अर्णब चक्रीवादळ आज किनाऱ्यावर धडकणार; शंभराहून अधिक रेल्वे आणि 21 विमान उड्डाणे रद्द

बंगालच्या उपसागरात तयार झालेले 'अर्णब' हे तीव्र चक्रीवादळ बुधवारी (28 ऑक्टोबर) दुपारनंतर आंध्र प्रदेशातील बापटला आणि विशाखापट्टणमदरम्यान, यानमजवळ किनाऱ्यावर धडकणार आहे. त्याआधीच या वादळाचा सर्वाधिक फटका आंध्र प्रदेश आणि उत्तर चेन्नईच्या किनारपट्टी भागाला बसला आहे. वादळाच्या जोरामुळे अनेक ठिकाणी रोजचे जनजीवन पूर्णपणे विस्कळीत झाले आहे.

खबरदारी म्हणून देशभरातील 100 हून अधिक रेल्वे गाड्या रद्द करण्यात आल्या आहेत. विशाखापट्टणम आणि विजयवाडा येथील चार विमानतळांवरून होणारी 21 विमान उड्डाणेही रद्द झाली आहेत. एअर इंडियाने प्रवाशांसाठी विशेष सूचना जारी केली असून, प्रवाशांनी सध्याची स्थिती तपासूनच विमानतळावर जावे, असे आवाहन केले आहे. वीस हून अधिक जिल्ह्यांना सतर्कतेचा इशारा देण्यात आला आहे आणि दळणवळण यंत्रणा कोलमडली आहे.

उत्तर चेन्नईच्या किनारपट्टी भागात समुद्राचे पाणी अचानक मोठ्या प्रमाणात शिरल्याने रस्ते आणि आजूबाजूचा संपूर्ण परिसर पाण्याखाली गेला आहे. रस्त्यावरून जाणारे नागरिक आणि वाहनांवर समुद्राच्या जोरदार लाटा थेट आदळत आहेत. काकीनाडा येथे वादळ धडकल्यानंतर अनेक ठिकाणी झाडे उन्मळून पडली, वीजपुरवठा खंडित झाला आणि रस्ते पाण्याखाली गेले. मछलीपट्टणममध्येही जोरदार पाऊस आणि सोसाट्याच्या वाऱ्यात झाडे पडली असून रस्ते बंद झाले आहेत, तसेच अनेक भागांत पाणी साचले आहे.

पश्चिम बंगालमधील दिघा बीच आणि आंध्र प्रदेशातील विशाखापट्टणमच्या आर.के. बीचवर समुद्र अत्यंत खवळलेला असून उंच लाटा उसळत आहेत. अग्निशमन दल आणि बचाव पथके रस्त्यांवर पडलेली झाडे हटवण्याचे आणि मदतकार्याचे काम युद्धपातळीवर करत आहेत. सुरक्षिततेसाठी नागरिकांनी घराबाहेर पडू नये, असे आवाहन प्रशासनाने केले आहे.

किनारपट्टी भागात वारे ताशी 115 ते 125 किलोमीटर वेगाने वाहत आहेत. हा वेग ताशी 140 किलोमीटरपर्यंत जाऊ शकतो, असा इशारा हवामान विभागाने (IMD) दिला आहे. अनाकापल्ली, काकीनाडा, विशाखापट्टणम आणि विजयनगरम जिल्ह्यांत पुढील काही तासांत अचानक पूर (Flash Floods) येण्याचा गंभीर धोका वर्तवण्यात आला आहे.

वादळाचा फटका बसलेली अनेक राज्ये हाय अलर्टवर आहेत. त्यात आंध्र प्रदेश, ओडिशा, पुद्दुचेरी, छत्तीसगड, झारखंड, तेलंगणा, ईशान्य महाराष्ट्र, मध्य प्रदेश, बिहार, उत्तर प्रदेश, कर्नाटक, दिल्ली, हरियाणा आणि ईशान्येकडील राज्यांचा समावेश आहे. या राज्यांत मुसळधार पावसाचा इशारा देण्यात आला आहे. प्रशासनाने आतापर्यंत सुमारे 1.35 लाख लोकांना सुरक्षित ठिकाणी हलवले असून आपत्कालीन यंत्रणा सज्ज ठेवण्यात आली आहे. नागरिकांनी प्रशासनाच्या सूचना पाळाव्यात आणि किनारपट्टी किंवा सखल भागांत जाणे टाळावे, असेही आवाहन करण्यात आले आहे.