भवानीनगरच्या छत्रपती कारखान्याचे २६ दिवसांत २ लाख १ हजार ६४९ मेट्रिक टन गाळप

भवानीनगर येथील श्री छत्रपती सहकारी साखर कारखान्याने यंदाच्या गळीत हंगामात दोन लाख मेट्रिक टन गाळपाचा महत्त्वाचा टप्पा ओलांडला आहे. ६ नोव्हेंबरअखेर अवघ्या २६ दिवसांत कारखान्याने एकूण २ लाख १ हजार ६४९ मेट्रिक टन उसाचे गाळप केले. संचालक मंडळाने नीट नियोजन करून काम केल्यामुळे हे यश मिळाल्याची नोंद आहे. या कामगिरीमुळे सभासद आणि कामगार या दोघांमध्येही उत्साहाचे वातावरण आहे.

कारखान्याचे अध्यक्ष पृथ्वीराज जाचक यांनी 'वजन चोख, पैसे रोख' हे धोरण जाहीर केले होते. त्याची आता प्रभावीपणे अंमलबजावणी सुरू आहे. ऊस उत्पादकांना उसाचे योग्य वजन मिळते आणि पैसेही वेळेत मिळतात, त्यामुळे कारखान्यावरचा विश्वास आणखी पक्का झाला आहे. याचा परिणाम म्हणून कारखान्याच्या कार्यक्षेत्राबाहेरच्या वेगवेगळ्या भागांतील ऊस उत्पादकही गाळपासाठी आपला ऊस छत्रपती कारखान्याला देण्यास प्राधान्य देत आहेत.

चालू हंगामासाठी प्रतिटन ३ हजार ५०१ रुपये पहिली उचल देण्याचा निर्णय अध्यक्ष पृथ्वीराज जाचक, उपाध्यक्ष शिवाजीराव निंबाळकर आणि संचालक मंडळाने घेतला आहे. आर्थिक अडचणींचा सामना करावा लागत असतानाही सभासद, कामगार आणि पुरवठादारांची देणी वेळेवर देण्याची भूमिका कारखान्याने कायम ठेवली आहे. कामगारांना १५ टक्के बोनस देण्याचाही निर्णय झाला आहे. त्यामुळे कारखान्याच्या आर्थिक व्यवहारांबद्दल विश्वासार्हता तयार झाली आहे.

६ नोव्हेंबरच्या आकडेवारीनुसार एका दिवसात ८ हजार ६९३ टन उसाचे गाळप झाले. आतापर्यंत १ लाख ८९ हजार १०० क्विंटल साखरेचे उत्पादन झाले आहे. आजची साखर रिकव्हरी १०.४३ टक्के असून हंगामातील सरासरी रिकव्हरी ९.६५ टक्के नोंदवली गेली आहे.

यंदा गळीत हंगाम मागील वर्षांपेक्षा लवकर सुरू करण्यात आला. योग्य नियोजन, ऊस उत्पादकांना दिलेले प्राधान्य, वेळेवर होणारी बिले आणि कामगारांचे सहकार्य यामुळे गाळपाला गती मिळाली आहे. कारखान्याच्या मशिनरीची कामे वेळेत आणि नियोजनबद्ध पद्धतीने झाल्यामुळे रोजची गाळप क्षमता आठ हजार मे. टनांपेक्षा जास्त आहे.

कारखान्याच्या सहवीज निर्मिती प्रकल्पातून या हंगामात आतापर्यंत ८४,५१,८०० युनिट वीज तयार झाली आहे. त्यापैकी ५३,३०,००० युनिट विजेची निर्यात करण्यात आली आहे.

गेल्या वर्षीच्या गळीत हंगामात ६ तारखेपर्यंत कारखान्याने फक्त २३,५५० मे. टन उसाचे गाळप केले होते. सध्याचा गाळपाचा वेग पाहता, यंदाच्या गळीत हंगामात छत्रपती कारखाना उच्चांकी गाळप करण्याची शक्यता व्यक्त केली जात आहे.