ऑक्टोबरमध्ये मुंबईतील तीन महत्त्वाचे पूल एकत्र खुले होण्याचे नियोजन; वाहतूककोंडी कमी होणार

मुंबई शहरातील गेल्या काही काळापासून रखडलेले तीन अत्यंत महत्त्वाचे पूल येत्या ऑक्टोबर महिन्यात एकाच वेळी वाहतुकीसाठी खुले करण्याचे नियोजन प्रशासनाने केले आहे. यामध्ये ऑगस्ट २०२४ पासून बंद असलेला सायनचा ब्रिटिशकालीन रेल्वे ओव्हरब्रिज, गेल्या आठ वर्षांपासून रखडलेला विद्याविहार उड्डाणपूल आणि गोरेगाव येथील नवीन फ्लायओव्हर यांचा समावेश आहे. हे तिन्ही मार्ग सुरू झाल्यानंतर पूर्व आणि पश्चिम उपनगरांमधील वाहतूककोंडीची समस्या मोठ्या प्रमाणावर निकालात निघणार असून गाड्यांचा वेगही वाढणार आहे.

मध्य रेल्वे मार्गावर सायन स्टेशनला लागून असलेला ११२ वर्षे जुना रेल्वे पूल सुरक्षेच्या कारणावरून ऑगस्ट २०२४ पासून सर्व प्रकारच्या वाहतुकीसाठी पूर्णपणे बंद ठेवण्यात आला होता. विविध तांत्रिक अडचणींमुळे या पुलाच्या कामाची मुदत दोन वेळा वाढवावी लागली होती. पूल बंद असल्याने सायन, धारावी आणि एलबीएस मार्गावर दररोज प्रचंड कोंडी होत होती. आता हे काम अंतिम टप्प्यात पोहोचले असून प्रशासनाने येत्या १५ ऑक्टोबरपर्यंत हा पूल वाहतुकीसाठी खुला करण्याचे उद्दिष्ट ठेवले आहे. त्यामुळे परिसरातील वाहनचालकांना आणि नागरिकांना मोठा दिलासा मिळणार आहे.

पूर्व उपनगरातील विद्याविहार रेल्वे उड्डाणपुलाची मुंबईकर गेल्या आठ वर्षांपासून वाट पाहत आहेत. हा पूलही अखेर पूर्णत्वाकडे पोहोचला आहे. सुमारे १७८ कोटी रुपये खर्चून हा चारपदरी पूल उभारला जात आहे. तो सुरू झाल्यानंतर विद्याविहार पूर्व आणि पश्चिम या दोन्ही बाजूंमधील थेट ये-जा सोपी होणार आहे. या पुलामुळे घाटकोपर परिसरावर तसेच सांताक्रुझ चेंबूर लिंक रोडवर येणारा वाहतुकीचा जादा ताण लक्षणीयरीत्या कमी होण्यास मोठी मदत होणार आहे.

पश्चिम उपनगरातील गोरेगाव येथील नवीन उड्डाणपूल १.२६ किलोमीटर लांबीचा असून तो दादासाहेब फाळके चित्रनगरी परिसराला थेट जोडणार आहे. या पुलाचे मुख्य बांधकाम पूर्ण झाले आहे. ऑक्टोबरच्या दुसऱ्या आठवड्यात पुलाची 'लोड टेस्ट' घेतली जाणार आहे. ही चाचणी यशस्वी झाल्यानंतर १५ ऑक्टोबरपर्यंत हा पूल पूर्ण क्षमतेने वाहतुकीसाठी खुला केला जाईल.

या पुलामुळे पूर्व आणि पश्चिम उपनगरांना जोडणाऱ्या मार्गावरील प्रवासाचा वेळ ७५ मिनिटांवरून थेट २५ मिनिटांवर येणार आहे. म्हणजेच प्रवाशांची तब्बल ५० मिनिटे वाचणार आहेत. सणासुदीच्या तोंडावर हे तिन्ही महत्त्वाचे मार्ग खुले होत असल्याने मुंबईकरांचा प्रवास वेगवान आणि सोपा होणार आहे, अशी माहिती पालिकेच्या वरिष्ठ अधिकाऱ्यांनी दिली आहे.