कोलकात्यातून २१ वर्षीय आरोपीला अटक, मुख्याध्यापिकेची ५.४३ लाखांची ऑनलाईन फसवणूक केल्याचा आरोप

चंद्रपूर सायबर पोलिसांनी पश्चिम बंगालमधील कोलकाता येथून एका २१ वर्षीय तरुणाला अटक केली आहे. एटीएममधून कमी आलेले पैसे परत देण्याच्या बहाण्याने एका ५८ वर्षीय मुख्याध्यापिकेच्या खात्यातून ५ लाख ४३ हजार रुपये काढल्याचा त्याच्यावर आरोप आहे.

अटक झालेल्याचे नाव अंगद सुरज प्रजापती (वय २१, रा. कोलकाता, पश्चिम बंगाल) असे आहे. पोलीस कोठडीची मुदत संपल्यानंतर आज त्याला न्यायालयात हजर करण्यात आले. न्यायालयाने त्याची न्यायालयीन कोठडीत रवानगी केली असून, त्याला चंद्रपूर जिल्हा कारागृहात ठेवण्यात आले आहे.

या प्रकरणाची सुरुवात ३० ऑगस्ट २०२६ रोजी झाली. त्या दिवशी मुख्याध्यापिकेने एका बँकेच्या एटीएममधून ५ हजार रुपये काढण्याचा प्रयत्न केला, पण मशीनमधून ९०० रुपये कमी आले. त्यांनी याबद्दल बँकेत रीतसर तक्रार नोंदवली होती.

काही दिवसांनी त्यांना एका अनोळखी क्रमांकावरून फोन आला. पोलिसांच्या माहितीनुसार, फोन करणाऱ्याने आपण बँक कर्मचारी असल्याचे भासवले आणि एटीएममधून ९०० रुपये कमी आल्याबद्दल विचारणा करून त्यांचा विश्वास संपादन केला.

त्यानंतर व्हाट्सऐपवर एक बनावट एपीके (APK) ॲप्लिकेशन पाठवून ते डाऊनलोड करायला लावण्यात आले. त्यात एटीएम पिन आणि सीव्हीव्ही (CVV) माहिती भरायला सांगितली गेली. यानंतर विविध ऑनलाईन व्यवहारांतून खात्यातील ५ लाख ४३ हजार रुपये परस्पर काढले गेले, असा आरोप आहे.

याप्रकरणी सायबर पोलीस ठाणे, चंद्रपूर येथे अपराध क्र. ००६/२०२६ नुसार भारतीय न्याय संहिता (BNS) २०२३ मधील कलम ३१८(४), ३१९(२), ६१(२), ३(५) सह माहिती तंत्रज्ञान कायदा २०००मधील कलम ६६ (क) आणि ६६ (ड) अन्वये गुन्हा नोंदवून तपास सुरू करण्यात आला.

पोलीस अधीक्षक आयुष नोपाणी, अपर पोलीस अधीक्षक ईश्वर कातकडे आणि उपविभागीय पोलीस अधिकारी प्रमोद चौगुले यांच्या मार्गदर्शनाखाली सायबर पोलीस ठाण्याचे पोलीस निरीक्षक सुनिल गाडे यांच्या नेतृत्वात विशेष तपास पथकाने ही कारवाई केली.

सहाय्यक पोलीस निरीक्षक निलेश गिरी, पोलीस अंमलदार राहुल पोंदे, अनिमेश भोंगळे आणि पंकज बावणे यांचे पथक कोलकात्याला गेले. तिथे स्थानिक पोलिसांच्या मदतीने सलग चार दिवस आणि रात्र शोधमोहीम राबवण्यात आली. तांत्रिक विश्लेषणाच्या आधारे उल्डाडांगा पोलीस स्टेशन हद्दीतून संशयित आरोपी अंगद प्रजापती याला ताब्यात घेऊन अटक करण्यात आली.

या कामगिरीत सपोनि राजेंद्र सोनवणे, सपोनि अनिसा सय्यद, सपोउपनि मुजावर अली, पोहवा कार्तिक खनके, उमेश रोडे, पोअं गुणवंत मुंडके, साहिल आवारी, मपोअं छाया शंभरकर, पुजा जांभुळे, अंजली घिवे आणि श्रुतीका घाईत (सर्व सायबर पोलीस स्टेशन, चंद्रपूर) यांचाही सहभाग होता.

आरोपीला चंद्रपूरला आणल्यानंतर ३ दिवसांची पोलीस कोठडी घेण्यात आली. या कोठडीत कसून चौकशी करून त्याचे इतर साथीदार आणि गुन्ह्याचे संपूर्ण नेटवर्क यांचा शोध घेतला जात आहे. पुढील तपास सुरू आहे.

पोलीस प्रशासनाने नागरिकांना कोणत्याही अनोळखी व्यक्तीच्या प्रलोभनाला बळी पडू नका, असे आवाहन केले आहे. बँक अधिकारी फोनवर कधीही गोपनीय माहिती किंवा एपीके फाईल मागत नाहीत, त्यामुळे सावध राहावे, असेही पोलिसांनी सांगितले.