Omega Seiki Mobility आणणार दिव्यांगांसाठी स्पेशल इलेक्ट्रिक गाडी; तंत्रज्ञानाने असणार सुसज्ज

इलेक्ट्रिक वाहन बनवणाऱ्या ओमेगा सेकी मोबॅलिटी या कंपनीने दिव्यांग व्यक्तींसाठी खास तयार केलेली इनोव्हेटिव्ह इलेक्ट्रिक गाडी बाजारात आणणार असल्याची घोषणा केली आहे. ही गाडी पूर्णपणे मानव केंद्रीत म्हणजेच ह्युमन सेंट्रिक दृष्टीकोनातून तयार केली जाणार असून, दिव्यांगांच्या रोजच्या प्रवासातील अडचणी लक्षात घेऊन त्यांच्या विशिष्ट गरजांना प्राधान्य दिले जाणार आहे. गाडी साकारण्यामागचा मूळ उद्देश दिव्यांगांना दैनंदिन प्रवासात कोणतीही अडचण येऊ नये, हाच असल्याचे कंपनीने स्पष्ट केले आहे.

ही गाडी बनवताना कंपनीचा मुख्य भर सुरक्षा, आराम आणि गाडी वापरायला सोपी असण्यावर असणार आहे. रोजच्या प्रवासात दिव्यांग व्यक्तींना जास्तीत जास्त स्वातंत्र्य आणि सन्मान मिळावा, हाही उद्देश यामागे आहे. भारतात तयार होणारी ही गाडी डिझाइन करताना कंपनी केवळ इंजिनिअरांवर अवलंबून न राहता प्रत्यक्ष वापरकर्ते आणि या क्षेत्रातील तज्ज्ञ यांच्याही सूचना विचारात घेणार आहे. म्हणजेच गाडीची रचना ठरवताना दिव्यांग व्यक्तींचे स्वतःचे अनुभव आणि मत यांनाही महत्त्व दिले जाणार आहे.

गाडीच्या रचनेत ह्युमन सेंट्रिक व्हिजन आणि खास डिझाइन यावर लक्ष केंद्रित करण्यात आले आहे. वाहतुकीच्या गर्दीत असो किंवा मोकळ्या रस्त्यावर, कोणत्याही परिस्थितीत दिव्यांग व्यक्तींना प्रवासादरम्यान कोणताही त्रास होऊ नये, यासाठी गाडीत विविध प्रकारचे तंत्रज्ञान वापरले जाणार आहे. यामुळे गाडी चालवणे आणि तिच्यातून प्रवास करणे या दोन्ही गोष्टी अधिक सुरक्षित आणि सुलभ होतील, असा कंपनीचा दावा आहे. रस्त्यावरील कोणत्याही परिस्थितीशी जुळवून घेता येईल, अशा पद्धतीने ही रचना तयार केली जात आहे.

ओमेगा सेकी मोबॅलिटीचे संस्थापक आणि व्यवस्थापक डॉ. उदय नारंग यांनी याबाबत बोलताना सांगितले की, गाडी म्हणजे केवळ एका ठिकाणाहून दुसऱ्या ठिकाणी जाण्याचे साधन नाही, तर ती स्वातंत्र्य, सन्मान आणि समाजात पूर्णपणे सहभागी होण्याच्या संधीशी निगडीत आहे. त्यामुळे ज्या लोकांना खरोखर या गाडीची गरज आहे, त्यांच्यापर्यंत ती पोहोचवण्याचे उद्दिष्ट कंपनीने ठेवले आहे. गाडीच्या माध्यमातून दिव्यांगांना समाजाच्या मुख्य प्रवाहात सहज सहभागी होता यावे, असा दृष्टीकोन डॉ. नारंग यांनी मांडला.

शाश्वत विकास आणि सुरक्षित वाहतुकीला चालना देण्याच्या उद्देशाने कंपनीने हा उपक्रम पंतप्रधान नरेंद्र मोदी यांच्या मेड इन इंडिया संकल्पनेला समर्पित केला आहे. इलेक्ट्रिक वाहन क्षेत्रातील आपल्या अनुभवाच्या जोरावर कंपनी संपूर्णपणे भारतीय बनावटीची ही गाडी विकसित करत आहे. वापरकर्त्यांना ही गाडी सहज आणि सुरक्षितपणे वापरता यावी, हाच दृष्टीकोन संपूर्ण निर्मिती प्रक्रियेत कायम ठेवण्यात आला आहे. भारतीय बनावटीच्या या गाडीच्या माध्यमातून कंपनी देशांतर्गत उत्पादनाला चालना देण्याचाही प्रयत्न करत आहे.