विसर्जनाच्या दिवशी पावसाचा जोर; राज्यातील 21 जिल्ह्यांना यलो-ऑरेंज अलर्ट

गणपती बाप्पाच्या विसर्जनाच्या दिवशी म्हणजे 25 सप्टेंबरला महाराष्ट्रात पावसाचा जोर आणखी वाढण्याची शक्यता आहे. बंगालच्या उपसागरात तयार झालेल्या कमी दाबाच्या पट्ट्यामुळे राज्यातल्या हवामानात मोठा बदल जाणवतोय. हवामान खात्याने राज्यातल्या 18 जिल्ह्यांना यलो अलर्ट दिला असून 3 जिल्ह्यांना ऑरेंज अलर्ट दिला आहे. त्यामुळे अनंत चतुर्दशीला गणपती विसर्जनाच्या मिरवणुकीत लोकांना पाऊस आणि वादळी वाऱ्याचा सामना करावा लागू शकतो.

कोकणातल्या पालघर, ठाणे, मुंबई, रायगड, रत्नागिरी आणि सिंधुदुर्ग या जिल्ह्यांत पावसाने थोडी उघडीप घेतली असली तरी काही ठिकाणी हलक्या ते मध्यम सरी पडण्याची शक्यता कायम आहे. विसर्जनाच्या वेळी अचानक पाऊस सुरू होऊ शकतो, त्यामुळे लोकांनी काळजी घ्यावी असं आवाहन करण्यात आलंय.

उत्तर महाराष्ट्रात धुळे, नंदुरबार, जळगाव आणि नाशिक इथे काही भागांत वातावरण कोरडं राहू शकतं, पण काही ठिकाणी हलक्या ते मध्यम सरींसोबत जोरदार पाऊस पडण्याची शक्यता आहे. जळगावला यलो अलर्ट देण्यात आला असून तिथे ताशी 40 ते 50 किलोमीटर वेगाने वारे वाहू शकतात, सोबत मेघगर्जनेसह वादळी पाऊसही येऊ शकतो. जळगावमधलं हे यलो अलर्ट पुढच्या दिवशीही कायम राहण्याची शक्यता आहे.

मध्य महाराष्ट्रातही पावसाचा अंदाज आहे. पुणे शहर, पुणे घाटमाथा आणि सातारा परिसरात हलक्या ते मध्यम सरी पडू शकतात, पण या भागांसाठी सध्या कुठलाही अलर्ट दिलेला नाही. कोल्हापूर आणि सांगलीतही काही ठिकाणी हलका ते मध्यम पाऊस होऊ शकतो. सोलापूरला मात्र यलो अलर्ट दिला असून तिथे ताशी 40 ते 50 किलोमीटर वेगाने वाऱ्यासह जोरदार पावसाची शक्यता वर्तवली आहे.

मराठवाड्यातही पावसाचा जोर कायम राहणार आहे. छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव या जिल्ह्यांत काही ठिकाणी मेघगर्जना आणि विजांच्या कडकडाटासह मध्यम ते जोरदार पाऊस पडू शकतो. इथेही ताशी 40 ते 50 किलोमीटर वेगाने वारे वाहण्याची शक्यता असून पुढचे 1 ते 2 दिवस हीच परिस्थिती राहू शकते.

सगळ्यात जास्त पावसाचा अंदाज विदर्भात आहे. अकोला, अमरावती, बुलढाणा, गडचिरोली, नागपूर, वर्धा, वाशिम आणि यवतमाळसह अनेक जिल्ह्यांत पाऊस पडण्याची शक्यता आहे. भंडारा, चंद्रपूर आणि गोंदिया या 3 जिल्ह्यांना ऑरेंज अलर्ट दिलाय. इथे ताशी 40 ते 50 किलोमीटर वेगाने वारे, मेघगर्जना आणि जोरदार ते मुसळधार पाऊस पडण्याचा अंदाज आहे.

थोडक्यात, अनंत चतुर्दशीच्या दिवशी राज्यातल्या 18 जिल्ह्यांना यलो आणि 3 जिल्ह्यांना ऑरेंज अलर्ट देण्यात आला आहे. पुढचे 1 ते 2 दिवस राज्याच्या अनेक भागांत पावसाचा जोर कायम राहण्याची शक्यता असून त्यानंतर हवामानात पुन्हा बदल होऊ शकतो. गणपती विसर्जनाच्या मिरवणुका आणि कार्यक्रमांच्या पार्श्वभूमीवर नागरिकांनी स्थानिक हवामानाचा अंदाज लक्षात घेऊन सुरक्षिततेची काळजी घ्यावी.