चंद्रपुरात दावे आणि हरकतींसाठी 12 ऑक्टोबरपर्यंत वेळ, नोटीस मिळालेल्यांच्या घरी जाणार बीएलओ
भारत निवडणूक आयोगाच्या एसआयआर-2026 कार्यक्रमात दावे व हरकती दाखल करण्याची मुदत वाढली आहे. नोटीस मिळालेल्या मतदारांना तहसील कार्यालयात जावे लागणार नाही.
चंद्रपूर : भारत निवडणूक आयोगाच्या विशेष सखोल पुनरीक्षण कार्यक्रमांतर्गत (एसआयआर)-2026 दावे आणि हरकती दाखल करण्यासाठी आता 12 ऑक्टोबर 2026 पर्यंत मुदत वाढवून देण्यात आली आहे. 'नो मॅपिंग' किंवा तार्किक विसंगतीमुळे नोटीस मिळालेल्या मतदारांना कागदपत्रे द्यायला तहसील कार्यालयात स्वतः जायची गरज नाही. संबंधित मतदान केंद्रस्तरीय अधिकारी (बीएलओ) मतदारांच्या घरी जाऊन कागदपत्रे गोळा करणार आहेत.
मतदार यादीत नाव जुळले नसल्याने किंवा तार्किक विसंगती आढळल्याने ज्यांना नोटीस आली आहे, त्यांनी मतदार नोंदणी अधिकारी (ईआरओ), सहायक मतदार नोंदणी अधिकारी (एईआरओ) किंवा तहसील कार्यालयात प्रत्यक्ष सुनावणीला यायची गरज नाही. आधी नोटीस मिळालेल्या मतदारांनी कागदपत्रे तयार ठेवावीत. बीएलओ घरी येऊन ती घेतील. व्हाट्सऐप किंवा इतर उपलब्ध ऑनलाइन मार्गानेही कागदपत्रे देता येतील.
तार्किक विसंगती असलेल्या प्रकरणांत त्या विसंगतीपुरती आवश्यक कागदपत्रे, बीएलओचा पडताळणी अहवाल किंवा पंचनामा यांच्या आधारे निर्णय घेतला जाईल. ठरवून दिलेली कागदपत्रे नसतील किंवा दिलेल्या कागदपत्रांवरून निर्णय घेता येत नसेल, अशा अपवादात्मक प्रकरणांत शक्यतो ऑनलाइन सुनावणी होईल. या सुनावणीला संबंधित मतदार किंवा त्यांच्या कुटुंबातील प्रौढ व्यक्ती हजर राहू शकेल.
अंतिम निर्णयाआधी मतदाराला कागदपत्रे देण्याची पुरेशी संधी मिळेल. गरजेच्या प्रकरणांची माहिती राजकीय पक्षांच्या मतदान केंद्रस्तरीय प्रतिनिधींना दिली जाईल आणि कागदपत्रे मिळवण्यासाठी त्यांना पुरेसा वेळही दिला जाणार आहे.
वाढीव मुदतीत एकही पात्र मतदार राहून जाऊ नये, म्हणून जिल्ह्यातील सर्व मतदान केंद्रांवर 3 आणि 4 ऑक्टोबर तसेच 10 आणि 11 ऑक्टोबर 2026 रोजी विशेष शिबिरे होतील. त्या दिवशी बीएलओ केंद्रावर हजर असतील. या शिबिरांत नवीन मतदारांची नमुना 6 द्वारे नोंदणी, प्रारूप मतदार यादीतील नावाची पडताळणी, दुरुस्तीसाठी नमुना 8 आणि नोटीस मिळालेल्या मतदारांची कागदपत्रे स्वीकारण्याची सोय असेल.
जिल्ह्यातील कनिष्ठ आणि वरिष्ठ महाविद्यालयांत 5 ते 9 ऑक्टोबरदरम्यान विद्यार्थ्यांची नमुना 6 द्वारे ऑनलाइन मतदार नोंदणी करण्यावर भर राहील. औद्योगिक आस्थापना, कंपन्या, कारखाने आणि सहकारी गृहनिर्माण संस्था येथील पात्र नागरिकांची नोंदणी सोपी व्हावी यासाठी 12 ऑक्टोबरपर्यंत मतदार जागृती मंचाच्या माध्यमातून विशेष शिबिरे घेतली जातील.
घरबसल्या प्रारूप यादीत नाव तपासता येईल, तसेच नवीन नोंदणीसाठी नमुना 6 आणि दुरुस्तीसाठी नमुना 8 ऑनलाइन भरता येईल. त्यासाठी निवडणूक आयोगाचे Voters' Services Portal, ECINET आणि Voter Helpline App वापरता येतील. एसआयआरबाबत शंका, मतदार यादी, नोटीस, नोंदणी किंवा शिबिरांची माहिती हवी असल्यास 1950 ही मतदार हेल्पलाईन उपलब्ध आहे.
आयोगाच्या निर्देशानुसार कोणताही पात्र मतदार यादीतून वंचित राहू नये याची विशेष काळजी घेण्याच्या सूचना सर्व मतदार नोंदणी अधिकाऱ्यांना देण्यात आल्या आहेत. पुरेशा पुराव्याअभावी प्रतिकूल निर्णय घेण्याआधी मतदाराला कागदपत्रे देण्याची आणि आपली बाजू मांडण्याची संधी दिली जाईल. त्यामुळे नोटीस मिळालेल्यांनी घाबरून तहसील कार्यालयात गर्दी करू नये, आपल्या केंद्रावरील बीएलओशी संपर्क साधावा, विशेष शिबिरांचा किंवा ऑनलाइन सुविधांचा वापर करावा, तसेच अफवा किंवा अप्रमाणित माहितीवर विश्वास ठेवू नये, असे आवाहन जिल्हाधिकारी वसुमना पंत यांनी केले आहे.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
