३० सप्टेंबरपासून खतासाठी FFS ॲपवर आधी बुकिंग बंधनकारक, जुन्नर कृषी विभागाचे आवाहन
ॲपवर ऑनलाइन बुकिंग केल्याशिवाय ३० सप्टेंबरपासून खत खरेदी करता येणार नाही, त्यामुळे जुन्नर तालुक्यातील शेतकऱ्यांनी वेळेत नोंदणी करावी, असे कृषी विभागाने सांगितले.
खत खरेदीची प्रक्रिया शेतकऱ्यांसाठी सोपी, पारदर्शक आणि नियोजनबद्ध व्हावी, यासाठी महाराष्ट्र शासनाच्या कृषी विभागाने FFS (Framework for Fertilizer Sale) ॲपवर आधारित नवी प्रणाली लागू केली आहे. ३० सप्टेंबरपासून या ॲपवर ऑनलाइन बुकिंग केल्यानंतरच शेतकऱ्यांना खत खरेदी करता येणार आहे.
त्यामुळे जुन्नर तालुक्यातील शेतकऱ्यांनी वेळ न घालवता ॲप डाउनलोड करावे आणि आपल्याला लागणाऱ्या खताची आगाऊ नोंदणी व बुकिंग करून घ्यावे, असे आवाहन कृषी विभागाच्या वतीने करण्यात आले आहे.
या डिजिटल प्रणालीत शेतकऱ्यांना उपलब्ध खतसाठा, त्यांचे पीक व क्षेत्रफळ यानुसार मिळणारे खताचे प्रमाण आणि जवळचे अधिकृत विक्री केंद्र, ही सगळी माहिती ऑनलाइन मिळणार आहे. त्यामुळे खत वितरणात पारदर्शकता वाढण्यास मदत होईल आणि शेतकऱ्यांचा वेळही वाचेल.
नोंदणी कशी करायची, याचीही माहिती देण्यात आली आहे. शेतकऱ्यांनी आपल्या Android मोबाईलमधील Google Play Store वरून FFS ॲप डाउनलोड करावे. त्यानंतर आवश्यक भाषा आणि राज्य निवडून आधार क्रमांक किंवा Farmer ID वापरून OTP द्वारे लॉगिन करायचे आहे.
लॉगिन झाल्यावर शेतकऱ्याच्या नावावरील जमीन आणि पिकांची माहिती ॲपवर पाहता येईल. त्या क्षेत्रफळ व पिकांच्या आधारे उपलब्ध खत कोट्याची माहितीही ॲपमध्ये दिसेल. त्यानुसार खताचा प्रकार, पोत्यांची संख्या आणि जवळचे अधिकृत खत विक्री केंद्र निवडून ऑनलाइन बुकिंग करता येईल.
बुकिंग यशस्वी झाल्यावर शेतकऱ्याच्या मोबाईलवर QR Code अथवा E-Token मिळेल. बुकिंगच्या वेळी निवडलेल्या अधिकृत खत विक्री केंद्रावर हा QR Code दाखवायचा आहे. आवश्यक पडताळणी पूर्ण झाल्यावर बुक केलेले खत दिले जाईल.
ॲपवर आगाऊ नोंदणी करता येणार असल्याने खत विक्री केंद्रांवरची गर्दी आणि रांगेत उभे राहण्याचा वेळ कमी होण्यास मदत होईल, असे सांगण्यात आले आहे. कोणत्या शेतकऱ्याने किती खत बुक केले आणि कोणत्या केंद्रावरून घेणार आहे, याची डिजिटल नोंद राहणार असल्याने वितरण प्रक्रियेत पारदर्शकताही येईल.
पंचायत समिती जुन्नरचे कृषी अधिकारी निलेश बुधवंत यांनी आवाहन केले आहे. ते म्हणाले, "३० सप्टेंबरपासून FFS ॲपद्वारे ऑनलाइन बुकिंग केल्यानंतरच खत खरेदी करता येणार आहे. त्यामुळे गावातील जास्तीत जास्त शेतकऱ्यांपर्यंत या प्रणालीची माहिती पोहोचवावी. शेतकऱ्यांनी वेळेत ॲप डाउनलोड करून नोंदणी करावी आणि आवश्यक खताचे आगाऊ बुकिंग करून घ्यावे."
ऐन हंगामात खताची गरज निर्माण झाल्यावर घाई करण्यापेक्षा शेतकऱ्यांनी वेळेत FFS ॲपवर नोंदणी करून लागणाऱ्या खताचे बुकिंग करून ठेवावे, असे कृषी विभागाने स्पष्ट केले आहे.
