अमेरिकेच्या व्हिसासाठी सोशल मीडिया खाती 'पब्लिक' ठेवणे बंधनकारक, परराष्ट्र विभागाचा नवा नियम

अमेरिकेने व्हिसा मंजूर करण्याच्या प्रक्रियेत आणि देशात प्रवेश देण्याच्या धोरणात मोठे व कडक बदल केले आहेत. व्हिसा अर्जदारांच्या ऑनलाइन हालचाली आणि सोशल मीडियाची तपासणी किती दूरपर्यंत करायची, त्याची व्याप्ती अमेरिकन प्रशासनाने वाढवली आहे.

या नव्या निर्णयानुसार फक्त नेहमीचे कामगार किंवा पर्यटकच नाहीत, तर परदेशी पत्रकार, उच्चशिक्षित व्यावसायिक आणि विद्यार्थी यांनाही या कडक छाननीत धरले आहे.

अमेरिकेच्या परराष्ट्र विभागाने दिलेल्या माहितीनुसार, बिगर-स्थलांतरित (Non-immigrant) व्हिसासाठी अर्ज करणाऱ्या सगळ्या अर्जदारांना त्यांच्या सर्व सोशल मीडिया अकाउंट्सची प्रायव्हसी सेटिंग 'पब्लिक' (Public) किंवा 'ओपन' (Open) ठेवण्याचे स्पष्ट निर्देश दिले आहेत. त्यामुळे व्हिसा कॉन्सुलर अधिकाऱ्यांना अर्जदारांची डिजिटल उपस्थिती, त्यांच्या पोस्ट्स आणि ऑनलाइन वर्तन यांची सखोल तपासणी करता येणार आहे.

कामानिमित्त अमेरिकेत जाणाऱ्या परदेशी पत्रकारांसाठी हा बदल विशेष महत्त्वाचा मानला जात आहे. परदेशी माध्यमांच्या प्रतिनिधींना दिल्या जाणाऱ्या 'I-व्हिसा'च्या अर्जदारांना आता स्पष्टपणे या सोशल मीडिया तपासणीच्या कक्षेत आणले आहे. याशिवाय USMCA कराराखाली प्रवास करणारे व्यावसायिक (TN व्हिसा) आणि त्यांच्यावर अवलंबून असलेले कुटुंबीय (TD व्हिसा) यांनाही आपली सोशल मीडिया खाती खुली ठेवावी लागतील.

परराष्ट्र विभागाच्या म्हणण्यानुसार, हा नियम एका व्यापक सुरक्षा छाननी प्रणालीचा भाग आहे. याआधीच H-1B तात्पुरते कामगार, H-4 आश्रित, F-1 व M-1 विद्यार्थी, J-1 एक्सचेंज व्हिजिटर्स, धार्मिक कार्यकर्ते आणि राजनैतिक व्हिसा धारक यांच्यासाठी ही प्रक्रिया टप्प्याटप्प्याने लागू केली होती. आता या प्रणालीचा विस्तार करून सर्व प्रकारच्या बिगर-स्थलांतरित व्हिसा अर्जदारांना एकाच छताखाली आणले जात आहे.

अमेरिकेच्या परराष्ट्र विभागाने व्हिसा मंजुरी प्रक्रियेचे वर्णन 'राष्ट्रीय सुरक्षेचा निर्णय' असे केले आहे. व्हिसाची छाननी आणि पडताळणी करताना उपलब्ध असलेल्या प्रत्येक माहिती स्रोताचा वापर केला जाईल. अमेरिकेच्या राष्ट्रीय सुरक्षेला किंवा सार्वजनिक सुरक्षेला धोका ठरू शकणारी कोणतीही व्यक्ती देशात येऊ नये, हा त्यामागचा हेतू असल्याचे सांगितले आहे.

कोणत्या विशिष्ट पोस्ट्स किंवा विचारांमुळे व्हिसा नाकारला जाऊ शकतो, याचा अधिक तपशील जाहीर केलेला नाही. तरीही द्वेषपूर्ण भाषण, चिथावणीखोर मजकूर किंवा अमेरिकेच्या नियमांचे उल्लंघन करणाऱ्या कोणत्याही हालचालींमुळे व्हिसा अर्ज रद्द होण्याचा धोका वाढला आहे. त्यामुळे अमेरिकेत शिक्षण, नोकरी किंवा प्रवास करण्याचे स्वप्न पाहणाऱ्या प्रत्येक अर्जदाराला आता आपल्या ऑनलाइन वर्तनाबाबत अत्यंत सावध राहावे लागणार आहे.