एसटीची लालपरी २०३७ पर्यंत पूर्णपणे इलेक्ट्रिक होणार, २०२७ पासून जुन्या बसचे रूपांतर सुरू

महाराष्ट्राची लोकवाहिनी म्हणून ओळखली जाणारी एसटीची 'लालपरी' आता काळाच्या पाऊलावर पाऊल ठेवत नव्या रूपात धावण्यासाठी सज्ज होत आहे. एसटी महामंडळाच्या नुकत्याच झालेल्या 312 व्या संचालक मंडळाच्या बैठकीत 2027 पासून जुन्या बसचे इलेक्ट्रिक बसमध्ये रूपांतर करण्याची घोषणा करण्यात आली.

सध्या एसटीच्या ताफ्यात 14 हजार बस आहेत आणि त्यापैकी 1100 ई-बस आहेत. डिझेलवरचे अवलंबित्व पूर्णपणे संपवण्यासाठी हे पाऊल उचलण्यात आले आहे. म्हणजेच ताफ्यातील बसचे स्वरूप बदलण्याची ही सुरुवात आहे.

परिवहन मंत्री आणि एसटी महामंडळाचे अध्यक्ष प्रताप सरनाईक यांनी दिलेल्या माहितीनुसार, 2037 पर्यंत महाराष्ट्राची ही लाडकी 'लालपरी' पूर्णपणे प्रदूषणमुक्त 'ई-लालपरी' म्हणून रस्त्यावर धावताना दिसेल. त्यानंतर टप्प्याटप्प्याने इलेक्ट्रिक बसची संख्या वाढवली जाणार आहे.

डिझेल बसचे आयुर्मान 15 वर्षे लक्षात घेता 5 हजार जुन्या बस टप्प्याटप्प्याने स्क्रॅप केल्या जातील, तर काही बसचे रूपांतर केले जाईल. सात ते आठ वर्षे वापरात असलेल्या जुन्या बसचे 2027 पासून टप्प्याटप्प्याने इलेक्ट्रिकमध्ये रूपांतर करण्याची मोहीम सुरू केली जाणार आहे. याच बरोबर प्रवासी वाहतुकीच्या गरजेनुसार नव्या ई-बसची मोठ्या प्रमाणावर खरेदी केली जाणार आहे.

सध्या डिझेल बसचे आयुर्मान सुमारे 15 वर्षे आहे, तर ई-बसचे आयुर्मान सुमारे 20 वर्षे आहे. त्यामुळे इलेक्ट्रिक बस जास्त काळ वापरता येतील. डिझेलवरचे अवलंबित्व कमी झाल्याने इंधनावरच्या खर्चातही बचत होईल, अशी अपेक्षा आहे.

ई-बसची संख्या वाढणार असल्याने त्यासाठी आवश्यक असलेली चार्जिंग स्टेशन, विद्युत पायाभूत सुविधा आणि तांत्रिक यंत्रणा उभारण्याची प्रक्रिया सुरू करण्यात आली आहे. चार्जिंग पायाभूत सुविधांची उभारणी आगारनिहाय वेगाने सुरू आहे. आगारनिहाय नियोजन करून ई-बसची खरेदी आणि चार्जिंग सुविधांची उभारणी या दोन्ही गोष्टी एकाच वेळी राबवल्या जाणार आहेत.

मंत्री प्रताप सरनाईक यांनी सांगितले, "एसटी ही महाराष्ट्राच्या प्रत्येक गावाला जोडणारी सार्वजनिक सेवा आहे. तिचे आधुनिकीकरण करताना पर्यावरणाची जबाबदारीही महत्वाची आहे. डिझेलवरील अवलंबित्व कमी करून स्वच्छ, हरित आणि आधुनिक सार्वजनिक वाहतूक व्यवस्था उभी करण्याचा आमचा संकल्प आहे. 2037 पर्यंत एसटीचा 100 टक्के ताफा इलेक्ट्रिक करण्यासाठी नियोजनबद्ध कार्यवाही सुरू आहे."

सरनाईक यांनी असाही विश्वास व्यक्त केला की, "महाराष्ट्राच्या कानाकोपऱ्यात धावणारी लालपरी भविष्यात हरित महाराष्ट्राची 'ई-लालपरी' बनेल. पर्यावरणपूरक सार्वजनिक वाहतुकीचे देशातील आदर्श मॉडेल महाराष्ट्रात उभारण्याच्या दिशेने एसटीची वाटचाल सुरू आहे."