दादरच्या कोहिनूर स्क्वेअरमधील 'एशियन किचन' हॉटेलच्या किचनला आग, जीवितहानी नाही

मुंबईतील दादर पश्चिम भागात असलेल्या कोहिनूर स्क्वेअर इमारतीत एका हॉटेलच्या किचनला अचानक आग लागली. हे हॉटेल 'एशियन किचन' असून आग त्याच्या किचनमध्येच लागली होती. सुदैवाने हॉटेल बंद असल्यामुळे मोठा अनर्थ टळला आणि कोणतीही जीवितहानी झाली नाही. या दुर्घटनेत कोणालाही दुखापतही झालेली नाही.

आगीची माहिती सकाळी 09.18 वाजता मुंबई अग्निशमन दलाला मिळाली. त्यानंतर 9.25 वाजता ही आग 'लेव्हल-1' प्रकारची असल्याचे सांगण्यात आले. दादर पश्चिममध्ये शिवसेना भवनासमोर असलेल्या 50 मजली कोहिनूर स्क्वेअर इमारतीच्या पहिल्या मजल्याला ही आग लागली होती.

आग लागल्याचे कळताच अग्निशमन दलाच्या 5 ते 6 गाड्या घटनास्थळी पोहोचल्या. आगीवर नियंत्रण मिळवण्यासाठी अग्निशमन दलाच्या जवानांचे शर्थीचे प्रयत्न सुरू होते. ही आग सकाळच्या वेळी लागल्यामुळे कोहिनूर मॉलमध्ये जास्त गर्दी नव्हती. त्यामुळे आगीवर नियंत्रण मिळवण्यात यश आले.

अग्निशमन दलाबरोबरच मुंबई पोलीस, बेस्ट (BEST), सार्वजनिक बांधकाम विभाग (PWD), आरोग्य अधिकारी आणि रुग्णवाहिका घटनास्थळी लगेच दाखल झाल्या. या सगळ्यांनी मिळून परिस्थितीवर नियंत्रण मिळवले. पोलीस घटनास्थळी पोहोचल्यानंतर इमारतीत असलेल्या नागरिकांना आणि कर्मचाऱ्यांना बाहेर काढण्यात आले.

अग्निशमन दलाचे जवान आणि पालिकेचे कामगार यांनी बचावकार्य केले. शॉर्ट सर्किटमुळे आग लागली असण्याची शक्यता वर्तवण्यात आली आहे. आगीचे नेमके कारण काय, याबद्दल एवढीच शक्यता सांगण्यात आली आहे.

दरम्यान, कोहिनूर मॉलमध्ये फायर सिस्टम बसवण्यात आली होती की नाही, असा प्रश्न आता उपस्थित केला जात आहे. हॉटेल बंद होते आणि सकाळची वेळ असल्याने फार गर्दी नव्हती, त्यामुळे या घटनेत कोणालाही इजा झाली नाही, हेच सध्या दिलासादायक आहे.