अजित पवार विमान अपघात: घातपाताच्या तक्रारीनंतर AAIB चा एका महिन्यात अंतिम अहवाल देण्याचा शब्द

अजित पवार यांच्या बारामती विमान अपघाताच्या तपासाबाबत नवी माहिती पुढे आली आहे. या प्रकरणात घातपाताचा संशय व्यक्त करत तक्रार दाखल करणारे इंडिया अगेन्स्ट करप्शनचे अध्यक्ष हेमंत पाटील यांनी आज Aircraft Accident Investigation Bureau म्हणजेच AAIB च्या महासंचालकांची भेट घेतली. या भेटीबाबत त्यांनी स्वतः माहिती दिली.

या भेटीनंतर हेमंत पाटील यांनी दावा केला की, त्यांच्या तक्रारीच्या अनुषंगाने तपास पूर्ण करून एका महिन्यात अहवाल जारी करण्याचे आश्वासन AAIB कडून त्यांना मिळाले आहे. त्यामुळे आता अजित पवार यांच्या विमान अपघाताच्या अंतिम तपास अहवालात नेमके काय निष्कर्ष समोर येणार, याकडे सगळ्यांचे लक्ष लागले आहे.

हेमंत पाटील यांनी या प्रकरणात आधीच घातपाताचा संशय व्यक्त करत तक्रार दाखल केली होती. त्यांच्या सांगण्यानुसार, सुरुवातीला त्यांनी बारामतीत तक्रार दिली होती. मात्र त्याची दखल घेतली गेली नाही, असा दावा करत त्यांनी तहसीलदारांचीही भेट घेतली. त्यानंतर हे प्रकरण त्यांनी उच्च न्यायालयात नेल्याचे त्यांनी सांगितले.

हेमंत पाटील यांच्या म्हणण्यानुसार, उच्च न्यायालयाने या प्रकरणाचा तपास AAIB करत असल्याचे त्यांच्या निदर्शनास आणून दिले. त्यानंतर त्यांनी जून महिन्यात AAIB कडे स्वतंत्रपणे तक्रार केली. पण त्यावर उत्तर मिळाले नाही, म्हणून त्यांनी आता थेट AAIB च्या डीजींचीच भेट घेतली, असे त्यांनी सांगितले.

AAIB च्या अधिकाऱ्यांनी तपास एका महिन्यात पूर्ण करून अजित पवार विमान अपघाताचा अहवाल जारी करण्याचे आश्वासन दिल्याचा दावा हेमंत पाटील यांनी केला आहे. "एका महिन्यात अहवाल नाही मिळाला तर पुन्हा उच्च न्यायालयात जाणार," असा इशाराही त्यांनी दिला आहे.

दरम्यान, AAIB ने 28 फेब्रुवारी 2026 रोजी बारामतीतील Learjet अपघाताचा प्राथमिक अहवाल आधीच प्रसिद्ध केला होता. या प्राथमिक अहवालात कमी दृश्यमानता, विमानतळावरील काही सुरक्षा-सुविधांशी संबंधित त्रुटी आणि ऑपरेशनल बाबी तपासाच्या केंद्रस्थानी असल्याचे नमूद करण्यात आले होते. AAIB ने पुढील तपासातून अपघाताची तथ्ये, मूळ कारणे आणि संबंधित घटक निश्चित करणार असल्याचे म्हटले होते.

28 जानेवारी 2026 रोजी अजित पवार मुंबईहून बारामतीकडे विमानाने निघाले होते. बारामती विमानतळावर उतरत असताना Learjet विमानाचा अपघात झाला. या दुर्घटनेत अजित पवार यांच्यासह विमानातील सर्व पाच जणांचा मृत्यू झाला.

AAIB च्या प्राथमिक अहवालात अपघाताच्या वेळी दृश्यमानता 3 किलोमीटर असल्याचे नमूद करण्यात आले होते, तर संबंधित VFR ऑपरेशनसाठी 5 किलोमीटर दृश्यमानतेची गरज असल्याचेही अहवालात नमूद आहे.

आता हेमंत पाटील यांच्या दाव्यानुसार एका महिन्यात तपासाचा अहवाल येतो का आणि त्यात नेमके कोणते निष्कर्ष नोंदवले जातात, हे पाहणे महत्त्वाचे ठरणार आहे.