ST च्या सवलतीच्या तिकिटासाठी आता NCMC कार्ड सक्तीचे, 1 ऑक्टोबरपासून नियम लागू
ज्येष्ठ नागरिक आणि महिला प्रवाशांना एसटीच्या सवलतीच्या तिकिटासाठी NCMC कार्ड बंधनकारक करण्यात आले असून, त्याची नोंदणी वेळेत करून घेण्याचे आवाहन महामंडळाने केले आहे.
एसटीने प्रवास करणाऱ्या ज्येष्ठ नागरिक आणि महिला प्रवाशांसाठी महत्त्वाची बातमी आहे. महाराष्ट्र राज्य मार्ग परिवहन महामंडळाने (MSRTC) सवलतीच्या तिकिटासाठी NCMC कार्ड 1 ऑक्टोबर 2026 पासून सक्तीचे केले आहे. अमृत ज्येष्ठ नागरिक, ज्येष्ठ नागरिक आणि महिला प्रवासी या सगळ्यांना ही अट लागू असेल.
सवलतीचे तिकीट देताना यापुढे NCMC कार्ड वापरायचे, असा निर्णय एसटी महामंडळाने घेतला आहे. त्यासाठी राज्यभरातल्या आगार आणि बसस्थानकांवर कार्ड नोंदणी आणि वाटपाचे काम आधीच सुरू झाले आहे.
सरकारच्या सूचनेनुसार एसटी काही ठराविक प्रवासी घटकांना सवलतीच्या दरात प्रवासाची सोय देते. यात अमृत ज्येष्ठ नागरिक, ज्येष्ठ नागरिक आणि महिला प्रवाशांचा समावेश होतो. ही सवलत आता जास्त सोपी आणि डिजिटल पद्धतीने चालावी म्हणून NCMC कार्ड प्रणाली वापरली जात आहे.
1 ऑक्टोबरपासून सवलतीचे तिकीट फक्त NCMC कार्डवरूनच दिले जाणार आहे. त्यामुळे ज्येष्ठ नागरिक आणि सवलतधारक महिलांनी त्याआधीच कार्डची नोंदणी करून घ्यायला हवी. ज्यांच्याकडे आधीच सुरू असलेले (Active) NCMC कार्ड आहे किंवा नोंदणी झाल्याची QR कोड असलेली पावती आहे, त्यांनाच सवलत मिळेल.
ज्या प्रवाशांकडे अजून कार्ड आलेले नाही, त्यांनी नोंदणीनंतर मिळालेली QR कोडवाली पावती कंडक्टरच्या ईटीएम मशीनवर दाखवून सवलतीचे तिकीट घेता येईल. ही पावती 30 दिवसांपर्यंत चालणार आहे. मात्र या 30 दिवसांत प्रवाशांनी आपले NCMC कार्ड Active करून त्यात पैसे भरणे (Top-up) गरजेचे आहे.
कार्ड नोंदणी आणि वाटपाचे काम ई-बिक्स टेक्नॉलॉजीज लिमिटेड या कंपनीकडे सोपवण्यात आले असून, बसस्थानक, आगार आणि आगाराबाहेरचे अधिकृत एजंट यांच्यामार्फत ही नोंदणी होणार आहे. त्यामुळे प्रवाशांना जवळच्या अधिकृत केंद्रावर जाऊन कार्ड काढता येईल. कार्डमध्ये पैसे भरण्यासाठी BHIM App वापरता येते. कार्डच्या मागच्या बाजूला असलेला QR कोड BHIM Appने स्कॅन केला की Top-up करता येते.
काही प्रवाशांच्या आधार कार्डावरच्या बोटांच्या ठशांची नोंद व्यवस्थित होत नाही, त्यामुळे नोंदणीत अडचण येते. अशा पात्र लाभार्थ्यांसाठी वेगळी सोय करण्यात आली आहे. आधार कार्डला जोडलेल्या मोबाइल नंबरवर येणाऱ्या OTPच्या आधारे NCMC कार्ड नोंदणी करता येईल, अशी पद्धत तयार करण्यात आली आहे.
प्रवास सवलत आणखी पारदर्शक, डिजिटल आणि सोपी व्हावी यासाठी हे NCMC कार्ड महत्त्वाचे ठरणार आहे. त्यामुळे ज्येष्ठ नागरिक आणि महिला प्रवाशांनी 1 ऑक्टोबरच्या आधीच कार्ड नोंदणी करून घ्यावी, असे आवाहन एसटी महामंडळाने केले आहे.
