गांधीटोल्यात शेतात सापडला अजगर; आरआरटी टीम आणि सर्पमित्रांच्या तत्परतेमुळे अनर्थ टळला

सालेकसा, १७ ऑक्टोबर : सालेकसा तालुक्यातील गांधीटोला या गावात शुक्रवारी (१७ ऑक्टोबर) सायंकाळी एका शेतात भलामोठा अजगर आढळून आला. अजगर दिसताच आजूबाजूच्या परिसरात काही वेळ भीतीचे वातावरण निर्माण झाले होते. मात्र आरआरटी (RRT) टीम आणि सर्पमित्रांनी वेळीच तत्परता दाखवली. त्यामुळे अजगराला सुखरूप जेरबंद करण्यात यश आले आणि संभाव्य धोका टळला.

हा अजगर गांधीटोला येथील पंचायत समिती सदस्य सौ. रेखाताई टेकचंद्र फुंडे यांच्या शेतात निदर्शनास आला. घटनेचे गांभीर्य लक्षात घेऊन टेकचंद्रजी फुंडे यांनी लगेच आरआरटी टीमचे सदस्य रघुनाथ भुते यांना फोनवरून याची माहिती दिली.

माहिती मिळताच रघुनाथ भुते यांनी वनविभागाच्या वरिष्ठ अधिकाऱ्यांच्या मार्गदर्शनाखाली सर्पमित्र राजेंद्र भोयर आणि अमर लिल्हारे यांच्यासह घटनास्थळी धाव घेतली. या तिघांनी शर्थीचे प्रयत्न करून शेतात लपलेल्या अजगराला अत्यंत सुरक्षितपणे पकडले.

वेळेवर मिळालेल्या या मदतीबद्दल तेथे उपस्थित असलेल्या गावकऱ्यांनी आरआरटी टीम आणि सर्पमित्रांचे मनापासून आभार मानले. आरआरटी टीम आणि सर्पमित्रांनी दाखवलेल्या तत्परतेमुळे या घटनेत मोठा अनर्थ टळला.