवा पट्ट्यातही हलका ते मध्यम पाऊस पडू शकतो. याच पार्श्वभूमीवर राज्यातल्या 30 जिल्ह्यांना यलो अलर्ट जाहीर करण्यात आला आहे.

यलो अलर्ट दिलेल्या जिल्ह्यांमध्ये पालघर, ठाणे, मुंबई, रायगड, धुळे, नंदुरबार, जळगाव, नाशिक आणि नाशिकचा घाट परिसर, अहिल्यानगर, पुणे आणि पुण्याचा घाट परिसर, सोलापूर, छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव, अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या जिल्ह्यांचा समावेश आहे.

13 सप्टेंबरला पावसाचा जोर आणखी वाढण्याची शक्यता आहे. कोकण-गोवा, उत्तर मध्य महाराष्ट्र आणि मराठवाड्यातल्या बहुतांश भागांत मध्यम ते वादळी पाऊस पडू शकतो, तर दक्षिण मध्य महाराष्ट्रातही हलक्या ते मध्यम पावसाचा अंदाज आहे. या दिवशी काही जिल्ह्यांना ऑरेंज अलर्ट तर काहींना यलो अलर्ट देण्यात आला आहे.

धुळे, नंदुरबार आणि नाशिकचा घाट परिसर या भागांना 13 सप्टेंबरसाठी ऑरेंज अलर्ट देण्यात आला आहे. तर पालघर, ठाणे, रायगड, मुंबई, रत्नागिरी, जळगाव, नाशिक, अहिल्यानगर, पुणे आणि पुण्याचा घाट परिसर, सातारा आणि साताऱ्याचा घाट परिसर, छत्रपती संभाजीनगर, जालना, परभणी, बीड, हिंगोली, अकोला, अमरावती या जिल्ह्यांना यलो अलर्ट देण्यात आला आहे.

वादळी वाऱ्यासह पडणाऱ्या पावसामुळे शेतीचं नुकसान होण्याची भीती व्यक्त करण्यात येत आहे. तसंच सखल भागांत पाणी साचण्याची शक्यता असल्याने शेतकऱ्यांनी आणि नागरिकांनी काळजी घ्यावी, नदीकाठच्या वस्त्यांमधल्या लोकांनी सतर्क राहावं आणि प्रशासनाच्या सूचनांचं पालन करावं, असं आवाहन करण्यात आलं आहे.

14 सप्टेंबरला मात्र पावसाचा जोर काहीसा कमी होण्याची शक्यता असून, नाशिकचा घाट परिसर, पुण्याचा घाट परिसर, पुणे, अहिल्यानगर आणि रत्नागिरी या जिल्ह्यांपुरताच यलो अलर्ट मर्यादित राहू शकतो.

या पार्श्वभूमीवर विजांचा कडकडाट होत असताना झाडाखाली उभं राहणं टाळावं, सुरक्षित ठिकाणी आश्रय घ्यावा आणि शेतकऱ्यांनी शेतीची कामं करताना योग्य ती खबरदारी बाळगावी, असं आवाहन आपत्ती व्यवस्थापन प्राधिकरणाकडून वारंवार केलं जात आहे.