पुणेकरांनो, दिवाळीनंतर शहरात एक दिवस आड पाणी; कोट्यातील निम्मे पाणी आधीच संपले

पुणे शहरावर आगामी काळात गंभीर जलसंकटाचे सावट पसरले आहे. सांस्कृतिक आणि आयटीची राजधानी म्हणून ओळखल्या जाणाऱ्या पुण्यात दिवाळी संपताच संपूर्ण शहरात 'एक दिवस आड' पाणीपुरवठा करण्याचा निर्णय महापालिका प्रशासनाने घेतला आहे. त्यामुळे पुणेकरांना आता पाण्याचे नियोजन नव्याने करावे लागणार आहे.

कालवा सल्लागार समितीची बैठक नुकतीच पार पडली. राज्याच्या उपमुख्यमंत्री आणि पुण्याच्या पालकमंत्री सुनेत्रा पवार यांच्या अध्यक्षतेखाली ही बैठक झाली. जलसंपदा मंत्री राधाकृष्ण विखे पाटील आणि कृषी मंत्री दत्तात्रय भरणे यांच्या उपस्थितीत झालेल्या या बैठकीत पुणे शहराच्या पाणी कोट्याचा आढावा घेण्यात आला. पुढे येणारी तीव्र टंचाई टाळण्यासाठी हा धोरणात्मक निर्णय महापालिका प्रशासनाने घेतला आहे.

पुणे शहरासाठी वर्षाला १३.५ टीएमसी पाण्याचा कोटा मंजूर करण्यात आला आहे. पण महापालिकेच्या आकडेवारीनुसार १ जुलैपासून आतापर्यंत यातील ६.३५ टीएमसी पाणी वापरले गेले आहे. त्यामुळे ३० जून २०२७ पर्यंत, म्हणजे पुढच्या आठ ते नऊ महिन्यांच्या मोठ्या कालावधीसाठी शहराकडे फक्त ७.१५ टीएमसी पाणी शिल्लक आहे. लोकसंख्या वाढत आहे आणि रोजची गरजही मोठी आहे, हे पाहता हा शिल्लक साठा अपुरा पडण्याची दाट शक्यता आहे.

यंदा राज्यात अल निनोच्या प्रभावामुळे पावसाने मोठी ओढ दिली. ऑगस्ट आणि सप्टेंबर या मुख्य पावसाच्या महिन्यांत अपेक्षित पाऊस झाला नाही. त्यामुळे ग्रामीण भागातील रब्बी पिकांसाठी आणि पिण्याच्या पाण्यासाठी धरणांतून पाणी सोडावे लागले. या परिस्थितीचा गांभीर्याने विचार करून राज्य सरकारने २० टक्के पाणीकपात करण्याचे निर्देश दिले आहेत.

सध्या खडकवासला धरण साखळीत २४ टीएमसी पाणीसाठा उपलब्ध आहे. तरीही बाष्पीभवन, पाण्याची गळती आणि ग्रामीण भागासाठी सोडले जाणारे आवर्तन लक्षात घेता शहराला पाण्याची मर्यादा पाळणे अनिवार्य ठरत आहे.

ऐन सणासुदीच्या दिवसांत नागरिकांची गैरसोय होऊ नये, म्हणून दिवाळीपर्यंत नेहमीप्रमाणे नियमित पाणीपुरवठा सुरू ठेवला जाईल. पण दिवाळी संपताच महापालिका 'एक दिवस आड' पाणीपुरवठ्याचे नियोजन काटेकोरपणे राबवणार आहे. प्रशासनाने नागरिकांना पाण्याचा वापर अगदी काटकसरीने करण्याचे आणि पाण्याची नासाडी टाळण्याचे आवाहन केले आहे.