तुळजापूरजवळ कंटेनरचा अपघात, तीन महिन्यांपूर्वी लग्न झालेल्या बीडच्या तरुणाचा मृत्यू

बीड जिल्ह्यातील हाटोला या गावच्या एका तरुणाचा तुळजापूरजवळ झालेल्या अपघातात दुर्दैवी अंत झाला. अवघ्या तीन महिन्यांपूर्वीच त्याचं लग्न झालं होतं आणि नव्या संसाराची सुरुवात होत असतानाच हा अपघात घडला. चंद्रकांत आप्पा गर्जे, वय २७, रा. हाटोला असं या मृत तरुणाचं पूर्ण नाव आहे.

चंद्रकांत हे व्यवसायाने मालवाहतूक कंटेनर चालवायचे. रोजच्याप्रमाणे मंगळवारी ते कंटेनर घेऊन सोलापूरच्या दिशेने निघाले होते. ते तुळजापूरजवळ महामार्गावरून जात असताना समोरचं एक वाहन अचानक थांबलं. समोरचं वाहन थांबताच चंद्रकांत यांनी आपला कंटेनर थांबवण्यासाठी लगेच ब्रेक दाबला. मात्र कंटेनरवरचं नियंत्रण सुटलं आणि ब्रेक दाबूनही कंटेनर वेळेत थांबण्याआधीच समोरील वाहनाला जाऊन धडकला. या जोरदार धडकेत चंद्रकांत गंभीर जखमी झाले.

अपघात होताच चंद्रकांत यांना तातडीने अहिल्यानगर इथल्या रुग्णालयात दाखल करण्यात आलं. डॉक्टर त्यांच्यावर सातत्याने उपचार करत होते, पण त्यांची प्रकृती गंभीर असल्यामुळे कुटुंबाची चिंता वाढतच गेली. उपचार सुरू असतानाच बुधवारी संध्याकाळी चंद्रकांत यांची प्रकृती अधिकच खालावली आणि त्यांचं निधन झालं. त्यानंतर गुरुवारी त्यांच्या हाटोला या मूळ गावी त्यांच्यावर अंत्यसंस्कार करण्यात आले.

चंद्रकांत यांचं लग्न अवघ्या तीन महिन्यांपूर्वीच झालं होतं. लग्नानंतर नवा संसार नुकताच सुरू होत असतानाच हे दुर्दैवी संकट अख्ख्या कुटुंबावर कोसळलं. घर चालवण्याची आणि नव्या संसाराची जबाबदारी पेलण्यासाठी ते कंटेनर चालवण्याचं काम करत होते. रोज मेहनत करून घराला आर्थिक हातभार लावण्याचा त्यांचा सतत प्रयत्न होता, मात्र या अचानक झालेल्या अपघातानं त्यांच्या कुटुंबावर मोठं संकट आणलं आहे.

चंद्रकांत यांच्या निधनाची बातमी हाटोला गावात पोहोचताच नातेवाईक आणि गावकऱ्यांमध्ये शोककळा पसरली. काही महिन्यांपूर्वीच लग्न झालेल्या तरुणाचा असा अचानक मृत्यू झाल्यानं कुटुंबीयांना मोठा धक्का बसला आहे. चंद्रकांत यांच्या पश्चात पत्नी, वडील आणि बहीण असा परिवार आहे. तरुण मुलगा गमावल्यानं कुटुंबावर दुःखाचा डोंगर कोसळला असून संपूर्ण गावातही याबद्दल हळहळ व्यक्त होत आहे.