नागपुरात आईसमोर मुलाची मान पिळून घरात लूट; पाच आरोपी पोलिसांच्या ताब्यात

नागपूर : गिट्टीखदान पोलीस स्टेशनच्या हद्दीतील नेताजी को-ऑपरेटिव्ह सोसायटीत एका घरात घुसून लूटमार झाली. प्लास्टिकची गन आणि चाकू दाखवून आलेल्या आरोपींनी एका मुलाची त्याच्या आईसमोरच मान पिळली, असे समोर आले आहे. या प्रकारामुळे सोसायटीच्या परिसरात भीतीचे वातावरण आहे. पोलिसांनी अल्पवयीन आरोपीसह पाच जणांना ताब्यात घेतले आहे.

सौम्या पालुरू या २३ ऑक्टोबरच्या रात्री कुटुंबासह घरात झोपल्या होत्या. रात्री साडेबाराच्या सुमारास चार ते पाच जण त्यांच्या घरात शिरले. प्लास्टिकची गन आणि चाकू दाखवून त्यांनी सौम्या आणि घरच्यांना धमकावले. अंगावर धावून जात असल्यासारखा पवित्रा घेत त्यांनी दागिने आणि रोकड देण्यास सांगितले. सौम्या आणि त्यांच्या कुटुंबीयांना ताब्यात ठेवून आरोपी कपाटात शोधाशोध करू लागले.

त्याच वेळी सौम्या यांचा १४ वर्षांचा मुलगा तिथे आला. आरोपींना पाहताच तो घाबरला आणि ओरडू लागला. तेव्हा एका आरोपीने त्याची मान पिळली. वेदनेने मुलगा विव्हळू लागला. नख लागल्यामुळे त्याच्या मानेवर जखमही झाली. त्यानंतर आरोपी सौम्या यांच्या गळ्यातली चेन ओढू लागले. सौम्या आणि त्यांचा मुलगा आरडाओरडा करत राहिले. शेवटी आरोपी दोन मोबाइल हिसकावून पळून गेले. सौम्या यांनी पोलिसांना घटनेची माहिती दिली आणि गिट्टीखदान पोलीस घटनास्थळी पोहोचले.

पोलिसांनी सीसीटीव्हीच्या आधारे तपास सुरू केला. तपासात असे दिसून आले की, अटक करण्यात आलेला आरोपी सुमित राजकुमार सोमकुंवर हा सौम्या यांच्या पतीच्या गडचिरोली येथील कार्यालयात काम करून गेला होता. पोलिसांच्या म्हणण्यानुसार, सौम्या यांच्याकडे कार्यालयाशी संबंधित कोट्यवधी रुपयांची रोकड नेहमी असते, हे त्याला माहीत होते. ही माहिती त्याने साथीदारांना सांगितली आणि त्यांनी कथित रीत्या दरोड्याचा कट रचला. पती घरी नाहीत, हे कळल्यावर आरोपींनी हा गुन्हा केला, असे पोलिसांनी सांगितले. महिलेच्या पतीच्या कार्यालयातील कर्मचाऱ्याने दिलेल्या टिपवरून हा प्रकार घडला, असेही सांगितले जाते.

अटक केलेल्या आरोपींची नावे अशी : सुमित राजकुमार सोमकुंवर (३२), आकाश संजय मेश्राम (३१), पियुष धनराज गोस्वामी (२०), निखिल प्रफुल्ल दुबे (२०) आणि भूषण संजय अलोणे (१९). हे सर्व आरोपी नागपूर आणि वाडी परिसरात राहणारे असल्याचे सांगण्यात आले. पोलिसांच्या माहितीनुसार, निखिल दुबे हा तडीपार आरोपी आहे. याशिवाय भुऱ्या पठाण, तोहिद खान आणि इल्लू या नावांच्या आरोपींचा शोध सुरू आहे.