तरुणीच्या आत्महत्येप्रकरणी गडचिरोलीत दोन पोलीस शिपायांना अटक

गडचिरोली जिल्ह्यातील एका तरुणीच्या आत्महत्येच्या प्रकरणात कुरखेडा पोलिसांनी गुरुवारी दोन पोलीस शिपायांना अटक केली. तरुणीने ७ सप्टेंबरला आपल्या घरी गळफास लावून आत्महत्या केली होती. त्यानंतर ५२ दिवसांनी या प्रकरणाचा उलगडा झाला आहे.

अटक करण्यात आलेल्या आरोपींची नावे शिवकुमार छोटेलाल करसायल (वय २८, रा. टेमली, ता. कोरची) आणि अश्विनी राऊत (वय २६, रा. बोडधा, ता. देसाईगंज) अशी आहेत. हे दोघेही पोलीस शिपाई आहेत. तरुणीच्या आत्महत्येस कारणीभूत असल्याच्या आरोपाखाली त्यांच्यावर गुन्हा दाखल करून त्यांना अटक करण्यात आली आहे.

तरुणीने आत्महत्येपूर्वी लिहून ठेवलेली चिठ्ठी आणि तिच्या आईने पोलीस स्टेशनमध्ये केलेली तक्रार, या दोन गोष्टींच्या आधारे तपास पुढे गेला. आईने तक्रारीत आत्महत्येमागची कारणे नमूद करून संबंधितांवर कारवाई करण्याची मागणी केली होती. कुरखेडा पोलिसांनी संपूर्ण घटनाक्रमाची सत्यता तपासली आणि त्यानंतर दोघांना अटक केली.

तरुणी कुरखेडा पोलीस स्टेशनच्या हद्दीतील एका गावची होती. पोलीस भरतीचे स्वप्न उराशी बाळगून तिने गेल्या वर्षी जिल्हा मुख्यालय असलेल्या गडचिरोलीत सराव सुरू केला होता. तिथे ती भाड्याच्या खोलीत राहत होती. इन्स्टाग्रामवर तिची शिवकुमार करसायल याच्याशी ओळख झाली.

शिवकुमारही पोलीस भरतीची तयारी करत होता. मैदानावर रोज भेटत असल्याने दोघांची जवळीक वाढली आणि ते प्रेमात पडले. पुढे पोलीस भरतीत शिवकुमारची निवड झाली, पण तरुणीची निवड झाली नाही. त्यामुळे ती आपल्या गावी परतली. तरीही दोघांमधले प्रेमसंबंध कायम होते. पुढे आपलीही भरतीत निवड होईल आणि शिवकुमारशी लग्न होईल, अशी आशा ती बाळगून होती.

दरम्यान, शिवकुमारची ओळख गडचिरोली पोलीस ठाण्यात कार्यरत असलेल्या महिला पोलीस शिपाई अश्विनी राऊत हिच्याशी झाली. त्यानंतर तो तरुणीपासून दूर जाऊ लागला, असे प्रकरणात समोर आले आहे. त्याने लग्नास नकार दिल्यानंतर तरुणी नैराश्येत गेली.

त्यातच अश्विनी राऊत हिने तरुणीला फोन करून अपमानास्पद भाषेत तिची खरडपट्टी काढली, असेही सांगण्यात आले. त्यामुळे ती पूर्णपणे खचली. ज्याच्यावर प्रेम केले, त्यानेच दगा दिल्याने ती नैराश्येत होती आणि ७ सप्टेंबरला तिने घरी आत्महत्या केली.

पोलीस भरतीच्या तयारीत जुळलेली ओळख, त्यातून झालेले प्रेम आणि लग्न करण्याचा घेतलेला निर्णय, इथपासून या प्रकरणाची सुरुवात झाली होती. आता दोन्ही आरोपींवर गुन्हा दाखल असून ते अटकेत आहेत आणि कुरखेडा पोलीस पुढील तपास करत आहेत.