स्टिअरिंग जाम झाल्याने बस उलटली; अपघातात 7 प्रवासी गंभीर, 31 जणांना किरकोळ दुखापत

गडचिरोली बसस्थानकावरून चामोर्शीकडे निघालेली बस शुक्रवारी दुपारच्या सुमारास शिवनी येथील नवीन पुलाजवळ अचानक उलटली. बसचे स्टिअरिंग जाम झाल्यामुळे हा अपघात घडला. या अपघातात एकूण 38 प्रवासी जखमी झाले असून त्यापैकी 7 जणांना गंभीर तर 31 जणांना किरकोळ दुखापत झाली. सुदैवाने या अपघातात कोणाचाही जीव गेला नाही.

गडचिरोली डेपोतून सुटलेली एमएच-०६-८८४८ क्रमांकाची ही बस चामोर्शी मार्गाने जात असताना शिवनी येथील नवीन पुलाजवळ नियंत्रण सुटून पलटी झाली. गडचिरोली बसस्थानकातून निघालेली ही बस नियमित मार्गावर चामोर्शीच्या दिशेने जात होती. अपघाताची माहिती मिळताच घटनास्थळी तातडीने 10 अॅम्बुलन्स आणि चार पोलीस वाहने पोहोचली. जखमी झालेल्या सर्व प्रवाशांना तातडीने जिल्हा सामान्य रुग्णालयात दाखल करण्यात आले असून सध्या त्यांच्यावर जिल्हा रुग्णालयात उपचार सुरू आहेत. गंभीर जखमी झालेल्या 7 प्रवाशांची प्रकृती डॉक्टरांच्या देखरेखीखाली असून किरकोळ दुखापत झालेल्या 31 प्रवाशांवरही उपचार सुरू आहेत.

या प्रकरणाची नोंद गडचिरोली पोलीस स्टेशनमध्ये करण्यात आली. घटनास्थळी तसेच जिल्हा सामान्य रुग्णालयात अप्पर पोलीस अधीक्षक गोकुळराज आणि सहाय्यक पोलीस अधीक्षक अनिकेत हिरडे यांनी भेट देऊन जखमी प्रवाशांची विचारपूस केली. या घटनेचा पुढील तपास पोलीस निरीक्षक विनोद चव्हाण यांच्या मार्गदर्शनाखाली सुरू आहे.

सहपालकमंत्री अॅड. आशिष जयस्वाल यांनी जखमी प्रवाशांच्या प्रकृतीची माहिती जिल्हा शल्य चिकित्सक डॉ. रवी गावंडे यांच्याकडून घेतली. जखमींवर योग्य उपचार करून त्यांच्या प्रकृतीवर सातत्याने लक्ष ठेवण्याच्या सूचना त्यांनी यावेळी दिल्या. रुग्णालय प्रशासनाला जखमींची योग्य ती काळजी घेण्याचे निर्देशही देण्यात आले.

दरम्यान, याआधी बारामती तालुक्यातील सुपे घाटातही बुधवारी, म्हणजेच 16 तारखेला सकाळी एक बस अपघात झाला होता. विद्या प्रतिष्ठान इंग्लिश मीडियम स्कूलच्या विद्यार्थ्यांना घेऊन जाणारी एसटी बस घाटातील पहिल्या वळणावर नियंत्रण सुटल्याने पलटी झाली होती. या बसमध्ये सुमारे 60 ते 70 विद्यार्थी-विद्यार्थिनी प्रवास करत होते. या अपघातात चार विद्यार्थी जखमी झाले असून त्यांना तातडीने लोणी काळभोर येथील विश्वराज हॉस्पिटलमध्ये दाखल करण्यात आले होते.