दुबईत राहणाऱ्या सुमंत दसरेला इंटरपोलच्या मदतीने आणून पिंपरीत अटक

दुबईत राहून चिनी सायबर गुन्हेगारांसोबत भागीदारीत ऑनलाइन फसवणुकीचे रॅकेट चालवल्याचा आरोप असलेल्या सुमंत ऊर्फ नानू रविंद्र दसरे (वय २६, रा. निगडी प्राधिकरण) याला पिंपरी-चिंचवड सायबर पोलिसांनी अटक केली आहे. इंटरपोलच्या मदतीने त्याला दुबईत ताब्यात घेण्यात आले आणि नंतर भारतात आणण्यात आले.

तपासात सुमंतने १५७ हून अधिक बँक खात्यांचा वापर करून सायबर फसवणुकीतील पैसे स्वीकारल्याचे निष्पन्न झाले आहे. हा आरोपी मूळचा पिंपरी-चिंचवडमधला असून या रॅकेटचा मुख्य सूत्रधार म्हणून त्याच्यावर पोलिसांनी कारवाई केली.

पिंपरी-चिंचवड सायबर पोलीस ठाण्यात गुन्हा क्रमांक ४२/२०२६ नोंदवण्यात आला आहे. भारतीय न्याय संहिता २०२३ च्या कलम ३१८(४), ३१७(२), ६१(२) आणि ३(५) अन्वये हा गुन्हा दाखल आहे.

सायबर फसवणुकीसाठी बँक खाती उपलब्ध करून देणाऱ्या टोळीचा तपास सुरू होता. त्या वेळी सहायक पोलीस निरीक्षक प्रवीण स्वामी यांना तुषार अमराराम चौधरी (वय २९, रा. मोरे वस्ती, चिखली रोड) याच्याबद्दल माहिती मिळाली. तो साथीदारांच्या मदतीने बँक खाती उघडून त्यात सायबर फसवणुकीची रक्कम स्वीकारत असल्याचे समोर आले.

पोलिसांनी तुषार चौधरी आणि आदर्श संतोष वाघमारे (वय २७, रा. आकुर्डी) यांना अटक करून चौकशी केली. या दोघांनी वेगवेगळ्या बँकांमध्ये खाती उघडली आणि त्यांची माहिती दुबईत राहणाऱ्या सुमंत ऊर्फ नानू दसरे याला दिली, असे तपासात निष्पन्न झाले. त्या खात्यांमध्ये फसवणुकीची रक्कम जमा झाली की तुषार आणि आदर्श चेकने पैसे काढत असत. आपले कमिशन ठेवून उरलेली रक्कम सीडीएमद्वारे सुमंतने दिलेल्या बँक खात्यांमध्ये भरली जात होती.

सुमंत सुरुवातीला दुबईत सहा हजार पगारावर शेअर ट्रेडिंग आणि टास्क फ्रॉडसाठी कॉलिंग व मेसेजिंगचे काम करत होता. त्याने चिनी आरोपींकडून वेगवेगळी आंतरराष्ट्रीय कार्ड मिळवली आणि मॉल व इतर ठिकाणी ती स्वाइप करून महागड्या वस्तू घेण्यास सुरुवात केली, असे समोर आले आहे. या कामातून त्याला सायबर फसवणुकीची संपूर्ण कार्यपद्धती समजली. त्यानंतर त्याने चिनी सायबर गुन्हेगारांसोबत भागीदारी करून फसवणुकीचे गुन्हे सुरू केले, असे पोलिसांच्या तपासात दिसते.

पोलीस आयुक्त विनय कुमार चौबे यांच्या सूचनेनुसार सहायक पोलीस निरीक्षक प्रवीण स्वामी यांनी आरोपीची माहिती गोळा केली. गुन्हे शाखेच्या पोलीस उपायुक्तांनी त्याच्याविरोधात लूक आऊट सर्क्युलर (एलओसी) जारी केले. त्या एलओसीच्या आधारे इंटरपोलच्या मदतीने सुमंतला दुबईत ताब्यात घेण्यात आले. त्यानंतर त्याला भारतात डिपोर्ट करण्यात आले.

तो मुंबई विमानतळावर पोहोचताच सहायक पोलीस निरीक्षक प्रवीण स्वामी आणि त्यांच्या पथकाने त्याला ताब्यात घेतले. पुढे पिंपरी-चिंचवड सायबर पोलीस ठाण्यात त्याला अटक करण्यात आली.

ही कारवाई पोलीस आयुक्त विनय कुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपायुक्त (गुन्हे) रोहिदास पवार आणि सहायक पोलीस आयुक्त (सायबर व आर्थिक गुन्हे) रोहिणी बनकर यांच्या मार्गदर्शनाखाली झाली. वरिष्ठ पोलीस निरीक्षक रविकिरण नाळे आणि पोलीस निरीक्षक दिगंबर गायकवाड यांच्या नेतृत्वाखाली सहायक पोलीस निरीक्षक प्रवीण स्वामी व त्यांच्या पथकाने हा तपास पूर्ण केला.