बजाज पल्सरचा कमबॅक प्लॅन, 125 आणि 150 नव्या अवतारात मार्केट शेअर परत मिळवणार

भारतीय मोटरसायकल मार्केटमध्ये तब्बल 25 वर्षांचा प्रवास पूर्ण केलेल्या बजाज पल्सर या ब्रँडसमोर आता स्पर्धेचे मोठे आव्हान उभे राहिले आहे. देशातील विक्रीवर दबाव असताना परदेशातील निर्यात मात्र वेगाने वाढतच आहे. याच पार्श्वभूमीवर बजाज ऑटोने आपल्या लोकप्रिय पल्सर 125 आणि पल्सर 150 या दोन मॉडेल्सना मोठे अपडेट देऊन नव्याने मैदानात उतरवण्याची तयारी केली आहे. या दोन्ही बाइक्सचा ओळखीचा क्लासिक लूक तसाच ठेवत त्यांच्या प्लॅटफॉर्म आणि मेकॅनिकल भागांमध्ये मात्र मोठे बदल करण्यात आले आहेत, म्हणजे बाहेरून ओळख जुनीच राहणार असली तरी आतमध्ये मोठी उलथापालथ झाली आहे.

125cc सेगमेंट हे भारतातील सर्वात मोठ्या मोटरसायकल मार्केटपैकी एक मानले जाते. एप्रिल ते ऑगस्ट 2026 या काळात याच सेगमेंटमध्ये होंडाने 17.79 लाख युनिट्सच्या विक्रीसह आघाडी घेतली. बजाजची विक्री याच काळात 7.93 लाख युनिट्स इतकी राहिली. हिरोने 6.17 लाख तर TVS ने 4.27 लाख युनिट्सची विक्री केली. या सगळ्यात बजाज पल्सर 125 ची विक्री 3 टक्क्यांनी कमी झाली, तर TVS Raider ची विक्री 7 टक्क्यांनी वाढली. रायडरचं स्पोर्टी डिझाइन आणि त्यातील फीचर्स, तसेच हिरो Xtreme 125R सारख्या बाइक्स यामुळे पल्सरसमोर स्पर्धा वाढत चालली आहे.

150cc सेगमेंटमध्येही चित्र फारसे वेगळे नाही. एप्रिल ते ऑगस्ट 2026 या काळात 125cc-150cc सेगमेंटमधील देशांतर्गत विक्री एकूण 49.5 टक्क्यांनी वाढली, पण याच काळात बजाजची विक्री तब्बल 34 टक्क्यांनी घसरली. त्यामुळे या सेगमेंटमधील बजाजचा मार्केट शेअर सुमारे 18 टक्क्यांपर्यंत खाली आला. आता 125cc बाइक्स जास्त फीचर्स देऊ लागल्या आहेत, तर 160cc मोटरसायकल तुलनेने कमी किमतीत जास्त परफॉर्मन्स देतात. यामुळे पल्सर 150 ला वरून आणि खालून अशा दोन्ही बाजूंनी स्पर्धेचा सामना करावा लागत आहे.

देशांतर्गत विक्री कमी झाली असली तरी निर्यात ही बजाजसाठी मोठा आधार बनली आहे. FY2026 मध्ये कंपनीने 22.50 लाख वाहनांची निर्यात केली, जी आधीच्या तुलनेत 20.8 टक्क्यांनी जास्त आहे. याच काळात मोटरसायकल निर्यातीत सुमारे 17 टक्क्यांनी वाढ झाली. विशेषतः पल्सरच्या निर्यातीत 18 टक्क्यांची वाढ नोंदवली गेली असून ही निर्यात आतापर्यंतच्या उच्चांकावर पोहोचली आहे. त्यामुळे कंपनीला आता नव्या पल्सर 125 आणि 150 कडून देशांतर्गत बाजारासोबतच आंतरराष्ट्रीय मार्केटमध्येही कामगिरी सुधारण्याची अपेक्षा आहे.