ॲक्वा लाईनच्या वर्षपूर्तीनिमित्त टाइम कॅप्सूल आणि पासपोर्ट-शिक्का उपक्रम, ७ कोटी प्रवासी प्रवासांचा टप्पा पार

मुंबई मेट्रो रेल कॉर्पोरेशन लिमिटेडच्या (MMRC) ॲक्वा लाईनने ७ कोटी प्रवासी प्रवासांचा महत्त्वाचा टप्पा ओलांडला आहे. आरे जेव्हीएलआर ते कप परेड या संपूर्ण मार्गावर सेवा सुरू होऊन आता एक वर्ष पूर्ण होत आहे. या काळात ॲक्वा लाईनवर एकूण ७,१८,५२,४७३ प्रवासी प्रवासांची नोंद झाली आहे. मुंबईच्या पहिल्या भूमिगत मेट्रो मार्गिकेला मिळणारा वाढता प्रतिसाद यातून दिसून येतो.

प्रवाशांचा हा प्रतिसाद सप्टेंबर २०२६ च्या आकडेवारीतूनही दिसतो. त्या महिन्यात सोमवार ते शुक्रवार दररोज सरासरी २,२४,६०२ प्रवाशांनी ॲक्वा लाईनने प्रवास केला. शनिवार आणि रविवारी दररोज सरासरी १,३१,१३८ प्रवाशांनी या मार्गिकेने प्रवास केला. मुंबईकरांच्या रोजच्या प्रवासात ॲक्वा लाईनचे महत्त्व वाढत चालल्याचे यावरून स्पष्ट होते.

या टप्प्याच्या निमित्ताने MMRC तर्फे दोन विशेष उपक्रम राबवले जाणार आहेत. पहिला उपक्रम 'ॲक्वा लाईन time capsule' हा आहे. भारतातील मेट्रो क्षेत्रातील अशा स्वरूपाचा हा पहिलाच उपक्रम आहे. ॲक्वा लाईनच्या उभारणीपासून ते तिच्या प्रत्यक्ष सुरू होण्यापर्यंतच्या प्रवासातील महत्त्वाची कागदपत्रे, छायाचित्रे, महत्त्वाचे टप्पे आणि आठवणी यात जपून ठेवल्या जाणार आहेत. सन २०२६ मधील ॲक्वा लाईन आणि मुंबई कशी होती, याचे एक चित्र पुढच्या पिढ्यांसाठी जतन करण्याचा हा प्रयत्न आहे.

दुसरा उपक्रम 'ॲक्वा लाईन पासपोर्ट व शिक्का' हा आहे. प्रवाशांना ॲक्वा लाईनचा प्रवास अधिक आनंददायी आणि वेगळ्या पद्धतीने अनुभवता यावा, यासाठी तो सुरू करण्यात येणार आहे. या उपक्रमांतर्गत प्रवासी आणि मेट्रोप्रेमींना मार्गिकेवरील निवडक स्थानकांना भेट देऊन तिथले वैशिष्ट्यपूर्ण स्थानक-शिक्के गोळा करता येणार आहेत.

यावेळी मुंबई मेट्रो रेल कॉर्पोरेशनच्या व्यवस्थापकीय संचालक, श्रीमती अश्विनी भिडे म्हणाल्या, "ॲक्वा लाईनच्या संपूर्ण मार्गावरील सेवेला एक वर्ष पूर्ण होत असताना, तिला आपल्या दैनंदिन जीवनाचा एक भाग म्हणून स्वीकारल्याबद्दल मी मुंबईकरांचे मनापासून आभार मानते. ७ कोटी प्रवासी प्रवासांचा टप्पा गाठणे हा मुंबईकरांचा ॲक्वा लाईनवरील विश्वास आणि पाठिंबा दर्शवणारा महत्त्वपूर्ण टप्पा आहे. Time capsule आणि पासपोर्ट व शिक्का संग्रह हे उपक्रम या सामूहिक प्रवासाचा आनंद साजरा करण्यासोबतच त्याच्या आठवणी पुढील पिढ्यांसाठी जतन करण्याचा आमचा प्रयत्न आहे."

मुंबईकरांनी आपल्या रोजच्या प्रवासासाठी यापुढेही ॲक्वा लाईनचीच निवड करत राहावी, अशी MMRC ची अपेक्षा आहे.