बेल्हे बसस्थानकावरील नियंत्रक कक्ष सात वर्षांपासून बंद, प्रवाशांचे हाल

अहिल्यानगर आणि पुणे जिल्ह्याच्या सीमेवर मोक्याच्या जागी असलेले बेल्हे बसस्थानक सध्या प्रशासनाच्या दुर्लक्षामुळे अनेक अडचणींनी घेरले गेले आहे. या ठिकाणचा वाहतूक नियंत्रक कक्ष गेली सहा ते सात वर्षे बंद अवस्थेत पडून आहे. त्यामुळे येथून प्रवास करणारे नागरिक, विद्यार्थी आणि ज्येष्ठ नागरिक यांना मोठा त्रास सोसावा लागत आहे. या परिसरात प्रवाशांची संख्या सतत वाढत असून अनेक शैक्षणिक संस्थाही आहेत, त्यामुळे हे केंद्र खूप महत्त्वाचे मानले जाते. तरीही एसटी महामंडळाकडून याबाबत सातत्याने दुर्लक्ष होत असल्याने परिसरातील ग्रामस्थांमध्ये तीव्र नाराजी आहे.

बेल्हे भागातून अहिल्यानगर, कल्याण, पारनेर, सुपा तसेच आसपासच्या गावांकडे जाण्यासाठी रोज शेकडो लोक एसटी बसचा वापर करतात. पण प्रत्यक्षात बसस्थानकावरचा नियंत्रक कक्षच बंद असल्यामुळे कोणती बस केव्हा येणार, कुठल्या मार्गाने जाणार आणि किती फेऱ्या आहेत, याची नेमकी माहिती प्रवाशांपर्यंत पोहोचत नाही. यामुळे लोकांना तासन्‌तास स्थानकावर उभे राहून वाट पाहावी लागते.

या भागात नावाजलेली महाविद्यालये आणि शाळा असल्याने विद्यार्थ्यांची स्थानकावर मोठी गर्दी असते. नियंत्रक कक्ष बंद असल्याने विद्यार्थ्यांना मासिक बस पास काढणे, तो पुन्हा नूतनीकरण करणे किंवा शैक्षणिक सवलतीच्या योजनांची माहिती मिळवणे कठीण होऊन बसले आहे. कक्ष सुरू झाल्यास या सगळ्या सुविधा एकाच जागी विद्यार्थ्यांना मिळू शकतील.

नियंत्रक नसल्यामुळे स्थानकावर येणाऱ्या एसटी बसची कोणतीही अधिकृत नोंद ठेवली जात नाही. याचाच फायदा घेत अनेक चालक आणि वाहक बस बेल्हे स्थानकात न आणता परस्पर बायपास मार्गाने घेऊन जातात. त्यामुळे स्थानकावर थांबलेल्या प्रवाशांना वेळेवर बस मिळत नाही आणि अनेकदा रात्रीच्या वेळी महिला व ज्येष्ठ नागरिकांचे मोठे हाल होतात.

एकीकडे एसटी महामंडळ तोट्यातून बाहेर पडण्यासाठी उत्पन्न वाढवण्याचे नवे मार्ग शोधत असताना, दुसरीकडे भरपूर प्रवासी असलेले बेल्हे बसस्थानक मात्र वर्षानुवर्षे दुर्लक्षित राहिले आहे. ग्रामपंचायत आणि स्थानिक ग्रामस्थांनी वारंवार पाठपुरावा करून आणि तक्रारी देऊनही प्रशासनाने अजून कोणतीच ठोस उपाययोजना केलेली नाही. त्यामुळे नियंत्रक कक्ष असूनही सुविधा का मिळत नाहीत, असा संतप्त सवाल आता प्रवासी विचारत आहेत.

विद्यार्थ्यांचे होणारे शैक्षणिक नुकसान, पास काढताना होणारी गैरसोय आणि विस्कळीत झालेली बस वाहतूक लवकरात लवकर सुरळीत करण्यासाठी बेल्हे येथील बंद असलेला वाहतूक नियंत्रक कक्ष तातडीने सुरू करावा आणि तिथे कायमस्वरूपी पूर्णवेळ वाहतूक नियंत्रकाची (टीआय) नियुक्ती करावी, अशी ठाम मागणी स्थानिक नागरिक आणि प्रवाशांकडून केली जात आहे.