दीक्षाभूमीवर २४ तास सीसीटीव्हीची नजर; ७०व्या धम्मचक्र प्रवर्तन दिनाच्या तयारीला मनपा आयुक्तांकडून वेग

नागपूरच्या दीक्षाभूमीवर यंदा साजऱ्या होणाऱ्या ७०व्या धम्मचक्र प्रवर्तन दिनाच्या तयारीला महापालिका, जिल्हा प्रशासन आणि समाजकल्याण विभागाने वेग दिला आहे. यंदाही देशभरातून लाखो बौद्ध अनुयायी दीक्षाभूमीवर येण्याची शक्यता आहे. या पार्श्वभूमीवर मनपा आयुक्त डॉ. विपीन इटनकर यांनी मंगळवारी आढावा बैठक घेतली आणि विविध विभागांनी समन्वयाने काम करावे, असे निर्देश दिले.

धम्मचक्र प्रवर्तन दिन बौद्ध समाजासाठी अत्यंत महत्त्वाचा दिवस आहे. डॉ. बाबासाहेब आंबेडकर यांनी १४ ऑक्टोबर १९५६ रोजी नागपूरच्या दीक्षाभूमीवर लाखो अनुयायांसह बौद्ध धर्माची दीक्षा घेतली. त्या ऐतिहासिक घटनेच्या स्मरणार्थ दरवर्षी विजयादशमीच्या दिवशी नागपुरात हा दिन मोठ्या प्रमाणावर साजरा केला जातो. देशभरातून लाखो अनुयायी येत असल्यामुळे या काळात सुरक्षा, गर्दीचे नियंत्रण, पाणी, स्वच्छता, आरोग्य, निवास आणि वाहतूक ही प्रशासनासमोरची मोठी आव्हाने असतात.

या सगळ्या आव्हानांचा विचार करून १८ ते २२ ऑक्टोबरदरम्यान अनुयायांना आवश्यक मूलभूत सुविधा मिळाव्यात, असे नियोजन करण्यात आले आहे.

दीक्षाभूमी परिसराभोवती २४ तास सीसीटीव्हीच्या माध्यमातून निगराणी ठेवली जाणार आहे. गर्दीचे व्यवस्थापन, सुरक्षितता आणि आपत्कालीन परिस्थिती हाताळण्यासाठी मनपा नियंत्रण कक्ष उभारणार आहे. परिसर स्वच्छ राहावा, यासाठी खास कर्मचारी तैनात केले जातील. वीजपुरवठा, पिण्याचे पाणी, शौचालये आणि वाहतूक व्यवस्था सुरळीत राहावी, यासाठीही नियोजन झाले आहे.

अनुयायांसाठी दीक्षाभूमी, डॉ. पंजाबराव देशमुख कृषी विद्यापीठ परिसर, माता कचेरी आणि कुर्वेज शाळा परिसरात मोठे डोम उभारले जाणार आहेत. बेझनबाग आणि उंटखाना मैदानावर निवास आणि शौचालयांची व्यवस्था केली जाईल. तसेच विविध ठिकाणी तात्पुरती आरोग्य केंद्रे उभारून अनुयायांना वैद्यकीय सुविधा दिल्या जाणार आहेत.

अंबाझरी तलावात अनुयायांच्या स्नानाच्या वेळी सुरक्षितता राखण्यासाठी अग्निशमन दल आणि बोटी तैनात केल्या जातील. नागरिकांना तलावाच्या पाण्यात उतरण्यापासून रोखण्यासाठी आणि सोयीसाठी तलावाजवळ तात्पुरती शौचालये (कपडे बदलण्याची खोली/शौचालये) बांधली जातील.