नागपुरात 2000 एकरवर रोजगारप्रधान 'नवीन नागपूर' उभारणार, मुख्यमंत्री फडणवीसांची घोषणा
नागपूर दौऱ्यावर विविध विकासकामांच्या लोकार्पणावेळी मुख्यमंत्री देवेंद्र फडणवीस यांनी शहराच्या भविष्यातील विस्ताराचा आराखडा मांडला. सुमारे 998 कोटींच्या इंदोरा-दिघोरी उड्डाणपुलाचेही डिजिटल लोकार्पण झाले.
नागपूर शहर आता केवळ राज्याची उपराजधानी राहिलेली नाही, तर पायाभूत सुविधांच्या मोठ्या जाळ्यामुळे ते एक आधुनिक, आंतरराष्ट्रीय दर्जाचे आणि पर्यावरणाच्या दृष्टीने शाश्वत शहर म्हणून पुढे येत आहे. शहराचा वाढता विस्तार, लोकसंख्या आणि उद्योगांच्या गरजा लक्षात घेऊन राज्य सरकारने सुमारे 2000 एकर जागेवर रोजगारावर आधारित 'नवीन नागपूर' उभारण्याचा मोठा आराखडा तयार केला आहे. नागपूरच्या दौऱ्यावर असताना आणि विविध विकासकामांच्या लोकार्पण कार्यक्रमात बोलताना मुख्यमंत्री देवेंद्र फडणवीस यांनी या दूरगामी योजनेची माहिती दिली.
शहराच्या एकूण विकासाचा आढावा घेताना फडणवीस यांनी सांगितले की, पायाभूत सुविधांच्या मदतीने नागपूरला सुनियोजित रूप देण्याचे काम सुरू आहे. याच अंतर्गत उत्तर, मध्य आणि दक्षिण नागपूरला अधिक चांगल्या पद्धतीने जोडणाऱ्या आणि शहराच्या वाहतुकीला नवी दिशा देणाऱ्या 'इंदोरा-दिघोरी उड्डाणपुलाचे' (डॉ. केशव बळीरामपंत हेडगेवार उड्डाणपूल) डिजिटल लोकार्पण करण्यात आले. हा उड्डाणपूल 8.90 किलोमीटर लांबीचा असून त्यासाठी सुमारे 998 कोटी रुपये खर्च आला आहे. मुख्यमंत्री देवेंद्र फडणवीस आणि केंद्रीय रस्ते वाहतूक व महामार्ग मंत्री नितीन गडकरी यांच्या प्रमुख उपस्थितीत हा लोकार्पण सोहळा पार पडला.
नागपूर आज जागतिक पातळीवर एक प्रगतशील आणि अत्याधुनिक शहर म्हणून ओळखले जात आहे. पर्यावरणाचा समतोल राखणारा कचऱ्यापासून ऊर्जानिर्मितीचा प्रकल्प, सिमेंट काँक्रीटच्या रस्त्यांमुळे खड्ड्यांपासून मिळालेली सुटका आणि शहराभोवती उभारला जाणारा बाह्य रिंगरोड, ही याच दिशेने टाकलेली पावले आहेत. शहराचा भविष्यातील विस्तार लक्षात घेता आणखी एक नवा रिंगरोड बांधण्यात येणार असून, त्यामुळे नागपूर वाहतूक कोंडी आणि प्रदूषणापासून मुक्त राहावे, हे उद्दिष्ट आहे. याच मालिकेतील सर्वात मोठे पाऊल म्हणजे सुमारे 2000 एकरवर उभारले जाणारे 'नवीन नागपूर', जे पूर्णपणे रोजगारावर केंद्रित असेल आणि तरुणांसाठी नव्या संधी निर्माण करेल.
मुख्यमंत्री फडणवीस यांनी सांगितले की, नागपूर शहरात आतापर्यंत 35 उड्डाणपूल पूर्ण झाले असून आणखी 15 उड्डाणपूल प्रस्तावित आहेत. तसेच कचऱ्यापासून ऊर्जानिर्मिती करणारा पर्यावरणपूरक आधुनिक प्रकल्पही उभारला जात आहे.
पालकमंत्री चंद्रशेखर बावनकुळे यांनी यावेळी सांगितले की, नागपूर शहरातील प्रत्येक विधानसभा मतदारसंघात दोन मोठे विकासप्रकल्प राबवले जाणार असून, शहरासाठी येत्या काळात 1 हजार कोटी रुपयांची तरतूद उपलब्ध होणार आहे. दीक्षाभूमीच्या विकासाचा आराखडाही मंजूर झाल्याचे त्यांनी यावेळी नमूद केले.
