मध्यम शहरांतही वजन कमी करण्याच्या उपचारांची मागणी वाढली, महिलांमध्ये मेडिकल वेट मॅनेजमेंटकडे कल
परवडणारे जीएलपी-१ पर्याय आणि डिजिटल आरोग्य सेवा यामुळे टियर-२ आणि टियर-३ शहरांमध्येही मेडिकल वेट मॅनेजमेंटची मागणी वाढली आहे, असे अहवालात म्हटले आहे.
वजन कमी करण्याची बाजारपेठ आता फक्त मोठ्या महानगरांपुरती राहिलेली नाही. परवडणारे जीएलपी-१ पर्याय आणि डिजिटल आरोग्य सेवा आता जास्त लोकांपर्यंत पोहोचत आहेत. त्यामुळे टियर-२ आणि टियर-३ शहरांमध्ये मेडिकल वेट मॅनेजमेंटची मागणी मोठ्या प्रमाणात वाढली आहे. म्हणजेच ही मागणी आता फक्त मेट्रो शहरांपुरती न राहता मध्यम आकाराच्या शहरांमध्येही दिसू लागली आहे.
अहवालानुसार, महिलांमध्ये वजन, मधुमेह आणि मेटाबॉलिक समस्यांसाठी डॉक्टरांच्या देखरेखीखालील उपचारांची मागणी वाढत असल्याचे दिसते. पीसीओएस (पॉलीसिस्टिक ओव्हरी सिंड्रोम), इन्सुलिन रेझिस्टन्स आणि लठ्ठपणा अशा स्थितींमुळे महिलांमध्ये वजन व्यवस्थापन उपचारांची गरज वाढू शकते, असेही अहवालात म्हटले आहे.
फार्मास्युटिकल्सच्या आकडेवारीनुसार, भारतातील जीएलपी-१ अॅगोनिस्ट बाजारपेठ मे २०२६ मध्ये अंदाजे १,९०६ कोटींपर्यंत पोहोचली. एका वर्षापूर्वी ही बाजारपेठ अंदाजे ५६५ कोटी होती. या वेगवान वाढीला मुख्यत्वे सेमाग्लुटाइडच्या कमी किमतीच्या जेनेरिक पर्यायांचा बाजारात झालेला प्रवेश कारणीभूत ठरला, असे या आकडेवारीत सांगितले आहे.
मार्च २०२६ मध्ये सेमाग्लुटाइडचे भारतीय पेटंट संपल्यानंतर अनेक देशांतर्गत कंपन्यांनी त्याच्या जेनेरिक आवृत्त्या बाजारात आणल्या. त्यामुळे उपचाराचा खर्च लक्षणीयरीत्या कमी झाला आहे. काही जेनेरिक पर्यायांची किंमत मूळ बँडपेक्षा खूपच कमी आहे. त्यामुळे टियर-२ आणि टियर-३ शहरांमध्येही जीएलपी-१-आधारित उपचारांची पोहोच वाढण्याची शक्यता आहे.
या बाजारातील प्रमुख औषधे सेमाग्लुटाइड आणि टिर्झपेटाइड ही आहेत. या औषधांचा प्रमुख उपयोग टाईप २ मधुमेह आणि वैद्यकीय वजन व्यवस्थापनासाठी होतो. बाजाराची पोहोच मेट्रो शहरांसोबतच टियर-२ आणि टियर-३ शहरांपर्यंत वाढत आहे.
जीएलपी-१ औषधे प्रत्येकासाठी योग्य नसतात, असे अहवालात म्हटले आहे. ही औषधे डॉक्टरांच्या सल्ल्यानुसार आणि त्यांच्या देखरेखीखालीच वापरली पाहिजेत, असेही त्यात नमूद आहे. तसेच सौंदर्यप्रसाधनांसाठी या औषधांचा वापर आणि गैरवापर याबाबत सावध राहण्याचा सल्ला तज्ज्ञ देतात.
महाराष्ट्राच्या संदर्भात अहवालात म्हटले आहे की, मुंबईशिवाय पुणे, नागपूर, नाशिक, संभाजीनगर आणि कोल्हापूर यांसारख्या शहरांमध्ये आरोग्य सेवा आणि तज्ज्ञ डॉक्टरांची उपलब्धता वाढवण्यासाठी ही बाजारपेठ महत्त्वाची ठरू शकते.
