भारतीय गोलंदाजांपुढे न्यूझीलंड ढेपाळले; अर्शदीपचे ४ बळी, भारतासमोर १८६ धावांचे आव्हान

भारत आणि न्यूझीलंड यांच्यातील पहिल्या एकदिवसीय सामन्यात भारतीय गोलंदाजांनी न्यूझीलंडच्या फलंदाजांना चांगलेच जेरीस आणले. नाणेफेकीनंतर भारताने न्यूझीलंडला प्रथम फलंदाजीला बोलावले. किवी संघाला भारतीय गोलंदाजांचा नीट सामना करता आला नाही आणि त्यांना ५० षटकेही पूर्ण खेळता आली नाहीत. आता भारतासमोर १८६ धावांचे आव्हान आहे.

अर्शदीप सिंगने चार बळी घेतले. गुरनूर ब्रार आणि अंशुल कंबोज यांनी प्रत्येकी दोन बळी टिपले. रोहित शर्माने जबरदस्त थ्रो करून डॅरिल मिचेलला धावबाद केले. आजच्या सामन्यासाठी भारताच्या प्लेइंग इलेव्हनमध्ये चार वेगवान गोलंदाज घेतले होते आणि या सगळ्यांनीच कमाल केली. स्टार फिरकी गोलंदाज कुलदीप यादवला मात्र संघातून वगळण्यात आले. भारत आणि न्यूझीलंड यांच्यात पाच एकदिवसीय सामन्यांची मालिका होणार आहे.

सुरुवातीला अकीब नबीच्या चौथ्या षटकात नमन धीरने टिम सायफर्टचा झेल सोडला आणि त्याला जीवदान मिळाले. पण पाचव्या षटकात श्रेयस अय्यरने काही चूक केली नाही. विल यंगने अर्शदीप सिंगचा चेंडू हवेत उडवला आणि श्रेयसने तो सहज पकडला. यंगने ९ धावा केल्या. पाचव्या षटकात न्यूझीलंडची धावसंख्या १ गडी बाद २२ होती.

नवव्या षटकात अर्शदीपने हेन्री निकोल्सला बाद केले आणि नमन धीरने यावेळी झेल घेतला. न्यूझीलंडची धावसंख्या २ गडी बाद ४० झाली. डॅरिल मिचेल टिम सायफर्टला साथ देण्यासाठी मैदानात आला.

अंशुल कंबोजने अचूक मारा केला. त्याने आपल्या चार षटकांत फक्त ८ धावा दिल्या. न्यूझीलंडचा कर्णधार टॉम लॅथम गुरनूर ब्रारच्या गोलंदाजीवर ३ धावांवर बाद झाला. गुरनूरने स्वतःच्याच गोलंदाजीवर डाव्या हाताने अप्रतिम झेल घेतला. त्यामुळे न्यूझीलंडने ८४ धावांवर चौथी विकेट गमावली.

त्यानंतर रोहित शर्माने झेप घेत थ्रो केला आणि मिचेल माघारी परतला. त्यामुळे १०० धावांच्या आतच न्यूझीलंडचे पाच फलंदाज बाद झाले. २२ षटकांनंतर धावसंख्या ९९/५ होती. भारताने न्यूझीलंडवर पूर्ण दबाव ठेवला. मिचेल सँटनरला अंशुल कंबोजने त्रिफळाचीत केले. त्याने १६ चेंडूंत ४ धावा केल्या. २७ षटकांनंतर संघाची धावसंख्या ६ गडी बाद ११३ होती. ग्लेन फिलिप्स मात्र क्रीजवर टिकून होता. विराट कोहलीने अंशुल कंबोजच्या गोलंदाजीवर सेकंड स्लिपमध्ये अप्रतिम झेल घेऊन नॅथन स्मिथला (१) बाद केले. २८.३ षटकांत न्यूझीलंडची धावसंख्या ७ गडी बाद ११५ झाली.

अर्शदीप सिंगने काईल जेमिसनला (१) कव्हरमध्ये विराट कोहलीकरवी झेलबाद केले. ही अर्शदीपची सामन्यातील तिसरी विकेट होती. तेव्हा न्यूझीलंडची धावसंख्या ८ गडी बाद १३५ होती आणि संघ अडचणीत दिसत होता. पुढे अर्शदीपनेच ग्लेन फिलिप्सला (३०) मिड-ऑफमध्ये श्रेयस अय्यरकरवी झेलबाद केले. ३५.१ षटकांत ९ बाद १४६ धावसंख्येवर ही नववी विकेट पडली आणि अर्शदीपची चौथी विकेट ठरली.

दहाव्या विकेटसाठी डफी आणि टिकनर यांनी चांगली भागीदारी केली आणि न्यूझीलंडच्या आशा जिवंत ठेवल्या. त्यांनी शेवटच्या विकेटसाठी ३९ धावा जोडल्या. अखेर गुरनूर ब्रारने ही जोडी फोडली.