2026 Pulsar NS200 आणि N250 मध्ये आता गूगल मॅप्स, 5 इंच TFT स्क्रीन आणि नवे फीचर्स
बजाज ऑटो दिवाळीच्या मुहूर्तावर पल्सर सीरिजमधील NS200 आणि N250 चे अपडेटेड मॉडेल्स बाजारात आणणार आहे.
बजाज ऑटो आपल्या पल्सर सीरिजमध्ये मोठा बदल करणार आहे. दिवाळीच्या मुहूर्तावर कंपनी 2026 Bajaj Pulsar NS200 आणि Pulsar N250 ही दोन नवी मॉडेल्स लाँच करणार आहे. बजाज ऑटोचे मार्केटिंग हेड सुमीत नारंग यांनी हे लाँच होणार असल्याचं स्वतः सांगितलं आहे. नव्या NS200 आणि N250 मध्ये डिझाइनसोबतच अनेक प्रीमियम फीचर्स दिले जाणार आहेत.
या दोन्ही बाईक्समधलं सगळ्यात मोठं आकर्षण म्हणजे 5 इंच TFT कलर डिजिटल डिस्प्ले. ही स्क्रीन ब्लूटूथ आणि वायफायच्या मदतीनं फोनला कनेक्ट करता येईल, त्यामुळे स्क्रीनवर गूगल मॅप्स मिररिंग करून नेव्हिगेशन वापरता येणार आहे. RC बुक, इन्शुरन्स पेपर्स आणि ड्रायव्हिंग लायसन्ससारखी कागदपत्रं डिजिटल स्वरूपात साठवण्याचीही सोय दिली आहे. हँडलबारवर म्युझिक कंट्रोल्स आणि प्रीमियम स्विचगियर सुद्धा मिळणार आहे.
NS200 मध्ये सस्पेन्शनबाबत मोठा बदल करण्यात आला असून त्यात WP Performance Systemsचं WP Apex USD सस्पेन्शन फोर्क्स बसवलं आहे. हेच तंत्रज्ञान KTM आणि Husqvarna सारख्या ब्रँडच्या बाईक्समध्ये वापरलं जातं. यामुळे राईड क्वालिटी आणि कॉर्नरिंग स्टॅबिलिटी सुधारेल, अशी अपेक्षा आहे. रायडरच्या गरजेप्रमाणे सेट करता येणारे ॲडजस्टेबल लीव्हर्सही सोबत मिळतील.
नव्या पल्सर मॉडेल्समध्ये चार रायडिंग मोड्स दिले आहेत - Rain, Sport, Road आणि Off Road. रस्त्याची स्थिती आणि गरजेनुसार हे मोड्स बदलता येतील. स्पोर्टी रायडिंग आवडणाऱ्यांसाठी लॅप टायमर हे खास फीचर आहे, ज्यामुळे ट्रॅकवर लॅपची वेळ आणि स्पीड मोजता येईल. उजव्या हँडलबारवर हॅझार्ड लाईट आणि इंजिन स्टार्ट/स्टॉप कंट्रोल्सही आहेत. एवढे फीचर्स आणि हार्डवेअर अपडेट्स असूनही इंजिनमध्ये मात्र मोठा बदल झालेला नाही. NS200 मध्ये 199.5cc सिंगल सिलेंडर लिक्विड कूल्ड इंजिन आहे, तर N250 मध्ये 249cc सिंगल सिलेंडर एअर/ऑईल कूल्ड इंजिन दिलं आहे. N250 चं इंजिन 5-स्पीड गिअरबॉक्ससह 24.2 bhp पॉवर आणि 21.5 Nm टॉर्क देतं. मायलेजबाबत बोलायचं झाल्यास NS200 साधारण 35 ते 40 kmpl, तर N250 साधारण 32 ते 36 kmpl मायलेज देऊ शकते.
2026 Pulsar NS200 आणि N250 ची अधिकृत किंमत कंपनी लाँचच्या वेळी जाहीर करणार आहे. दिवाळीपूर्वी या बाईक्स बाजारात येण्याची शक्यता वर्तवली जात आहे. सुरुवातीला तामिळनाडूमधील अधिकृत बजाज शोरूम्समध्ये बुकिंग सुरू होणार असल्याचं सांगण्यात आलं आहे. नवा TFT डिस्प्ले, गूगल मॅप्स नेव्हिगेशन, चार रायडिंग मोड्स, WP Apex USD सस्पेन्शन आणि लॅप टायमर या फीचर्समुळे या दोन्ही बाईक्सकडे ग्राहकांचं लक्ष लागलं आहे.
