वडाचीवाडी तलावाकडे दुर्लक्ष, नगरसेवक निवृत्ती अण्णा बांदल यांची महापालिकेकडे तातडीच्या कारवाईची मागणी

वडाचीवाडी, २२ ऑक्टोबर २०२६: वडाचीवाडी तलावाकडे होत असलेल्या कथित दुर्लक्षाबद्दल स्थानिकांमधली चिंता आता वाढली आहे. प्रभाग क्रमांक ४१ चे नगरसेवक निवृत्ती अण्णा बांदल यांनी पुणे महानगरपालिकेने (PMC) यात तातडीने लक्ष घालावे, तलावाचे पुनरुज्जीवन करावे आणि तो दीर्घकाळ टिकून राहावा यासाठी उपाय करावेत, अशी मागणी केली आहे. या भागातील रहिवासी अर्चना दुबे आणि संगमित्रा यांनीही स्थानिक जलाशयाचे संरक्षण किती महत्त्वाचे आहे, हे बोलून दाखवले आहे. तलावाची देखभाल नीट होतेय का, याची जबाबदारी कुणाची हेही ठरले पाहिजे, असे त्यांचे म्हणणे आहे.

पुणे आणि आसपासच्या परिसरात पाण्याची सुरक्षा हा मुद्दा दिवसेंदिवस महत्त्वाचा होत चालला आहे. अशा वेळी वडाचीवाडी तलावातला गाळ काढणे, प्रदूषण रोखणे आणि नियमित देखभाल करणे या गरजांमुळे आहेत ते जलस्रोत जपण्याची प्रशासनाची जबाबदारी पुन्हा चर्चेत आली आहे.

स्थानिक रहिवासी अर्चना दुबे म्हणाल्या, "वडाचीवाडी तलाव हा आमच्या परिसराचा महत्त्वाचा भाग आहे, त्याच्या स्थितीकडे दुर्लक्ष होता कामा नये. तलाव स्वच्छ करून त्याचे पुनरुज्जीवन करण्यासाठी प्रशासनाने वेळेत पावले उचलली पाहिजेत, म्हणजे तो आपल्या समाजासाठी आणि पुढच्या पिढ्यांसाठी टिकेल."

संगमित्रा यांनीही तलावाच्या संरक्षणासाठी सातत्याने प्रयत्न व्हायला हवेत आणि देखभालीचे काम प्रभावीपणे पार पडले पाहिजे, यावर भर दिला.

"तलावाचे संवर्धन म्हणजे अधूनमधून होणाऱ्या स्वच्छता मोहिमा एवढेच नसावे. नियमित देखरेख, योग्य देखभाल आणि प्रदूषण रोखण्यासाठी प्रभावी उपाय हवेत. प्रशासनाने जबाबदारी घ्यावी आणि तलाव दीर्घकाळ सुरक्षित राहील याची खात्री करावी," असे संगमित्रा म्हणाल्या.

नगरसेवक निवृत्ती अण्णा बांदल यांनी वडाचीवाडी तलावातला गाळ तातडीने काढावा आणि त्याच्या पुनरुज्जीवनासाठी विशेष निधी द्यावा, अशी मागणी केली आहे. संवर्धनाच्या प्रयत्नांना मदत करण्यासाठी संबंधित राज्य आणि केंद्र सरकारच्या यंत्रणांनीही हस्तक्षेप करावा, असे आवाहनही त्यांनी केले आहे.

स्वच्छता आणि देखभालीचे काम करणाऱ्या खासगी ठेकेदारांवर कुणाची देखरेख आहे, असा सवाल बांदल यांनी उपस्थित केला. ही कामे बाहेरच्या ठेकेदारांना दिली म्हणून सार्वजनिक मालमत्तेबद्दलची PMC ची जबाबदारी संपत नाही, असेही त्यांनी स्पष्ट केले.

प्रदूषण रोखण्यासाठी प्रभावी उपाययोजना, देखभालीच्या कामाची नियमित तपासणी आणि ठराविक मुदतीचा संवर्धन आराखडा असावा, अशीही त्यांची मागणी आहे. त्यामुळे जबाबदारी निश्चित होईल आणि कामात किती प्रगती झाली हे मोजता येईल, असे ते म्हणाले.

रहिवासी आणि स्थानिक लोकप्रतिनिधींनी प्रशासनाला विनंती केली आहे की, तलावाच्या पुनरुज्जीवनाला प्राधान्य द्यावे आणि जलाशय वाचवण्यासाठी ठोस पावले उचलावीत. वडाचीवाडी तलावाचे रक्षण करण्यासाठी आणि त्याचे पर्यावरणीय मूल्य जपण्यासाठी PMC आणि संबंधित सरकारी यंत्रणा यांच्यात सतत समन्वय असणे आवश्यक आहे, यावरही त्यांनी भर दिला आहे.