रोज सकाळी भिजवलेले काळे चणे खाल्ल्यास शरीराला मिळतात भरपूर फायदे

काळे चणे हे फायबरचा चांगला स्रोत मानले जातात आणि त्यात लोहासोबतच अनेक जीवनसत्त्वे आणि खनिजेही भरपूर प्रमाणात असतात. वजन कमी करण्याच्या प्रयत्नात असलेले लोक रात्रभर भिजवलेले काळे चणे नेहमी खातात. पण रोज सकाळी असे भिजवलेले चणे खाल्ल्याने नेमके कोणते आरोग्य फायदे मिळतात, हे दिल्लीतील श्री बालाजी ॲक्शन मेडिकल इन्स्टिट्यूटच्या मुख्य आहारतज्ज्ञ प्रिया पालीवाल यांनी सांगितले आहे. त्यांच्या मते सकाळी भिजवलेले काळे चणे खाणे हा एक सोपा आणि पौष्टिक पर्याय ठरू शकतो.

प्रिया पालीवाल यांच्या म्हणण्यानुसार, सकाळी काळे चणे खाल्ल्याने स्नायूंच्या अशक्तपणासारख्या अनेक आरोग्य तक्रारींपासून आराम मिळू शकतो. मात्र हे फायदे सगळ्यांनाच सारखे मिळतात असे नाही, आणि काही लोकांनी हे चणे खाणे टाळावे, असेही त्यांनी नमूद केले. कोणासाठी हे चणे फायदेशीर ठरतात आणि कोणी सावधगिरी बाळगावी, याबाबत त्यांनी सविस्तर मार्गदर्शन केले.

काळे चणे हे प्रथिने, फायबर, लोह, फोलेट, मॅग्नेशियम आणि इतर अनेक आवश्यक पोषक घटकांचा चांगला स्रोत आहेत. रात्रभर पाण्यात भिजवलेले हे चणे सकाळी खाल्ल्यास ते दीर्घकाळ टिकणारी ऊर्जा देतात आणि पोट भरल्यासारखे वाटायला मदत करतात. म्हणजेच सकाळी चणे खाल्ल्यावर बराच वेळ भूक लागत नाही आणि शरीराला सतत ऊर्जा मिळत राहते. त्यामुळेच वजन कमी करण्याच्या प्रवासात असलेल्यांसाठी हा एक चांगला पर्याय मानला जातो, असे तज्ज्ञांनी सांगितले.

तज्ज्ञांच्या मते काळ्या चण्यांमधील फायबर पचनसंस्थेसाठी फायदेशीर असून बद्धकोष्ठता कमी करायलाही मदत करू शकतो. पण ज्यांना चणे खाल्ल्यानंतर गॅस, पोट फुगणे किंवा अपचनाचा त्रास होतो, त्यांनी याचे सेवन मर्यादित ठेवावे असा सल्ला दिला जातो. अशा व्यक्तींनी एकदम जास्त प्रमाणात चणे खाण्याऐवजी सुरुवातीला कमी प्रमाणात खाणे चांगले असल्याचेही सांगण्यात आले आहे, जेणेकरून शरीराला त्याची सवय होईल.

काळ्या चण्यांमधील प्रथिने स्नायूंची देखभाल आणि शरीराच्या सर्वसाधारण कामकाजासाठी गरजेची असतात. यासोबतच त्यात असलेल्या लोहामुळे हे एक पौष्टिक अन्न बनते. मात्र केवळ चणे खाल्ल्याने शरीराची लोहाची संपूर्ण गरज पूर्ण होत नाही, त्यामुळे सकाळी भिजवलेल्या चण्यांसोबत संतुलित नाश्ता करणे महत्त्वाचे असल्याचे तज्ज्ञांनी स्पष्ट केले आहे. म्हणजेच केवळ चण्यांवर अवलंबून न राहता, नाश्त्यात इतर पौष्टिक पदार्थांचाही समावेश असायला हवा.

आहारतज्ज्ञांनी असाही सल्ला दिला आहे की चणे पूर्णपणे धुऊन पुरेसा वेळ भिजवून ठेवावेत, जेणेकरून ते नीट फुगतील आणि पचायला सोपे होतील. ज्यांना काही वैद्यकीय समस्या आहेत, पचनाचा त्रास आहे किंवा जे कोणत्या विशिष्ट वैद्यकीय आहाराचे पालन करत आहेत, त्यांनी नियमितपणे मोठ्या प्रमाणात चणे खाण्याआधी डॉक्टरांचा सल्ला घ्यावा, असे तज्ज्ञांनी नमूद केले आहे.