सुपर संडेला नागपूरच्या बाजारपेठेत गर्दी, वाहने आणि सोन्याच्या खरेदीला ग्राहकांची पसंती

दसऱ्याच्या आधी आलेल्या 'सुपर संडे'मुळे नागपूर शहरातील बाजारपेठांमध्ये उत्साहाचे आणि सणाचे वातावरण निर्माण झाले. रविवारच्या सुटीचा फायदा घेऊन नागरिक खरेदीसाठी घराबाहेर पडले. शहरातील प्रमुख बाजारपेठा, शोरूम आणि दुकानांमध्ये दिवसभर ग्राहकांची ये-जा सुरू होती. इलेक्ट्रॉनिक्स, वाहने, सराफा आणि बांधकाम क्षेत्रासह अनेक क्षेत्रांत खरेदीचा उत्साह दिसून आला.

सणाच्या आधी बाजारपेठांमध्ये गर्दी वाढल्याने व्यापाऱ्यांच्या चेहऱ्यावरही समाधान दिसत होते. दसरा जवळ येत असल्याने बाजारपेठांमध्ये सणाच्या तयारीला वेग आला आहे. घरासाठी नवीन वस्तू, वाहने आणि सोन्या-चांदीचे दागिने घेण्याबरोबरच मालमत्तेत गुंतवणूक करण्याकडेही नागरिकांचा कल दिसला. रविवारची सुटी असल्याने नोकरदार मंडळी आणि कुटुंबांना खरेदीसाठी पुरेसा वेळ मिळाला.

इलेक्ट्रॉनिक्स बाजारात नवीन उत्पादनांना मागणी होती. श्रीकांत इलेक्ट्रॉनिक्सचे संचालक श्रीकांत भांडारकर यांनी सांगितले की, सणासुदीच्या काळात इलेक्ट्रॉनिक्स बाजारात ग्राहकांची चांगली वर्दळ आहे. सुटीचा फायदा घेऊन लोकांनी खरेदीला प्राधान्य दिले. टीव्ही, फ्रिज, वॉशिंग मशीन, वातानुकूलित यंत्रे, स्मार्टफोन आणि इतर घरगुती उपकरणे घेण्यात ग्राहकांनी रस दाखवला. आकर्षक सवलती, सोपे अर्थसाहाय्य आणि विविध उत्पादनांवरील ऑफर्स यामुळे ग्राहकांची गर्दी वाढली, असे त्यांनी सांगितले.

सराफा बाजारातही सणाची चमक दिसली. ८ बटुकभाई सन्सचे संचालक किशोर सेठ यांनी सांगितले की, सोन्याच्या वाढलेल्या किमतींचा खरेदीदारांवर फारसा परिणाम झालेला नाही. मागील वर्षाच्या तुलनेत यंदा सोने-चांदीच्या खरेदीत २० टक्क्यांनी वाढ झाली आहे, असे ते म्हणाले. सणासुदीच्या काळात दागिन्यांच्या खरेदीला विशेष महत्त्व असते. दसऱ्याच्या आधी सराफा शोरूममध्येही ग्राहकांची चांगली वर्दळ दिसून आली. लोकांनी सोन्या-चांदीच्या दागिन्यांसह पारंपरिक आणि आधुनिक डिझाइनचे दागिने पाहून खरेदीला पसंती दिली.

वाहनांच्या शोरूममध्येही रविवारी ग्राहकांची गर्दी झाली. नांगिया मोटर्सचे संचालक अक्षत नांगिया यांनी सांगितले की, दसरा हा वाहन खरेदीसाठी शुभ मानला जातो, त्यामुळे रविवारी वाहनांच्या शोरूममध्ये ग्राहकांची मोठी वर्दळ होती. दुचाकी आणि चारचाकी वाहनांची माहिती घेण्यासाठी, नवीन मॉडेल पाहण्यासाठी तसेच वाहनांचे आरक्षण करण्यासाठी ग्राहक शोरूममध्ये आले. वाहन कंपन्या आणि विक्रेत्यांकडून दिल्या जाणाऱ्या आकर्षक सवलती, अर्थसाहाय्याच्या सुविधा आणि इतर लाभांमुळे ग्राहकांची रुची वाढली, असेही त्यांनी सांगितले.