चंद्रपूरमध्ये अवैध दारूचा विळखा; युवकाच्या मृत्यूने खळबळ, कारवाईची मागणी

राजुरा तालुक्यातील पाचगाव गावात अवैध दारू विक्रीने थैमान घातले असून यामुळे एका तरुणाचा बळी गेल्याची घटना समोर आली आहे. या गंभीर प्रकाराने गावात खळबळ उडाली असून प्रशासनाकडून तातडीने कारवाईची मागणी केली जात आहे. गावातील बिघडत चाललेल्या सामाजिक वातावरणाचा आणि वाढत्या व्यसनाधीनतेचा हा परिणाम असल्याचे सांगण्यात येत आहे.

निवेदनानुसार, गावात काही व्यक्तींकडून बेकायदेशीरपणे दारूची विक्री सुरू असून याचा थेट परिणाम गावातील सामाजिक वातावरणावर होत असल्याचे सांगण्यात आले. विशेषतः तरुण पिढीमध्ये व्यसनाधीनता वाढत चालली असून याचा फटका त्यांच्या आरोग्याला, कौटुंबिक आयुष्याला आणि एकूणच भवितव्याला बसत असल्याची भीती निवेदनात व्यक्त करण्यात आली आहे. गावातील अनेक संसार अशा अवैध दारू विक्रीमुळे उद्ध्वस्त होत असल्याचेही निवेदनात नमूद करण्यात आले आहे.

२० सप्टेंबर २०२६ रोजी पाचगाव येथील रहिवासी कैलास संतोष तोडेतिवार (वय २१) या तरुणाने दारूच्या नशेत विष प्राशन करून आत्महत्या केली. या दुर्दैवी घटनेची गंभीर दखल घेत कृषी उत्पन्न बाजार समितीचे सभापती तिरूपती इंदुरबार यांनी थेट जिल्हा पोलीस अधीक्षकांची भेट घेतली आणि निवेदन सादर केले.

इंदुरबार यांनी आपल्या निवेदनात पोलीस अधीक्षकांना संबंधित पोलीस अधिकारी आणि राज्य उत्पादन शुल्क विभागाला योग्य त्या सूचना तातडीने द्याव्यात, अशी विनंती केली आहे. तसेच भविष्यात अशा प्रकारे अवैध दारू विक्री होऊ नये यासाठी कायमस्वरूपी उपाययोजना कराव्यात, अशी मागणीही त्यांनी केली. या निवेदनाची एक प्रत राज्य उत्पादन शुल्क विभाग, चंद्रपूरच्या अधीक्षकांनाही देण्यात आली असून त्यांच्याकडूनही आवश्यक कायदेशीर कारवाईची मागणी करण्यात आली आहे.

याप्रकरणी खासदार प्रतिभाताई धानोरकर यांनीही जिल्हा पोलीस अधीक्षकांची भेट घेऊन दोषींवर कठोर कारवाई करावी अशी मागणी केली. अवैध दारूची विक्री, साठवणूक आणि वाहतूक रोखण्यासाठी पोलिसांची नियमित गस्त वाढवावी आणि प्रभावी प्रतिबंधात्मक उपाययोजना कराव्यात, अशा सूचनाही त्यांनी जिल्हा पोलीस अधीक्षकांना दिल्या.

यावेळी खासदार प्रतिभाताई धानोरकर यांच्यासह युवक काँग्रेसचे जिल्हाध्यक्ष शंतनू धोटे, महिला जिल्हाध्यक्ष ॲड. कुंदाताई जेनेकर, राजुरा काँग्रेसचे तालुकाध्यक्ष रंजन लांडे, शहराध्यक्ष हरजीतसिंग संधू, नगरसेवक एजाज अहमद, नगर पंचायत सभापती पूनम गिरसावळे, अन्नुताई संधू, नगरसेविका इंदुबाई निकोडे, मंगला मोकडे, पोर्णिमा सोयाम, सुमित्राबाई कुचनकर, संघपाल देठे आणि कुणाल मोकळे यांच्यासह राजुरा काँग्रेसचे अनेक पदाधिकारी व कार्यकर्ते उपस्थित होते.