चेन्नईत तिरुनिर्मलाई येथील तलावात चार बेपत्ता मुलांचे मृतदेह आढळले

शनिवारपासून बेपत्ता असलेल्या चार मुलांचे मृतदेह रविवारी चेन्नईच्या तिरुनिर्मलाई येथील तलावात आढळले. या घटनेने परिसरात एकच खळबळ उडाली आहे. मुलांचा मृत्यू नेमका कशामुळे झाला, याबद्दल उलटसुलट चर्चा सुरू आहे.

मृतांमध्ये दोन मुले आणि दोन मुली आहेत. ही चौघं क्रॉमपेटच्या लक्ष्मीपुरममधील कृष्टा स्ट्रीटवर राहत होती. के. देवदर्शन (12 वर्ष), डी. युवनेश (10 वर्ष), पूजा (13 वर्ष) आणि खुशी (13 वर्ष) अशी त्या चौघांची नावे आहेत.

देवदर्शन तिथल्या सरकारी शाळेत 7 वीत शिकत होता. पूजा आणि खुशी 8 वीत होत्या. युवनेश एका खाजगी शाळेत 6 वीचा विद्यार्थी होता. चौघेही एकाच भागात, एकाच रस्त्यावर राहणारी होती.

पोलिसांच्या म्हणण्यानुसार, शनिवारी दुपारी ही मुले घराबाहेर खेळताना शेवटची दिसली. त्यानंतर ती परिसरातून निघून गेली आणि घरी परतलीच नाहीत. मग कुटुंबीयांनी त्यांचा शोध सुरू केला.

आई-वडिलांनी नातेवाईक आणि मित्रांना फोन करून चौकशी केली. शोधासाठी त्यांनी व्हॉट्स अॅप ग्रुपचीही मदत घेतली. मुलांचे फोटो आणि माहिती शेअर करून, कुणाला त्यांच्याबद्दल काही माहिती असेल तर सांगा, असे आवाहन त्यांनी केले होते. शोधादरम्यान कुठेच ठावठिकाणा लागला नाही, म्हणून कुटुंबीय क्रॉमपेट पोलीस स्टेशनमध्ये गेले आणि मुले बेपत्ता झाल्याची तक्रार नोंदवली.

पोलिसांनी तातडीने तांबरम, एग्मोर आणि चेन्नई सेंट्रल रेल्वे स्टेशन तसेच केलंबक्कम बस टर्मिन्सवरील आपल्या सहकाऱ्यांना सतर्क केले. मात्र रविवारी वाईट बातमी आली. लक्ष्मीपुरमजवळच्या तिरुनीरमलाई पेरिया एरी तलावात फेरफटका मारायला गेलेल्या लोकांना पाण्यावर चार मृतदेह तरंगताना दिसले. त्यांनी लगेच पोलिसांना कळवले.

पोलीस आणि तामिळनाडू अग्निशमन दलाच्या बचाव पथकाने तलावात उतरून मृतदेह बाहेर काढले. तिथे हजर असलेल्या कुटुंबीयांनी एकच टाहो फोडला आणि सगळीकडे दुःखाचे वातावरण पसरले. चौघांचेही मृतदेह शवविच्छेदनासाठी तांबरम जिल्ह्यातील सरकारी रुग्णालयात पाठवण्यात आले आहेत.

ही मुले एवढ्या लांब तलावापर्यंत कशी पोहोचली आणि पाण्यात का उतरली, याचा शोध पोलीस घेत आहेत. तलावातील चिखलात ती रुतली असावीत आणि त्यामुळे बुडाली असावीत, अशी पोलिसांना शंका आहे. पोलीस वेगवेगळ्या बाजूंनी घटनेचा आढावा घेत आहेत. यात काही संशयास्पद आढळले तर त्या दिशेनेही तपास केला जाईल.