केंद्रीय कर्मचाऱ्यांचा महागाई भत्ता ६० टक्क्यांवरून ६३ टक्क्यांवर, मूळ पगारानुसार किती वाढ मिळणार?

केंद्रीय कर्मचाऱ्यांच्या महागाई भत्त्याबाबत (DA) एक महत्त्वाची बातमी समोर आली आहे. केंद्र सरकारने सातव्या वेतन आयोगाअंतर्गत महागाई भत्त्यात ३% वाढ करायला मंजुरी दिली आहे. त्यामुळे हा भत्ता आता ६०% वरून ६३% पर्यंत गेला आहे. याचा थेट परिणाम कर्मचाऱ्यांच्या मासिक वेतनावर होणार आहे. नवीन दर १ जुलै २०२६ पासून लागू होतील.

सरकारच्या या निर्णयाचा थेट फायदा अंदाजे ४९ लाख केंद्र सरकारी कर्मचाऱ्यांना आणि ६८ लाखांहून अधिक निवृत्तीवेतनधारकांना मिळणार आहे. म्हणजेच फक्त नोकरीत असलेल्यांनाच नव्हे, तर निवृत्त झालेल्यांनाही वाढलेल्या महागाई भत्त्याचा लाभ होईल. ही वाढ सातव्या वेतन आयोगाच्या शिफारशींनुसार ठरवलेल्या सूत्रावर आधारित आहे. DA ६३% झाल्याने कर्मचाऱ्यांना त्यांच्या मूळ पगाराच्या ३% इतका अतिरिक्त महागाई भत्ता मिळेल.

सहाव्या वेतन आयोगाअंतर्गत येणाऱ्यांसाठी महागाई भत्ता २६२% वरून २६९% (+७%) पर्यंत वाढवला आहे. पाचव्या वेतन आयोगाअंतर्गत तो ४८३% वरून ४९७% (+१४%) पर्यंत नेण्यात आला आहे. महागाई भत्त्यातील या सगळ्या वाढीवर सरकार १०,०१६ कोटी रुपये खर्च करणार आहे.

आता मूळ पगारानुसार कोणाला किती वाढ मिळेल ते पाहू. Rs १८,००० मूळ पगार असेल तर सध्याचा भत्ता Rs १०,८०० आहे. तो Rs ११,३४० होईल आणि दरमहा Rs ५४० अतिरिक्त मिळतील. Rs २५,००० मूळ पगारावर भत्ता Rs १५,००० वरून Rs १५,७५० होईल, म्हणजे दरमहा Rs ७५० अतिरिक्त.

Rs २९,००० मूळ पगारासाठी सध्याचा भत्ता Rs १७,५२० आहे. नवीन भत्ता Rs १८,३९६ होईल आणि दरमहा Rs ८७६ अतिरिक्त मिळतील. Rs ३५,००० मूळ पगारावर भत्ता Rs २१,२४० वरून Rs २२,३०२ होईल, म्हणजे दरमहा Rs १,०६२ अतिरिक्त.

Rs ४४,९०० मूळ पगार असलेल्या कर्मचाऱ्याचा भत्ता Rs २६,९४० वरून Rs २८,२८७ होईल. त्यामुळे त्यांच्या भत्त्यात दरमहा Rs १,३४७ ची वाढ होऊ शकते. Rs ४७,६०० मूळ पगारावर भत्ता Rs २८,५७० वरून Rs २९,९८८ होईल आणि दरमहा Rs १,४२८ अतिरिक्त मिळतील.

नवीन दर १ जुलै २०२६ पासून लागू होणार असल्याचे म्हटले जाते. सरकारने त्या तारखेपासून वाढ लागू केली, तर पात्र कर्मचाऱ्यांना जुलैपासूनच्या फरकाची थकबाकीही मिळू शकते. हे समजून घेण्यासाठी एक उदाहरण पाहू. Rs १८,००० मूळ पगार असलेल्या कर्मचाऱ्याच्या भत्त्यातील फरक दरमहा Rs ५४० आहे. त्यानुसार चार महिन्यांचा फरक Rs २,१६० आणि पाच महिन्यांचा फरक Rs २,७०० इतका असेल.