चिपळूणजवळील खेर्डी एमआयडीसीत फर्निचर कारखान्याला भीषण आग; शॉर्ट सर्किटचा प्राथमिक अंदाज, कोट्यवधींचे नुकसान

चिपळूण शहरालगतच्या खेर्डी एमआयडीसी या औद्योगिक वसाहतीतील इम्पेरियल ट्रेडर्स या फर्निचर तयार करणाऱ्या कारखान्याला भीषण आग लागली आणि त्यात संपूर्ण कारखाना जळून खाक झाला. रात्रभर तीन फायर ब्रिगेडच्या मदतीने आग विझवण्याचे प्रयत्न सुरू होते. गुरुवारी पहाटे पाच वाजता आग आटोक्यात आल्यानंतर काही वेळाने ती पुन्हा भडकली. अशा प्रकारे जवळपास १५ तास आग आटोक्यात आणण्याचे प्रयत्न सुरू होते.

शॉर्ट सर्किटमुळे आग लागल्याचा प्राथमिक अंदाज व्यक्त करण्यात आला आहे. परदेशातून आयात केलेल्या १२ मशिनरीसह कारखान्यातील सर्व साहित्य या आगीत जळून खाक झाले असून त्यामुळे कोट्यवधी रुपयांचे नुकसान झाले आहे. मिळालेल्या माहितीनुसार, निहाल मालाणी आणि सोहेल फजलानी या दोघांनी एकत्रितपणे पार्टनरशिपमध्ये खेर्डी एमआयडीसीत सन २०२१ मध्ये इम्पेरियल ट्रेडर्स हा फर्निचर तयार करण्याचा कारखाना सुरू केला होता. या कारखान्यात ८ ते १० कामगार काम करत होते.

फर्निचर तयार करण्यासाठी मालाणी यांनी सुमारे ४ कोटी रुपये खर्च करून १२ मशिनरी खास परदेशातून आयात केल्या होत्या. या कारखान्यात घरासाठी लागणारे सर्व प्रकारचे फर्निचर तयार केले जात असे आणि त्याचबरोबर नामवंत कंपन्यांचे तयार फर्निचरही विक्रीसाठी ठेवले जात असे. बुधवारी रात्री ९ वाजण्याच्या सुमारास नेहमीप्रमाणे कारखाना बंद झाल्यावर सर्व कामगार आपापल्या घरी निघून गेले होते.

त्यानंतर साधारण साडेनऊ ते दहाच्या सुमारास कारखान्याला आग लागल्याची माहिती मालाणी आणि फजलानी यांना मिळाली. ही माहिती मिळताच त्यांनी चिपळूण पालिका तसेच लोटे येथील फायर ब्रिगेड बोलावल्या. मात्र बंब घटनास्थळी पोहोचेपर्यंत आग अधिकाधिक वाढतच गेली. मदतीसाठी मोठ्या संख्येने स्थानिक लोक जमले होते, मात्र कारखान्याच्या दोन्ही बाजूला इतर बांधकामे असल्याने मदतकार्यात अडचणी येत होत्या. तीन फायर ब्रिगेडच्या मदतीने आगीवर नियंत्रण मिळवण्याचे शर्थीचे प्रयत्न सुरू होते. रात्री एक वाजता अखेर आग आटोक्यात आली, पण कारखान्यात लाकडी साहित्य आणि भुसा मोठ्या प्रमाणात असल्याने आग वारंवार पुन्हा पेट घेत होती.

गुरुवारी पहाटे पाच वाजेपर्यंत बंबाच्या मदतीने आग विझवण्याचे प्रयत्न सुरू होते, मात्र सकाळी साडेनऊच्या सुमारास आग पुन्हा भडकली आणि अर्धवट जळालेले साहित्य पुन्हा पेटले. साडेदहाच्या सुमारास चिपळूण पालिका आणि लोटे येथील फायर ब्रिगेडच्या संयुक्त मदतीने अखेर आग पूर्णपणे आटोक्यात आणण्यात आली. ही फर्निचर कंपनी पाच वर्षांपूर्वी सुरू झाली होती. कारखान्याच्या इमारतीच्या शेडसाठी वापरलेले जड लोखंडी बीमदेखील आगीच्या तीव्र झळांमुळे तापून वाकले होते. लोखंडी साहित्य वगळता कारखान्यात इतर काहीही शिल्लक राहिले नव्हते.