ई-रिक्षाला ओव्हरटेक करणं पडलं महागात; भीषण अपघातात एका सेकंदात कारचा झाला चुराडा, Video Viral

रस्त्यावर गाडी चालवताना वाहतुकीचे नियम न पाळल्यास काय होऊ शकते, याचे एक धक्कादायक उदाहरण दिल्लीत घडले आहे. दिल्लीतील शक्ती नगर गोलचक्करजवळ एका पांढऱ्या रंगाच्या Wagon-R कारचालकाने डावीकडून एका ई-रिक्षाला ओव्हरटेक करण्याचा प्रयत्न केला आणि हा प्रयत्न त्याला चांगलाच महागात पडला. व्हायरल झालेल्या व्हिडिओमध्ये ही Wagon-R कार रस्त्यावर भरधाव वेगात धावताना दिसते.

ओव्हरटेक करताना चालकाचा गाडीवरील ताबा सुटला. भरधाव वेगात असलेली कार रस्त्यावर घरंगळत पलटी झाली आणि रस्त्याच्या कडेला जाऊन आदळली. गाडी नियंत्रणात आणण्याचा प्रयत्न चालकाने केला, पण गाडी दुसऱ्या बाजूला वळून थेट डिव्हायडरला धडकली. अवघ्या काही सेकंदांत घडलेल्या या घटनेने पाहणाऱ्यांचा थरकाप उडाला.

या संपूर्ण अपघातातील सर्वात भयावह क्षण म्हणजे कारची मागची काच फुटल्याचा प्रसंग. मागच्या सीटवर बसलेल्या एका तरुणाचे डोके आणि शरीराचा वरचा भाग फुटलेल्या काचेतून बाहेर आला. गाडी पलटी होत असतानाच हा तरुण अत्यंत धोकादायक स्थितीत असल्याचे व्हिडिओत स्पष्ट दिसते. सुदैवाने या अपघातात कोणाचाही जीव गेला नाही, मात्र गाडीतील व्यक्तीला गंभीर दुखापत झाल्याचे सांगितले जात आहे. या अपघातात नेमके किती जण जखमी झाले, याबाबत मात्र अधिकृत माहिती अद्याप समोर आलेली नाही.

या अपघाताचा व्हिडिओ @zingabad या एक्स अकाऊंटवरून शेअर करण्यात आला असून तो इंटरनेटवर चांगलाच व्हायरल होत आहे. गाडी चालवताना केलेली एक छोटीशी चूकही किती मोठी किंमत मोजायला लावू शकते, हे या व्हिडिओतून समोर येते. रस्त्यावर उभे असलेले आणि आजूबाजूने ये-जा करणारे लोक हा अपघात पाहून हादरून गेल्याचेही व्हिडिओत दिसते.

व्हिडिओ व्हायरल झाल्यानंतर अनेक युजर्सनी यावर आपल्या प्रतिक्रिया कमेंट्समधून व्यक्त केल्या. एका युजरने लिहिले की, "तशी मारुती कार तुम्हाला तुमची जागा नक्कीच दाखवून देईल. सुटका नव्हती. तो वेगात होता आणि आडवाटेने पुढे जात होता." दुसऱ्या एका युजरने, "यात चूक पूर्णपणे कारचालकाची होती," असे मत मांडले, तर आणखी एका युजरने, "म्हणून ओव्हरटेक करण्याची चूक करू नये," अशी प्रतिक्रिया दिली. अशा प्रकारे या व्हिडिओने वाहतुकीच्या नियमांचे पालन करण्याच्या गरजेबाबत पुन्हा एकदा चर्चा घडवून आणली आहे.

या घटनेशी संबंधित माहिती सोशल मीडियावर शेअर करण्यात आलेल्या पोस्ट आणि व्हिडीओवर आधारित आहे. त्यातील सर्व दाव्यांची स्वतंत्रपणे पडताळणी झालेली असल्याचे निश्चितपणे सांगता येत नाही.