धारावीतील घरे, रस्ते आणि कामाच्या जागा आता प्रत्यक्ष पाहता येणार; एक्सपिरियन्स सेंटर खुले

मुंबई : धारावी पुनर्विकास प्रकल्पात पुढे काय काय होणार आहे, हे आता धारावीकरांना नुसत्या कागदावरच्या नकाशांतून नाही, तर प्रत्यक्ष अनुभवातून समजणार आहे. त्यासाठी उभारलेल्या 'धारावी एक्सपिरियन्स सेंटर'चे उद्घाटन मुख्यमंत्री देवेंद्र फडणवीस यांच्या हस्ते झाले.

हे केंद्र अत्याधुनिक आहे. पुनर्विकासाचा आराखडा, पुनर्वसन झालेल्या नागरिकांना मिळणारी घरे, उद्योगांसाठीची जागा आणि पुढे उभ्या राहणाऱ्या सामाजिक पायाभूत सुविधा, हे सगळे येथे प्रत्यक्ष आणि डिजिटल पद्धतीने दाखवले जाते. आधुनिक दृश्य-श्राव्य आणि डिजिटल तंत्रज्ञानाच्या मदतीने धारावीचा आजचा चेहरा ते भविष्यातील रूप, असा सगळा प्रवास येथे उलगडून दाखवला आहे. फडणवीस यांनी संपूर्ण केंद्राची पाहणी केली.

प्रसार माध्यमांशी बोलताना फडणवीस म्हणाले की, नागरिकांना येथे केवळ प्रकल्पाचे आराखडे दिसणार नाहीत. त्यांच्या भविष्यातील घराचा, परिसराचा आणि कामाच्या ठिकाणाचा अनुभवही त्यांना घेता येईल. त्यामुळे अफवा, गैरसमज आणि अपुरी माहिती यांना आळा बसेल, पुनर्विकासाबद्दल विश्वासाचे वातावरण तयार होण्यास मदत होईल, असा विश्वास त्यांनी व्यक्त केला.

केंद्राची पाहणी केल्यानंतर मुख्यमंत्री म्हणाले की, धारावी ही फक्त झोपडपट्टी नाही, तर ते एक मोठे आर्थिक इंजिन आहे. कुंभारवाड्यातील मातीभांड्यांचा उद्योग, चामड्याचा व्यवसाय, अन्नप्रक्रिया, प्लास्टिक पुनर्चक्रीकरण आणि इतर लघु-मध्यम उद्योग यांतून येथे मोठी अर्थव्यवस्था उभी राहिली आहे. या उद्योगांचा सन्मान राखून त्यांना अधिक चांगल्या आणि नियोजित कार्यस्थळांची सोय करून देण्याचा विचार पुनर्विकास आराखड्यात केला आहे, असे त्यांनी सांगितले.

धारावीची आजची सामाजिक, सांस्कृतिक आणि आर्थिक ओळख जपत तिचे सर्वंकष नागरी परिवर्तन करण्याचा हा प्रयत्न आहे, असेही फडणवीस यांनी सांगितले. प्रधानमंत्री नरेंद्र मोदी यांच्या नेतृत्वाखाली देशात जे नागरी परिवर्तन होत आहे, त्याचे हे आदर्श उदाहरण असल्याचे ते म्हणाले.

पुनर्विकास झाल्यावर आपले काय होणार, हा प्रश्न धारावीकरांच्या मनात आहे आणि त्यावरून संभ्रमही आहे. तो दूर करण्यासाठी हे केंद्र महत्त्वाचे ठरणार असल्याचे मुख्यमंत्र्यांनी सांगितले. प्रकल्प नेमका कसा असेल, आजची धारावी कशी आहे आणि पुढे तिचे स्वरूप कसे बदलणार, याची 'रिअल टाइम' माहिती सर्वांना येथे मिळेल. रहिवाशांना मिळणारी घरे, रस्ते, खुली मैदाने, सामाजिक सुविधा आणि रोजगाराच्या संधी, ही सगळी माहिती एकाच ठिकाणी मिळणार आहे. नागरिक, हितधारक आणि देशभरात नागरी नियोजनाचा अभ्यास करणाऱ्यांनाही हे केंद्र उपयोगी पडेल, असा विश्वास फडणवीस यांनी व्यक्त केला.

या कार्यक्रमात प्रख्यात गायक शंकर महादेवन यांनी गायलेल्या 'धारावी का कल' या खास गीताचे लाँचिंग झाले. बदलत्या धारावीचे चित्र या गीतातून मांडले आहे. तसेच 'मेरे सपनों की धारावी' या पुस्तकाचे प्रकाशनही मुख्यमंत्री फडणवीस यांच्या हस्ते झाले.