गाडीत बसताच उलटी अन् मळमळ होते? मोशन सिकनेसपासून सुटका मिळवण्यासाठी प्रवासाला निघण्यापूर्वी बॅगेत नक्की ठेवा

फिरायला जायला अनेकांना आवडतं, पण काहींना कार किंवा गाडीत बसलं की त्रास होतो. गाडीत बसताच काहींना मोशन सिकनेसचा त्रास सुरु होतो आणि गाडी सुरु होताच उलटी, मळमळ आणि अस्वस्थ वाटायला लागतं. फिरायला जाणं तसं सगळ्यांनाच आवडत असलं तरी काहींसाठी हा प्रवास मात्र त्रासदायक ठरतो.

मोशन सिकनेस का होतो याचं सायन्स तसं साधं आहे. आपले डोळे सांगत असतात की आपण एका जागी बसलेले आहोत, पण त्याचवेळी कानांना गाडीची हालचाल जाणवत असते. यामुळे मेंदूला मिक्स सिग्नल पोहचतात आणि हेच कारण असतं की गाडीत बसताच आणि गाडी सुरु होताच माणसाला मोशन सिकनेसचा त्रास जाणवायला लागतो. डोळे आणि कान यांच्याकडून मेंदूला वेगवेगळी माहिती मिळत असल्याने ही गडबड होते.

सहलीला जाताना किंवा गाडीत फिरताना हा त्रास होत असेल तर काही गोष्टी बॅगेत ठेवल्यास प्रवासात आराम मिळू शकतो. या गोष्टींचं सेवन केल्यास मोशन सिकनेसचा त्रास कमी होण्यास मदत होते. या गोष्टी अगदी सहज उपलब्ध होणाऱ्या आणि वापरायला सोप्या आहेत.

यातली पहिली गोष्ट म्हणजे आल्याची गोळी. आले नैसर्गिकरित्या मळमळ दूर करण्यास मदत करतं. यात जिंजरोल असतं, जे पोटाच्या स्नायूंना शांत करतं. यामुळे पचनसंस्था सुधारायलाही मदत होते. प्रवासादरम्यान किंवा प्रवासाआधी आल्याच्या गोळ्या खाल्ल्यास मोशन सिकनेसचा त्रास होत नाही. प्रवासात त्रास जाणवू लागल्यास तोंडात गोळी टाकून हळूहळू चघळत राहावं.

दुसरी गोष्ट म्हणजे पुदिन्याचं तेल. पुदिन्याचा सुगंध मनाला शांत करतो आणि ताजंतवानं वाटायला लागतं. यामुळे पोटातले पेटकेही कमी व्हायला मदत होते. पेपरमिंट ऑईल म्हणजेच पुदिन्याचं तेल बाजारात सहज मिळतं. प्रवासात उलटी, अस्वस्थता किंवा मळमळ वाटायला लागल्यास हे तेल रुमालावर टाकून त्याचा सुगंध घेत राहावं. हा उपाय करायला सोपा आणि लगेच परिणाम देणारा आहे.

तिसरी गोष्ट म्हणजे लिंबू आणि काळे मीठ. अस्वस्थता दूर करण्यासाठी लिंबू खूप मदत करतं. लिंबू आणि काळे मीठ हा त्रास लवकर दूर करण्यास मदत करतात. यासाठी सहलीदरम्यान किंवा प्रवासादरम्यान बॅगेत लिंबाची फोड आणि काळे मीठ घेऊन जावं. मोशन सिकनेसचा त्रास सतावू लागल्यास लिंबाच्या फोडीवर काळे मीठ लावून खावं.

याशिवाय, मोशन सिकनेसचा त्रास असणाऱ्यांनी नेहमी खिडकीच्या बाजूला बसणं पसंत करावं. तसंच एसी बंद करुन खिडकीतून येणाऱ्या मोकळ्या हवेचा आनंद घ्यावा. या छोट्या छोट्या काळजीमुळे प्रवासात होणारा त्रास बऱ्याच अंशी कमी होऊ शकतो आणि प्रवास सुखकर होतो.