दुष्काळावर बोलताना ठाकरेंनी मांडली परभणीतील 14 वर्षांच्या युवराजची कहाणी

उद्धव ठाकरे यांनी दसरा मेळाव्यात राज्यातील दुष्काळाच्या परिस्थितीकडे सगळ्यांचे लक्ष वेधले. बोलताना त्यांनी राज्य सरकारबरोबरच केंद्र सरकारवरही निशाणा साधला. राज्यातली परिस्थिती किती गंभीर आहे, हे सांगण्यासाठी त्यांनी परभणीतील युवराज नावाच्या मुलाची गोष्ट सांगितली. ती सांगताना ठाकरे यांचाही कंठ दाटून आल्याचे दिसले.

दुष्काळामुळे शेतकऱ्यांवर कोणते संकट आले आहे, याची जाणीव त्यांनी उपस्थितांना करून दिली. युवराजची कथा ऐकताना उपस्थितांचेही डोळे पाणावले, असे दिसून आले.

आपल्या भाषणाची सुरुवात करताना ठाकरे म्हणाले, "हा दुष्काळ मोठा असणार आहे. आपल्याकडे दुष्काळात तेरावा महिना अशी म्हण आहे. तसंच हे सरकार आहे. डबल इंजिनचं सरकार नुसतं घोषणा करतंय." गेल्या वर्षी अतिवृष्टीत सगळं वाहून गेलं होतं, असं सांगून ते म्हणाले की तेव्हा मुख्यमंत्र्यांनी इतिहासातील सर्वात मोठं 31 हजार कोटींचं पॅकेज जाहीर केलं होतं. ज्यांची जमीन खरडून गेली, त्यांना हेक्टरी साडेतीन लाख रुपये जाहीर झाले होते, पण ते किती जणांना मिळाले, असा प्रश्न त्यांनी विचारला. पीकविमा किती जणांना मिळाला, हाही त्यांचा सवाल होता.

आता जी 5 हजार रुपयांची मदत केली गेली, ती उपकार नाहीत का, असे ठाकरे यांनी विचारले. विम्यासाठी जे निकष लावले होते, ते निकषच काढून टाकले, म्हणजे नुकसानभरपाई द्यायची गरजच पडणार नाही, असे ते म्हणाले. कर्जमाफी जाहीर झाली, पण ती कुणाला मिळाली हे माहीत नाही, असेही त्यांनी म्हटले. केंद्रीय पथक येऊन गेले, पण त्यांनी काय केले ते कुणालाच माहीत नाही, असे ठाकरे यांनी सांगितले.

यानंतर शेतकऱ्यांची अवस्था किती वाईट आहे, हे सांगताना ठाकरे म्हणाले की परभणीत झरी नावाचे एक गाव आहे. त्या गावात युवराज बुधवर नावाचा 14 वर्षांचा मुलगा होता. शाळेची सहल होती, म्हणून तो वडिलांच्या मागे लागला होता. वडील शेतकरी. सोयाबीन विकल्यावर पैसे येतील, त्यातून कपडे घेऊन सहलीला पाठवू, असे त्यांनी मुलाला सांगितले होते. पण सोयाबीन सुकले आहे हे मुलाने पाहिले. मग ते विकणार कसे आणि पैसे येणार कुठून, म्हणून दुपारी घरी कोणी नसताना त्या मुलाने आत्महत्या केली, असे ठाकरे यांनी सांगितले.

नवीन कपडेसुद्धा बाप आपल्या मुलाला देऊ शकत नाही, असे सांगून ठाकरे म्हणाले, "कल्पना करा, त्या आईबापाच्या मनात काय झालं असेल. पण कोणी गेलं नाही त्याच्याकडे बघायला." ही परिस्थिती सांगताना त्यांचा कंठ दाटून आला आणि उपस्थित लोकांचेही डोळे पाणावल्याचे दिसले.

पुढे ठाकरे म्हणाले, "हा माझ्या महाराष्ट्रातील गरीब शेतकरी. इथले गरीब शेतकरी असे जगतात आणि त्यांची पोरं अशी मरतात. त्या युवराजने कधी खेळण्यातलं हेलिकॉप्टरपण घेतलं नसेल, पण आमच्याकडचं गरीब शेतकऱ्याचं पोर पंचतारांकित शेतात हेलिकॉप्टर उडवत जातं. काय थोतांड चाललंय?" हे बोलताना त्यांनी उपमुख्यमंत्री एकनाथ शिंदे यांचे नाव घेतले नाही, पण त्यांच्यावर टोला मारला, असे वृत्तात म्हटले आहे.