झोमॅटोचे दीपिंदर गोयल यांनी डोक्याला लावली मेंदूतील रक्तप्रवाह मोजणारी Temple चिप

झोमॅटोचे फाऊंडर दीपिंदर गोयल यांचा एक फोटो सध्या चर्चेत आहे. या फोटोत त्यांनी डोक्याला एक चिप लावलेली दिसते. मेंदूमध्ये होणाऱ्या रक्तप्रवाहातील बदल समजून घेण्यासाठी या Temple चिपचा (डिवाइस) वापर केला जातो. या डिवाइसवर सध्या संशोधन सुरु आहे. ब्रेन ट्युमर, स्ट्रोक किंवा इतर आजारांचे निदान लवकरात लवकर व्हावे यासाठी या चिपचा वापर होऊ शकतो, अशी माहिती दीपिंदर गोयल यांनी स्वतःच्या एक्स अकाऊंटवर (ट्विटर) पोस्ट टाकून दिली आहे.

गोयल यांनी आपल्या पोस्टमध्ये लिहिले आहे की, ही Temple चिपची त्यांची दुसरी पडताळणी आहे. या दुसऱ्या पडताळणीच्या अभ्यासात त्यांनी Temple चिपच्या ब्रेनफ्लोची तुलना टाइम-डोमेन NIRS या तंत्रज्ञानाशी केली. टाळूतील रक्ताच्या प्रमाणातील बदल आणि मेंदूतील रक्ताच्या प्रमाणातील बदल वेगळे ओळखू शकणाऱ्या मोजक्या तंत्रज्ञानांपैकी हे एक तंत्रज्ञान असल्याचे गोयल यांनी नमूद केले. या चाचणीत जवळपास 60 जणांवर प्रयोग करण्यात आला. डोके खाली झुकवणे, उभे राहून खाली बसणे आणि उभे राहून पाठीवर झोपणे अशा हालचाली या चाचणीदरम्यान करून घेण्यात आल्या.

या चाचणीत ब्रेनफ्लोचे प्रमाण 84 ते 91 इतक्या रक्तप्रवाहाचे मोजमाप करण्यात आले. सर्वात लक्षणीय निकाल डोके खाली झुकवण्याच्या टप्प्यातून समोर आला, जिथे Temple चिपचा मेंदूशी असलेला सहसंबंध 91 इतका नोंदवला गेला, तर टाळूशी असलेला सहसंबंध केवळ 49 इतका होता.

गोयल यांच्या पोस्टनुसार, मेंदूतील मुख्य रक्तप्रवाह म्हणजेच सेरेब्रल ब्लड फ्लो हा दीर्घायुष्यासाठी प्रयत्न करणारे लोक आधीपासूनच करत असलेल्या जवळजवळ प्रत्येक गोष्टीला प्रतिसाद देतो. एरोबिक व्यायामाने तो वाढतो आणि VO2max शी तो थेट संबंधित असतो. थंडीच्या संपर्कात आल्याने आणि ध्यानाने देखील तो वाढतो. चांगली झोप मिळाल्यास त्याचा फायदा होतो, तर जास्त वेळ बसून राहिल्यास आणि शरीरात पाण्याची कमतरता असल्यास तो कमी होतो. शरीर प्रत्यक्षात किती चांगल्या प्रकारे काम करत आहे आणि किती वेगाने वृद्ध होत आहे, हे दाखवणाऱ्या सर्वात संवेदनशील आणि एकात्मिक बायोमार्करपैकी हा एक असल्याचे या पोस्टमध्ये म्हटले आहे.

ही Temple चिप मनगटावर बांधली जात नाही, तर कपाळाच्या एका बाजूला लावली जाते. दिसायला ही चिप साधारण स्मार्टवॉचसारखी आहे. मात्र ही केवळ हार्ट रेट किंवा पावले मोजत नाही, तर मेंदूतील रक्तप्रवाह आणि शरीराची चयापचय मागणी रिअल-टाइममध्ये ट्रॅक करते. मार्केटमध्ये या चिपची अंदाजे किंमत 72,000 ते 80,000 रुपयांच्या दरम्यान असण्याची शक्यता आहे.