गणेश मंडपांमधून 'लोकसंवाद २०२६': भक्तीसोबत सरकारी योजनांची थेट माहिती

गणेशोत्सवाच्या निमित्ताने मुंबई उपनगरातील गणेश मंडपे ही केवळ दर्शनाची ठिकाणे न राहता सरकारी योजनांची माहिती देणारी केंद्रे बनली आहेत. माहिती व जनसंपर्क विभागाने 'लोकसंवाद २०२६' या नावाने राबवलेल्या या उपक्रमाला उपनगरातील नागरिकांकडून उत्स्फूर्त प्रतिसाद मिळत आहे. गणेश मंडळांना भेट देण्यासाठी परिसरातील नागरिकांची मोठी गर्दी होते, हे लक्षात घेऊनच प्रशासनाने या मंडपांचा वापर लोककल्याणकारी योजनांची माहिती पोहोचवण्यासाठी करण्याचे ठरवले. त्यामुळे गणपती बाप्पाचे दर्शन घेतानाच नागरिकांना शासनाच्या विविध योजना आणि सेवांची माहिती एकाच ठिकाणी मिळू लागली आहे.

या उपक्रमात फक्त योजनांची जुजबी माहिती न देता, संबंधित योजनेसाठी पात्रता काय आहे, अर्ज कुठे आणि कसा करायचा, कोणती कागदपत्रे लागतात, कोणत्या सरकारी कार्यालयात संपर्क साधायचा आणि उपलब्ध सुविधांचा लाभ कसा घ्यायचा, याबाबत नागरिकांना प्रत्यक्ष समोरासमोर मार्गदर्शन करण्यात आले. यामुळे सरकारी योजना आणि सर्वसामान्य नागरिक यांच्यातील माहितीचे अंतर कमी होण्यास मदत होत असल्याचे सांगण्यात आले.

युवक, विद्यार्थी, दिव्यांग आणि ज्येष्ठ नागरिकांसाठी असलेल्या विविध सरकारी सेवा-सुविधांचीही यावेळी माहिती देण्यात आली. रोजगाराच्या शोधात असलेल्या तरुणांना कौशल्य विकास, रोजगार आणि उद्योजकतेच्या संधींबाबत मार्गदर्शन करत या संधींचा लाभ घेण्याचे आवाहन करण्यात आले.

'लोकसंवाद २०२६' प्रभावीपणे राबवण्यासाठी माहिती व जनसंपर्क महासंचालनालयासोबतच समाजकल्याण विभाग, कौशल्य विकास, रोजगार व उद्योजकता विभाग आणि महसूल विभाग यांनी एकत्रितपणे सहभाग घेतला. विभागीय संपर्क अधिकारी ब्रिजकिशोर झंवर आणि संजय ओरके यांनी विविध गणेश मंडळांना प्रत्यक्ष भेटी देऊन या उपक्रमाचे समन्वयन केले.

ग्राम महसूल अधिकारी घोषिता गोसावी, समाजकल्याण कार्यालयाच्या अतिरिक्त प्रकल्प अधिकारी नंदना गजभिये, तालुका समन्वयक आनंदा कांबळे, समतादूत सिद्धार्थ शिरसाट आणि जिल्हा कौशल्य विकास, रोजगार व उद्योजकता मार्गदर्शन केंद्राचे जिल्हा समन्वयक परेश अपंडकर यांनी नागरिकांशी थेट संवाद साधला.

मुंबई उपनगर जिल्हाधिकारी सौरभ कटियार आणि जिल्हा नियोजन अधिकारी प्रशांत भामरे यांच्या सहकार्यामुळे मुंबई उपनगर जिल्ह्यात या उपक्रमाला मोठे स्वरूप मिळाले. गणेशोत्सवातील लोकसहभागाचा सकारात्मक वापर करत सरकारी योजना, सेवा आणि सुविधांची माहिती थेट नागरिकांपर्यंत पोहोचवण्याचे हे काम प्रभावी ठरत असल्याचे सांगण्यात आले.

या उपक्रमात इंदिरानगरच्या राजा महागणपती सार्वजनिक गणेशोत्सव मंडळाचे अध्यक्ष अरुण देवेंद्र, खजिनदार मंगेश कोणार आणि सचिव विनय कडतल सहभागी झाले. तसेच शास्त्रीनगर, वांद्रे पूर्व येथील राजा शास्त्रीनगर सार्वजनिक गणेशोत्सव मंडळाचे अध्यक्ष संतोष गाडे, खजिनदार सुदर्शन कोंडा आणि सचिव बाबू वेमुला यांनीही यात भाग घेतला. शासकीय वसाहत, वांद्रे पूर्व येथील सार्वजनिक श्री गणेशोत्सव मंडळाचे अध्यक्ष राजेश जाधव, उपाध्यक्ष निलेश जाधव, सरचिटणीस एकनाथ जाधव, खजिनदार दशरथ नाईक आणि सहखजिनदार रत्ना नाईक यांनीही सहभाग नोंदवला. गणेशोत्सवातील भक्तीच्या वातावरणाला लोककल्याणकारी योजनांच्या जनजागृतीची जोड देत 'लोकसंवाद २०२६'ने गणेश मंडपांना संवाद, माहिती आणि मार्गदर्शनाची केंद्रे बनवले आहे.