LIC ला तब्बल 2684 कोटींचा चुना, अनिल अंबानींच्या अडचणीत पुन्हा वाढ, CBI ची धडक कारवाई
रिलायन्स कॅपिटल, अनिल अंबानी आणि इतरांविरुद्ध सीबीआयने गुन्हा दाखल केला असून एलआयसीला यात 2,684.57 कोटी रुपयांचा फटका बसल्याचा आरोप आहे.
अनिल अंबानी यांच्या अडचणी आणखी वाढल्या आहेत. केंद्रीय अन्वेषण विभागाने म्हणजेच सीबीआयने शुक्रवारी रिलायन्स कॅपिटल लिमिटेड (RCL), तिचे माजी अध्यक्ष अनिल अंबानी, माजी व्यवस्थापकीय संचालक सतीश सेठ, काही अज्ञात सरकारी अधिकारी आणि इतर काही जणांविरुद्ध गुन्हा दाखल केला आहे.
हे प्रकरण भारतीय आयुर्विमा महामंडळ म्हणजेच एलआयसीशी संबंधित आहे. एलआयसीला यात सुमारे 2,684.57 कोटी रुपयांचा, म्हणजे अंदाजे 2.5 अब्ज डॉलरचा फटका बसल्याचा आरोप आहे. एलआयसी ही देशातील एक मोठी आयुर्विमा कंपनी असून तिचा हा पैसा कर्जाच्या रूपात रिलायन्स कॅपिटलला देण्यात आला होता.
एलआयसीने लेखी तक्रारीत काय म्हटलंय ते पाहूया. 12 एप्रिल 2012 ते 9 मार्च 2018 या काळात रिलायन्स कॅपिटलने एलआयसीकडून 3,900 कोटी रुपयांचे कर्ज मंजूर करून घेतले होते. हे कर्ज पाच डिबेंचर्स विकून उभे केले गेले होते, म्हणजे कंपनीने रोखे विकून एलआयसीकडून हा पैसा जमा केला होता. हा पैसा कंपनीच्या दैनंदिन कामकाजासाठी, आर्थिक गरजा भागवण्यासाठी आणि जुनी कर्जे फेडण्यासाठी वापरला जाणार असल्याचे रिलायन्सने त्यावेळी सांगितले होते.
पण एलआयसीचा आरोप असा आहे की, हा निधी सांगितलेल्या कामासाठी वापरलाच गेला नाही. उलट हा पैसा समूहातील आधीच तोट्यात असलेल्या इतर कंपन्यांकडे वळवण्यात आला, म्हणजे कर्ज म्हणून मिळालेला पैसा दुसरीकडेच फिरवला गेला. पुढे रिलायन्स कॅपिटल कोसळली आणि एलआयसीकडून घेतलेल्या कर्जाची परतफेडच होऊ शकली नाही. यामुळे एलआयसीला 2,684.57 कोटी रुपयांचे मोठे नुकसान सोसावे लागले, असे तक्रारीत म्हटले आहे.
या सगळ्या आरोपांवर अनिल अंबानी यांच्या प्रवक्त्याने स्पष्टीकरण दिले आहे. हे प्रकरण फक्त रिलायन्स कॅपिटल लिमिटेडशी संबंधित असल्याचे त्यांनी सांगितले. अनिल अंबानी 2005 ते नोव्हेंबर 2021 या काळात कंपनीचे फक्त गैर-कार्यकारी संचालक आणि मंडळाचे अध्यक्ष होते, इतकेच त्यांचे काम होते असे प्रवक्त्याने स्पष्ट केले. म्हणजे कंपनीच्या रोजच्या कामकाजाशी त्यांचा थेट संबंध नव्हता असा दावा केला जात आहे. नोव्हेंबर 2021 मध्ये रिझर्व्ह बँकेने कंपनीचे मंडळ बरखास्त करून प्रशासकाची नियुक्ती केली होती, याचीही आठवण प्रवक्त्याने करून दिली.
अनिल अंबानी यांनी कोणताही गैरप्रकार केल्याचे पूर्णपणे नाकारले असून कायद्यानुसार त्यांचे सर्व हक्क अबाधित राहतील, असेही प्रवक्त्याने निवेदनात नमूद केले आहे.
