केदार जाधवचा संघाच्या पथसंचलनातला फोटो व्हायरल, पुण्यातील विजयादशमी उत्सवात सहभाग

भारतीय क्रिकेटच्या वर्तुळात केदार जाधव हे नाव सर्वांना चांगलं माहीत आहे. टीम इंडियाकडून तो बऱ्यापैकी आंतरराष्ट्रीय क्रिकेट खेळला आहे. पण तो राष्ट्रीय स्वयंसेवक संघाशी संबंधित आहे, हे फार कमी लोकांना माहीत होतं. आता त्याचा संघाच्या गणवेशातला फोटो समोर आल्यानंतर तीच गोष्ट चर्चेत आली आहे.

राष्ट्रीय स्वयंसेवक संघाच्या विजयादशमी उत्सवात केदार जाधव सहभागी झाला होता. 20 ऑक्टोंबरला पुण्यातल्या डेक्कन जिमखाना कॉलनीमध्ये हा कार्यक्रम आयोजित केला होता. त्यात संघाच्या पथसंचलनात त्याने भाग घेतला. या पथसंचलनातला आपला फोटो त्याने इन्स्टाग्रामवर शेअर केला आणि तेव्हापासून सगळीकडे त्याची चर्चा सुरू झाली.

आपल्या इन्स्टाग्राम पोस्टवर केदार जाधवने राष्ट्रीय स्वयंसेवक संघाशी संबंधित घडामोडी आणि विचारांचा संदेशही शेअर केला आहे. पथसंचलनात सहभागी झाल्याचा फोटो त्याने लोकांसमोर ठेवला आहे. फोटोमध्ये तो सफेद शर्ट, खाकी पॅन्ट आणि काळी टोपी घालून दिसतो. त्याच्या हातात दंड आहे.

केदार जाधव आता 41 वर्षांचा आहे. 3 जून 2024 रोजी त्याने क्रिकेटच्या सर्व प्रकारांतून निवृत्ती घेतली. सोशल मीडियावरून त्याने आपल्या या निर्णयाची माहिती दिली होती. 16 नोव्हेंबर 2014 रोजी श्रीलंकेविरुद्धच्या वनडे सामन्यातून त्याने आंतरराष्ट्रीय क्रिकेटमध्ये पदार्पण केलं होतं.

भारतासाठी केदार जाधव 73 वनडे आंतरराष्ट्रीय सामने खेळला. त्याने 42.09 च्या सरासरीने 1389 धावा केल्या. यात दोन शतकं आणि सहा अर्धशतकं आहेत. गोलंदाजीतही त्याचं योगदान होतं आणि वनडे क्रिकेटमध्ये त्याच्या नावावर 27 विकेट आहेत. टी 20 इंटरनॅशनलमध्ये तो नऊ सामने खेळला आणि त्याने 58 धावा केल्या. त्याचा स्ट्राइक रेट 123.23 आहे.

इंडियन प्रीमियर लीगमध्ये (IPL) केदार जाधव चेन्नई सुपर किंग्ज (CSK) आणि सनरायझर्स हैदराबाद या संघांचा भाग होता. महेंद्र सिंह धोनीच्या नेतृत्वाखाली चेन्नईकडून खेळताना त्याने अनेकदा उपयुक्त कामगिरी केली. आयपीएलमध्ये तो एकूण 95 सामने खेळला आणि त्यात त्याने 1196 धावा केल्या. या काळात त्याचा स्ट्राइक रेट 123.17 होता आणि त्याने चार अर्धशतकं झळकावली.